1What thanne is more to a Jew, or what profit of circumcisioun?

stylus

2Myche bi al wise; first, for the spekyngis of God `weren bitakun to hem.

stylus

3And what if summe of hem bileueden not? Whethir the vnbileue of hem hath auoidid the feith of God?

stylus

4God forbede. For God is sothefast, but ech man a liere; as it is writun, That thou be iustified in thi wordis, and ouercome, whanne thou art demed.

stylus

5But if oure wickidnesse comende the riytwisnesse of God, what shulen we seie? Whether God is wickid, that bryngith in wraththe?

stylus

6Aftir man Y seie. God forbede. Ellis hou schal God deme this world?

stylus

7For if the treuthe of God hath aboundid in my lessyng, in to the glorie of hym, what yit am Y demed as a synner?

stylus

8And not as we ben blasfemed, and as summen seien that we seien, Do we yuele thingis, that gode thingis come. Whos dampnacioun is iust.

stylus

9What thanne? Passen we hem? Nay; for we han schewid bi skile, that alle bothe Jewis and Grekis ben vndur synne,

stylus

10as it is writun, For ther is no man iust;

stylus

11ther is no man vndurstondynge, nethir sekynge God.

stylus

12Alle bowiden a wey, togidere thei ben maad vnprofitable; ther is noon that doith good thing, there is noon `til to oon.

stylus

13The throte of hem is an opyn sepulcre; with her tungis thei diden gilefuli; the venym of snakis is vndur her lippis.

stylus

14The mouth of whiche is ful of cursyng and bitternesse;

stylus

15the feet of hem ben swifte to schede blood.

stylus

16Sorewe and cursidnesse ben in the weies of hem,

stylus

17and thei knewen not the weie of pees;

stylus

18the drede of God is not bifor her iyen.

stylus

19And we witen, that what euere thingis the lawe spekith, it spekith to hem that ben in the lawe, that ech mouth be stoppid, and ech world be maad suget to God.

stylus

20For of the werkis of the lawe ech fleisch schal not be iustified bifor hym; for bi the lawe ther is knowyng of synne.

stylus

21But now with outen the lawe the riytwisnesse of God is schewid, that is witnessid of the lawe and the profetis.

stylus

22And the riytwisnesse of God is bi the feith of Jhesu Crist in to alle men and on alle men that bileuen in hym; for ther is no departyng.

stylus

23For alle men synneden, and han nede to the glorie of God;

stylus

24and ben iustified freli bi his grace, bi the ayenbiyng that is in `Crist Jhesu.

stylus

25Whom God ordeynede foryyuer, bi feith in his blood, to the schewyng of his riytwisnesse, for remyssioun of biforgoynge synnes,

stylus

26in the beryng up of God, to the schewyng of his riytwisnesse in this tyme, that he be iust, and iustifyynge hym that is of the feith of Jhesu Crist.

stylus

27Where thanne is thi gloriyng? It is excludid. Bi what lawe? Of dedis doyng? Nay, but by the lawe of feith.

stylus

28For we demen a man to be iustified bi the feith, with outen werkis of the lawe.

stylus

29Whethir of Jewis is God oneli? Whether he is not also of hethene men? Yhis, and of hethene men.

stylus

30For `oon God is, that iustefieth circumcisioun bi feith, and prepucie bi feith.

stylus

31Distruye we therfor the lawe bi the feith? God forbede; but we stablischen the lawe.

stylus