1And it was don in oon of the daies, whanne he tauyte the puple in the temple, and prechide the gospel, the princis of preestis and scribis camen togidere with the elder men;

stylus

2and thei seiden to hym, Seie to vs, in what power thou doist these thingis, or who is he that yaf to thee this power?

stylus

3And Jhesus answeride, and seide to hem, And Y schal axe you o word; answere ye to me.

stylus

4Was the baptym of Joon of heuene, or of men?

stylus

5And thei thouyten with ynne hem silf, seiynge, For if we seien, Of heuene, he schal seie, Whi thanne bileuen ye not to hym?

stylus

6and if we seien, Of men, al the puple schal stoone vs; for thei ben certeyn, that Joon is a prophete.

stylus

7And thei answeriden, that thei knewen not, of whennus it was.

stylus

8And Jhesus seide to hem, Nether Y seie to you, in what power Y do these thingis.

stylus

9And he bigan to seie to the puple this parable. A man plauntide a vynyerd, and hiride it to tilieris; and he was in pilgrimage longe tyme.

stylus

10And in the tyme of gaderynge of grapis, he sente a seruaunt to the tilieris, that thei schulden yyue to hym of the fruyt of the vynyerd; whiche beten hym, and leten hym go voide.

stylus

11And he thouyte yit to sende another seruaunt; and thei beten this, and turmentiden hym sore, and leten hym go.

stylus

12And he thouyte yit to sende the thridde, and hym also thei woundiden, and castiden out.

stylus

13And the lord of the vyneyerd seide, What schal Y do? Y schal sende my dereworthe sone; perauenture, whanne thei seen hym, thei schulen drede.

stylus

14And whanne the tilieris sayn hym, thei thouyten with ynne hem silf, and seiden, This is the eire, sle we hym, that the eritage be oure.

stylus

15And thei castiden hym out of the vyneyerd, and killiden hym. What schal thanne the lord of the vyneyerd do to hem?

stylus

16He schal come, and distruye these tilieris, and yyue the vyneyerd to othere. And whanne this thing was herd, thei seiden to hym, God forbede.

stylus

17But he bihelde hem, and seide, What thanne is this that is writun, The stoon which men bildynge repreueden, this is maad in to the heed of the corner?

stylus

18Ech that schal falle on that stoon, schal be to-brisid, but on whom it schal falle, it schal al to-breke him.

stylus

19And the princis of prestis, and scribis, souyten to leye on hym hoondis in that our, and thei dredden the puple; for thei knewen that to hem he seide this liknesse.

stylus

20And thei aspieden, and senten aspieris, that feyneden hem iust, that thei schulden take hym in word, and bitaak hym to the `power of the prince, and to the power of the iustice.

stylus

21And thei axiden hym, and seiden, Maister, we witen, that riytli thou seist and techist; and thou takist not the persoone of man, but thou techist in treuthe the weie of God.

stylus

22Is it leueful to vs to yyue tribute to the emperoure, or nay?

stylus

23And he biheld the disseit of hem, and seide to hem, What tempten ye me?

stylus

24Shewe ye to me a peny; whos ymage and superscripcioun hath it? Thei answerden, and seiden to hym, The emperouris.

stylus

25And he seide to hem, Yelde ye therfor to the emperoure tho thingis that ben the emperours, and tho thingis that ben of God, to God.

stylus

26And thei myyten not repreue his word bifor the puple; and thei wondriden in his answere, and heelden pees.

stylus

27Summe of the Saduceis, that denyeden the ayenrisyng fro deeth to lijf, camen, and axiden hym,

stylus

28and seiden, Maister, Moises wroot to vs, if the brother of ony man haue a wijf, and be deed, and he was with outen eiris, that his brothir take his wijf, and reise seed to his brother.

stylus

29And so there weren seuene britheren. The firste took a wijf, and is deed with outen eiris;

stylus

30and the brothir suynge took hir, and he is deed with outen sone;

stylus

31and the thridde took hir; also and alle seuene, and leften not seed, but ben deed;

stylus

32and the laste of alle the womman is deed.

stylus

33Therfor in the `risyng ayen, whos wijf of hem schal sche be? for seuene hadden hir to wijf.

stylus

34And Jhesus seide to hem, Sones of this world wedden, and ben youun to weddyngis;

stylus

35but thei that schulen be had worthi of that world, and of the `risyng ayen fro deeth, nethir ben wedded,

stylus

36nethir wedden wyues, nethir schulen mowe die more; for thei ben euen with aungels, and ben the sones of God, sithen thei ben the sones of `risyng ayen fro deeth.

stylus

37And that deed men risen ayen, also Moises schewide bisidis the busch, as he seith, The Lord God of Abraham, and God of Ysaac, and God of Jacob.

stylus

38And God is not of deed men, but of lyuynge men; for alle men lyuen to hym.

stylus

39And summe of scribis answeringe, seiden, Maistir, thou hast wel seid.

stylus

40And thei dursten no more axe hym ony thing.

stylus

41But he seide to hem, How seien men, Crist to be the sone of Dauid,

stylus

42and Dauid hym silf seith in the book of Salmes, The Lord seide to my lord, Sitte thou on my riythalf,

stylus

43til that Y putte thin enemyes a stool of thi feet?

stylus

44Therfor Dauid clepith hym lord, and hou is he his sone?

stylus

45And in heryng of al the puple, he seide to hise disciplis,

stylus

46Be ye war of scribis, that wolen wandre in stolis, and louen salutaciouns in chepyng, and the firste chaieris in synagogis, and the firste sittynge placis in feestis;

stylus

47that deuouren the housis of widewis, and feynen long preiyng; these schulen take the more dampnacioun.

stylus