1Y am a very vyne, and my fadir is an erthe tilier.

stylus

2Ech braunch in me that berith not fruyt, he schal take awey it; and ech that berith fruyt, he schal purge it, that it bere the more fruyt.

stylus

3Now ye ben clene, for the word that Y haue spokun to you.

stylus

4Dwelle ye in me, and Y in you; as a braunche may not make fruyt of it silf, but it dwelle in the vyne, so nether ye, but ye dwelle in me.

stylus

5Y am a vyne, ye the braunchis. Who that dwellith in me, and Y in hym, this berith myche fruyt, for with outen me ye moun no thing do.

stylus

6If ony man dwellith not in me, he schal be caste out as a braunche, and schal wexe drie; and thei schulen gadere hym, and thei schulen caste hym in to the fier, and he brenneth.

stylus

7If ye dwellen in me, and my wordis dwelle in you, what euer thing ye wolen, ye schulen axe, and it schal be don to you.

stylus

8In this thing my fadir is clarified, that ye brynge forth ful myche fruyt, and that ye be maad my disciplis.

stylus

9As my fadir louede me, Y haue loued you; dwelle ye in my loue.

stylus

10If ye kepen my comaundementis, ye schulen dwelle in my loue; as Y haue kept the comaundementis of my fadir, and Y dwelle in his loue.

stylus

11These thingis Y spak to you, that my ioye be in you, and youre ioye be fulfillid.

stylus

12This is my comaundement, that ye loue togidere, as Y louede you.

stylus

13No man hath more loue than this, that a man putte his lijf for hise freendis.

stylus

14Ye ben my freendis if ye doen tho thingis, that Y comaunde to you.

stylus

15Now Y schal not clepe you seruauntis, for the seruaunt woot not, what his lord schal do; but Y haue clepid you freendis, for alle thingis what euere Y herde of my fadir, Y haue maad knowun to you.

stylus

16Ye han not chosun me, but Y chees you; and Y haue put you, that ye go, and brynge forth fruyt, and youre fruyt dwelle; that what euere thing ye axen the fadir in my name, he yyue to you.

stylus

17These thingis Y comaunde to you, that ye loue togidere.

stylus

18If the world hatith you, wite ye, that it hadde me in hate rather than you.

stylus

19If ye hadden be of the world, the world schulde loue that thing that was his; but for ye ben not of the world, but Y chees you fro the world, therfor the world hatith you.

stylus

20Haue ye mynde of my word, which Y seide to you, The seruaunt is not grettere than his lord. If thei han pursued me, thei schulen pursue you also; if thei han kept my word, thei schulen kepe youre also.

stylus

21But thei schulen do to you alle these thingis for my name, for thei knowen not hym that sente me.

stylus

22If Y hadde not comun, and hadde not spokun to hem, thei schulden not haue synne; but now thei haue noon excusacioun of her synne.

stylus

23He that hatith me, hatith also my fadir.

stylus

24If Y hadde not doon werkis in hem, whiche noon other man dide, thei schulden not haue synne; but now both thei han seyn, and hatid me and my fadir.

stylus

25But that the word be fulfillid, that is writun in her lawe, For thei hadden me in hate with outen cause.

stylus

26But whanne the coumfortour schal come, which Y schal sende to you fro the fadir, a spirit of treuthe, which cometh of the fadir, he schal bere witnessyng of me; and ye schulen bere witnessyng, for ye ben with me fro the bigynnyng.

stylus