1Wherfor thou art vnexcusable, ech man that demest, for in what thing thou demest anothir man, thou condempnest thi silf; for thou doist the same thingis whiche thou demest.

stylus

2And we witen, that the doom of God is aftir treuthe ayens hem, that don siche thingis.

stylus

3But gessist thou, man, that demest hem that doen siche thingis, and thou doist tho thingis, that thou schalt ascape the doom of God?

stylus

4Whether `dispisist thou the richessis of his goodnesse, and the pacience, and the long abidyng? Knowist thou not, that the benygnyte of God ledith thee to forthenkyng?

stylus

5But aftir thin hardnesse and vnrepentaunt herte, thou tresorist to thee wraththe in the dai of wraththe and of schewyng of the riytful doom of God,

stylus

6that schal yelde to ech man aftir his werkis;

stylus

7sotheli to hem that ben bi pacience of good werk, glorie, and onour, and vncorrupcioun, to hem that seken euerlastynge lijf;

stylus

8but to hem that ben of strijf, and that assenten not to treuthe, but bileuen to wickidnesse, wraththe and indignacioun, tribulacioun and angwisch,

stylus

9in to ech soule of man that worchith yuel, to the Jew first, and to the Greke;

stylus

10but glorie, and honour, and pees, to ech man that worchith good thing, to the Jew first, and to the Greke.

stylus

11For accepcioun of persones is not anentis God.

stylus

12For who euere han synned without the lawe, schulen perische withouten the lawe; and who euere han synned in the lawe, thei schulen be demyd bi the lawe.

stylus

13For the hereris of lawe ben not iust anentis God, but the doeris of the lawe schulen be maad iust.

stylus

14For whanne hethene men that han not lawe, don kyndli tho thingis that ben of the lawe, thei not hauynge suche manere lawe, ben lawe to hem silf,

stylus

15that schewen the werk of the lawe writun in her hertis. For the conscience of hem yeldith to hem a witnessyng bytwixe hem silf of thouytis that ben accusynge or defendynge,

stylus

16in the dai whanne God schal deme the priuy thingis of men aftir my gospel, bi Jhesu Crist.

stylus

17But if thou art named a Jew, and restist in the lawe, and hast glorie in God,

stylus

18and hast knowe his wille, and thou lerud bi lawe preuest the more profitable thingis,

stylus

19and tristist thi silf to be a ledere of blynde men, the liyt of hem that ben in derknessis,

stylus

20a techere of vnwise men, a maistir of yonge children, that hast the foorme of kunnyng and of treuthe in the lawe;

stylus

21what thanne techist thou another, and techist not thi silf? Thou that prechist that me schal not stele, stelist?

stylus

22Thou that techist that me schal `do no letcherie, doist letcherie? Thou that wlatist maumetis, doist sacrilegie?

stylus

23Thou that hast glorie in the lawe, vnworschipist God bi brekyng of the lawe?

stylus

24For the name of God is blasfemed bi you among hethene men, as is writun.

stylus

25For circumcisioun profitith, if thou kepe the lawe; but if thou be a trespassour ayens the lawe, thi circumsicioun is maad prepucie.

stylus

26Therfor if prepucie kepe the riytwisnessis of the lawe, whethir his prepucie schal not be arettid in to circumcisioun?

stylus

27And the prepucie of kynde that fulfillith the lawe, schal deme thee, that bi lettre and circumcisioun art trespassour ayens the lawe.

stylus

28For he that is in opene is not a Jew, nether it is circumsicioun that is openli in the fleisch;

stylus

29but he that is a Jew in hid, and the circumcisioun of herte, in spirit, not bi the lettre, whos preisyng is not of men, but of God.

stylus