1But in o dai of the woke ful eerli thei camen to the graue, and brouyten swete smellynge spices, that thei hadden arayed.

stylus

2And thei founden the stoon turned awei fro the graue.

stylus

3And thei yeden in, and founden not the bodi of the Lord Jhesu.

stylus

4And it was don, the while thei weren astonyed in thouyt of this thing, lo! twei men stoden bisidis hem in schynynge cloth.

stylus

5And whanne thei dredden, and boweden her semblaunt in to the erthe, thei seiden to hem, What seken ye hym that lyueth with deed men?

stylus

6He is not here, but is risun. Haue ye mynde, hou he spak to you, whanne he was yit in Galile,

stylus

7and seide, For it bihoueth mannys sone to be bitakun in to the hondis of synful men, and to be crucified, and the thridde dai to rise ayen.

stylus

8And thei bithouyten on hise wordis.

stylus

9And thei yeden ayen fro the graue, and telden alle these thingis to the enleuene, and to alle othir.

stylus

10And ther was Marie Mawdeleyn, and Joone, and Marie of James, and other wymmen that weren with hem, that seiden to apostlis these thingis.

stylus

11And these wordis weren seyn bifor hem as madnesse, and thei bileueden not to hem.

stylus

12But Petir roos vp, and ran to the graue; and he bowide doun, and say the lynen clothis liynge aloone. And he wente bi him silf, wondrynge on that that was don.

stylus

13And lo! tweyne of hem wenten in that dai in to a castel, that was fro Jerusalem the space of sixti furlongis, bi name Emaws.

stylus

14And thei spaken togidir of alle these thingis that haddun bifallun.

stylus

15And it was don, the while thei talkiden, and souyten bi hem silf, Jhesus hym silf neiyede, and wente with hem.

stylus

16But her iyen weren holdun, that thei knewen him not.

stylus

17And he seide to hem, What ben these wordis, that ye speken togidir wandrynge, and ye ben sorewful?

stylus

18And oon, whos name was Cleofas, answerde, and seide, Thou thi silf art a pilgrym in Jerusalem, and hast thou not knowun, what thingis ben don in it in these daies?

stylus

19To whom he seide, What thingis? And thei seiden to hym, Of Jhesu of Nazareth, that was a man prophete, myyti in werk and word bifor God and al the puple;

stylus

20and hou the heiyest preestis of oure princis bitoken hym in to dampnacioun of deeth, and crucifieden hym.

stylus

21But we hopiden, that he schulde haue ayenbouyt Israel. And now on alle these thingis the thridde dai is to dai, that these thingis weren don.

stylus

22But also summe wymmen of ouris maden vs afered, whiche bifor dai weren at the graue; and whanne his bodi was not foundun,

stylus

23thei camen, and seiden, that thei syen also a siyt of aungels, whiche seien, that he lyueth.

stylus

24And summe of oure wenten to the graue, and thei founden so as the wymmen seiden, but thei founden not hym.

stylus

25And he seide to hem, A! foolis, and slowe of herte to bileue in alle thingis that the prophetis han spokun.

stylus

26Whethir it bihofte not Crist to suffre these thingis, and so to entre in to his glorie?

stylus

27And he bigan at Moises and at alle the prophetis, and declaride to hem in alle scripturis, that weren of hym.

stylus

28And thei camen nyy the castel, whidur thei wenten. And he made countenaunce that he wolde go ferthere.

stylus

29And thei constreyneden hym, and seiden, Dwelle with vs, for it drawith to nyyt, and the dai is now bowid doun.

stylus

30And he entride with hem. And it was don, while he sat at the mete with hem, he took breed, and blesside, and brak, and took to hem.

stylus

31And the iyen of hem weren openyd, and thei knewen hym; and he vanyschide fro her iyen.

stylus

32And thei seiden togidir, Whether oure herte was not brennynge in vs, while he spak in the weie, and openyde to vs scripturis?

stylus

33And thei risen vp in the same our, and wenten ayen in to Jerusalem, and founden the enleuene gaderid togidir, and hem that weren with hem,

stylus

34seiynge, That the Lord is risun verrili, and apperide to Symount.

stylus

35And thei tolden what thingis weren don in the weie, and hou thei knewen hym in brekyng of breed.

stylus

36And the while thei spaken these thingis, Jhesus stood in the myddil of hem, and seide to hem, Pees to you; Y am, nyle ye drede.

stylus

37But thei weren affraied and agast, and gessiden hem to se a spirit.

stylus

38And he seide to hem, What ben ye troblid, and thouytis comen vp in to youre hertis?

stylus

39Se ye my hoondis and my feet, for Y my silf am. Fele ye, and se ye; for a spirit hath not fleisch and boonys, as ye seen that Y haue.

stylus

40And whanne he hadde seid this thing, he schewide hoondis and feet to hem.

stylus

41And yit while thei bileueden not, and wondriden for ioye, he seide, Han ye here ony thing that schal be etun?

stylus

42And thei proferden hym a part of a fisch rostid, and an hony combe.

stylus

43And whanne he hadde etun bifore hem, he took that that lefte, and yaf to hem;

stylus

44and seide `to hem, These ben the wordis that Y spak to you, whanne Y was yit with you; for it is nede that alle thingis ben fulfillid, that ben writun in the lawe of Moises, and in prophetis, and in salmes, of me.

stylus

45Thanne he openyde to hem wit, that thei schulden vnderstonde scripturis.

stylus

46And he seide to hem, For thus it is writun, and thus it bihofte Crist to suffre, and ryse ayen fro deeth in the thridde dai;

stylus

47and penaunce and remyssioun of synnes to be prechid in his name `in to alle folkis, bigynnynge at Jerusalem.

stylus

48And ye ben witnessis of these thingis.

stylus

49And Y schal sende the biheest of my fadir in to you; but sitte ye in the citee, til that ye be clothid with vertu from an hiy.

stylus

50And he ledde hem forth in to Betanye, and whanne his hondis weren lift vp, he blesside hem.

stylus

51And it was don, the while he blesside hem, he departide fro hem, and was borun in to heuene.

stylus

52And thei worschipiden, and wenten ayen in to Jerusalem with greet ioye,

stylus

53and weren euermore in the temple, heriynge and blessynge God.

stylus