1Poul, the seruaunt of Jhesu Crist, clepid an apostle, departid in to the gospel of God;

stylus

2which he hadde bihote tofore bi his profetis in holi scripturis of his sone,

stylus

3which is maad to hym of the seed of Dauid bi the flesch,

stylus

4and he was bifor ordeyned the sone of God in vertu, bi the spirit of halewyng of the ayenrisyng of deed men, of Jhesu Crist oure Lord,

stylus

5bi whom we han resseyued grace and the office of apostle, to obeie to the feith in alle folkis for his name,

stylus

6among whiche ye ben also clepid of Jhesu Crist,

stylus

7to alle that ben at Rome, derlyngis of God, and clepid hooli, grace to you, and pees of God oure fadir, and of the Lord Jhesu Crist.

stylus

8First Y do thankyngis to my God, bi Jhesu Crist, for alle you, for youre feith is schewid in al the world.

stylus

9For God is a witnesse to me, to whom Y serue in my spirit, in the gospel of his sone,

stylus

10that with outen ceessyng Y make mynde of you euere in my preieris, and biseche, if in ony maner sum tyme Y haue a spedi weie in the wille of God to come to you.

stylus

11For Y desire to se you, to parten sumwhat of spiritual grace,

stylus

12that ye be confermyd, that is, to be coumfortid togidere in you, bi feith that is bothe youre and myn togidere.

stylus

13And, britheren, Y nyle, that ye vnknowun, that ofte Y purposide to come to you, and Y am lett to this tyme, that Y haue sum fruyt in you, as in othere folkis.

stylus

14To Grekis and to barberyns, to wise men and to vnwise men,

stylus

15Y am dettour, so that that is in me is redi to preche the gospel also to you that ben at Rome.

stylus

16For Y schame not the gospel, for it is the vertu of God in to heelthe to ech man that bileueth, to the Jew first, and to the Greke.

stylus

17For the riytwisnesse of God is schewid in it, of feith in to feith,

stylus

18as it is writun, For a iust man lyueth of feith. For the wraththe of God is schewid fro heuene on al vnpite and wickidnesse of tho men, that withholden the treuthe of God in vnriytwisnes.

stylus

19For that thing of God that is knowun, is schewid to hem, for God hath schewid to hem.

stylus

20For the vnuysible thingis of hym, that ben vndurstondun, ben biholdun of the creature of the world, bi tho thingis that ben maad, yhe, and the euerlastynge vertu of hym and the godhed, so that thei mowe not be excusid.

stylus

21For whanne thei hadden knowe God, thei glorifieden hym not as God, nether diden thankyngis; but thei vanyschiden in her thouyts, and the vnwise herte of hem was derkid.

stylus

22For thei `seiynge that hem silf weren wise, thei weren maad foolis.

stylus

23And thei chaungiden the glorie of `God vncorruptible in to the licnesse of an ymage of a deedli man, and of briddis, and of foure footid beestis, and of serpentis.

stylus

24For which thing God bitook hem in to the desiris of her herte, in to vnclennesse, that thei punysche with wrongis her bodies in hem silf.

stylus

25The whiche chaungiden the treuthe of God in to leesyng, and herieden and serueden a creature rathere than to the creatoure, that is blessid in to worldis of worldis.

stylus

26Amen. Therfor God bitook hem in to passiouns of schenschipe. For the wymmen of hem chaungiden the kyndli vss in to that vss that is ayens kynde.

stylus

27Also the men forsoken the kyndli vss of womman, and brenneden in her desiris togidere, and men in to men wrouyten filthehed, and resseyueden in to hem silf the meede that bihofte of her errour.

stylus

28And as thei preueden that thei hadden not God in knowyng, God bitook hem in to a repreuable wit, that thei do tho thingis that ben not couenable; that thei ben fulfillid with al wickidnesse,

stylus

29malice, fornycacioun, coueitise, weiwardnesse, ful of enuye, mansleyngis, strijf, gile, yuel wille, preuy bacbiteris, detractouris,

stylus

30hateful to God, debateris, proude, and hiy ouer mesure, fynderis of yuele thingis, not obeschynge to fadir and modir,

stylus

31vnwise, vnmanerli, withouten loue, withouten boond of pees, with outen merci.

stylus

32The whiche whanne thei hadden knowe the riytwisnesse of God, vndirstoden not, that thei that don siche thingis ben worthi the deth, not oneli thei that don tho thingis, but also thei that consenten to the doeris.

stylus