1But it bifelde at Yconye, that thei entriden togidir in to the synagoge of Jewis, and spaken, so that ful greet multitude of Jewis and Grekis bileueden.

stylus

2But the Jewis that weren vnbileueful, reiseden persecucioun, and stiriden to wraththe the soulis of hethene men ayens the britheren; but the Lord yaf soone pees.

stylus

3Therfor thei dwelliden myche tyme, and diden tristili in the Lord, berynge witnessyng to the word of his grace, yyuynge signes and wondris to be maad bi the hondis of hem.

stylus

4But the multitude of the citee was departid, and sum weren with the Jewis, and sum with the apostlis.

stylus

5But whanne ther was maad `an asaute of the hethene men and the Jewis, with her princis, to turmenten and to stonen hem,

stylus

6thei vndurstoden, and fledden togidere to the citees of Licaonye, and Listris, and Derben, and into al the cuntre aboute. And thei prechiden there the gospel, and al the multitude was moued togider in the teching of hem. Poul and Barnabas dwelten at Listris.

stylus

7And a man at Listris was sijk in the feet, and hadde sete crokid fro his modris wombe, which neuer hadde goen.

stylus

8This herde Poul spekinge; and Poul biheld hym, and siy that he hadde feith, that he schulde be maad saaf,

stylus

9and seide with a greet vois, Rise thou `vp riyt on thi feet. And he lippide, and walkide.

stylus

10And the puple, whanne thei hadde seyn that that Poul dide, reriden her vois in Licaon tunge, and seiden, Goddis maad lijk to men ben comun doun to vs.

stylus

11And thei clepiden Barnabas Jubiter, and Poul Mercurie, for he was ledere of the word.

stylus

12And the preest of Jubiter that was bifor the citee, brouyte boolis and crownes bifor the yatis, with puplis, and wolde haue maad sacrifice.

stylus

13And whanne the apostlis Barnabas and Poul herden this, thei to-renten her cootis; and thei skipten out among the puple,

stylus

14and crieden, and seiden, Men, what don ye this thing? and we ben deedli men lijk you, and schewen to you, that ye be conuertid fro these veyn thingis to the lyuynge God, that maad heuene, and erthe, and the see, and alle thingis that ben in hem;

stylus

15which in generaciouns passid suffride alle folkis to gon in to her owne weies.

stylus

16And yit he lefte not hym silf with out witnessing in wel doyng, for he yaf reyns fro heuene, and times beringe fruyt, and fulfillide youre hertis with meete and gladnesse.

stylus

17And thei seiynge these thingis, vnnethis swagiden the puple, that thei offriden not to hem.

stylus

18But sum Jewis camen ouer fro Antioche and Iconye, and counseilden the puple, and stonyden Poul, and drowen out of the citee, and gessiden that he was deed.

stylus

19But whanne disciplis weren comun aboute him, he roos, and wente in to the citee; and in the dai suynge he wente forth with Barnabas in to Derben.

stylus

20And whanne thei hadden prechid to the ilk citee, and tauyte manye, thei turneden ayen to Listris, and Iconye, and to Antioche; confermynge the soulis of disciplis,

stylus

21and monestinge, that thei schulden dwelle in feith, and seiden, That bi many tribulaciouns it bihoueth vs to entre in to the kingdom of heuenes.

stylus

22And whanne thei hadden ordeined prestis to hem bi alle citees, and hadden preied with fastyngis, thei bitoken hem to the Lord, in whom thei bileueden.

stylus

23And thei passiden Persidie, and camen to Pamfilie;

stylus

24and thei spaken the word `of the Lord in Pergen, and camen doun in to Italie.

stylus

25And fro thennys thei wenten bi boot to Antiochie, fro whennus thei weren takun to the grace of God, in to the werk that thei filliden.

stylus

26And whanne thei weren comun, and hadden gaderid the chirche, thei telden hou grete thingis God dide with hem, and that he hadde openyde to hethene men the dore of feith.

stylus

27And thei dwelliden not a litil tyme with the disciplis.

stylus