1And whanne Jhesus cam nyy to Jerusalem and to Betanye, to the mount of Olyues, he sendith tweyne of hise disciplis, and seith to hem,

stylus

2Go ye in to the castel that is ayens you; and anoon as ye entren there ye schulen fynde a colt tied, on which no man hath sete yit; vntie ye, and brynge hym.

stylus

3And if ony man seye ony thing to you, What doen ye? seie ye, that he is nedeful to the Lord, and anoon he schal leeue hym hidir.

stylus

4And thei yeden forth, and founden a colt tied bifor the yate with out forth, in the metyng of twei weies; and thei vntieden hym.

stylus

5And summe of hem that stoden there seiden to hem, What doen ye, vntiynge the colt?

stylus

6And thei seiden to hem, as Jhesus comaundide hem; and thei leften it to hem.

stylus

7And thei brouyten the colt to Jhesu, and thei leiden on hym her clothis, and Jhesus sat on hym.

stylus

8And many strewiden her clothis in the weie, othere men kittiden braunchis fro trees, and strewiden in the weie.

stylus

9And thei that wenten bifor, and that sueden, crieden, and seiden, Osanna,

stylus

10blissid is he that cometh in the name of the Lord; blessid be the kyngdom of oure fadir Dauid that is come; Osanna in hiyest thingis.

stylus

11And he entride in to Jerusalem, in to the temple; and whanne he `hadde seyn al thing aboute, whanne it was eue, he wente out in to Betanye, with the twelue.

stylus

12And anothir daye, whanne he wente out of Betanye, he hungride.

stylus

13And whanne he hadde seyn a fige tree afer hauynge leeues, he cam, if happili he schulde fynde ony thing theron; and whanne he cam to it, he foonde no thing, out takun leeues; for it was not tyme of figis.

stylus

14And Jhesus answeride and seide to it, Now neuer ete ony man fruyt of thee more. And hise disciplis herden;

stylus

15and thei camen to Jerusalem. And whanne he was entrid in to the temple, he bigan to caste out silleris and biggeris in the temple; and he turnede vpsodoun the bordis of chaungeris, and the chayeris of men that selden culueris;

stylus

16and he suffride not, that ony man schulde bere a vessel thorou the temple.

stylus

17And he tauyte hem, and seide, Whether it is not writun, That myn hous schal be clepid the hous of preyng to alle folkis? but ye han maad it a denne of theues.

stylus

18And whanne this thing was herd, the princis of prestis and scribis souyten hou thei schulden leese hym; for thei dredden hym, for al the puple wondride on his techyng.

stylus

19And whanne euenyng was come, he wente out of the citee.

stylus

20And as thei passiden forth eerli, thei sayn the fige tree maad drye fro the rootis.

stylus

21And Petir bithouyte hym, and seide to hym, Maister, lo! the fige tree, whom thou cursidist, is dried vp.

stylus

22And Jhesus answeride and seide to hem, Haue ye the feith of God;

stylus

23treuli Y seie to you, that who euer seith to this hil, Be thou takun, and cast in to the see; and doute not in his herte, but bileueth, that what euer he seie, schal be don, it schal be don to hym.

stylus

24Therfor Y seie to you, alle thingis what euer thingis ye preynge schulen axe, bileue ye that ye schulen take, and thei schulen come to you.

stylus

25And whanne ye schulen stonde to preye, foryyue ye, if ye han ony thing ayens ony man, that youre fadir that is in heuenes, foryyue to you youre synnes.

stylus

26And if ye foryyuen not, nether youre fadir that is in heuenes, schal foryyue to you youre synnes.

stylus

27And eftsoone thei camen to Jerusalem. And whanne he walkide in the temple, the hiyeste prestis, and scribis, and the elder men camen to hym,

stylus

28and seyn to hym, In what power doist thou these thingis? or who yaf to thee this power, that thou do these thingis?

stylus

29Jhesus answeride and seide to hem, And Y schal axe you o word, and answere ye to me, and Y schal seie to you in what power Y do these thingis.

stylus

30Whether was the baptym of Joon of heuene, or of men? answere ye to me.

stylus

31And thei thouyten with ynne hem silf, seiynge, If we seien of heuene, he schal seie to vs, Whi thanne bileuen ye not to him;

stylus

32if we seien of men, we dreden the puple; for alle men hadden Joon, that he was verili a prophete.

stylus

33And thei answeryden, and seien to Jhesu, We witen neuer. And Jhesu answerde, and seide to hem, Nether Y seie to you, in what power Y do these thingis.

stylus