1Takith hede, that ye do not youre riytwisnesse bifor men, to be seyn of hem, ellis ye schulen haue no meede at youre fadir that is in heuenes.

stylus

2Therfore whanne thou doist almes, nyle thou trumpe tofore thee, as ypocritis doon in synagogis and stretis, that thei be worschipid of men; sotheli Y seie to you, they han resseyued her meede.

stylus

3But whanne thou doist almes, knowe not thi left hond what thi riyt hond doith, that thin almes be in hidils,

stylus

4and thi fadir that seeth in hiddils, schal quyte thee.

stylus

5And whanne ye preyen, ye schulen not be as ipocritis, that louen to preye stondynge in synagogis and corneris of stretis, to be seyn of men; treuli Y seie to you, thei han resseyued her meede.

stylus

6But whanne thou schalt preye, entre in to thi couche, and whanne the dore is schet, preye thi fadir in hidils, and thi fadir that seeth in hidils, schal yelde to thee.

stylus

7But in preiyng nyle yee speke myche, as hethene men doon, for thei gessen that thei ben herd in her myche speche.

stylus

8Therfor nyle ye be maad lich to hem, for your fadir woot what is nede to you, bifore that ye axen hym.

stylus

9And thus ye schulen preye, Oure fadir that art in heuenes, halewid be thi name;

stylus

10thi kyngdoom come to; be thi wille don `in erthe as in heuene;

stylus

11yyue to vs this dai oure `breed ouer othir substaunce;

stylus

12and foryyue to vs oure dettis, as we foryyuen to oure dettouris; and lede vs not in to temptacioun,

stylus

13but delyuere vs fro yuel.

stylus

14Amen. For if ye foryyuen to men her synnes, youre heuenli fadir schal foryyue to you youre trespassis.

stylus

15Sotheli if ye foryyuen not to men, nether youre fadir schal foryyue to you youre synnes.

stylus

16But whanne ye fasten, nyle ye be maad as ypocritis sorewful, for thei defacen hem silf, to seme fastyng to men; treuli Y seie to you, they han resseyued her meede.

stylus

17But whanne thou fastist, anoynte thin heed, and waische thi face,

stylus

18that thou be not seen fastynge to men, but to thi fadir that is in hidlis, and thi fadir that seeth in priuey, shal yelde to thee.

stylus

19Nile ye tresoure to you tresouris in erthe, where ruste and mouyte destrieth, and where theues deluen out and stelen;

stylus

20but gadere to you tresouris in heuene, where nether ruste ne mouyte distrieth, and where theues deluen not out, ne stelen.

stylus

21For where thi tresoure is, there also thin herte is.

stylus

22The lanterne of thi bodi is thin iye; if thin iye be symple, al thi bodi shal be liytful;

stylus

23but if thin iye be weiward, al thi bodi shal be derk. If thanne the liyt that is in thee be derknessis, how grete schulen thilk derknessis be?

stylus

24No man may serue tweyn lordis, for ethir he schal hate `the toon, and loue the tother; ethir he shal susteyne `the toon, and dispise the tothir. Ye moun not serue God and richessis.

stylus

25Therfor I seie to you, that ye be not bisi to youre lijf, what ye schulen ete; nether to youre bodi, with what ye schulen be clothid. Whether lijf is not more than meete, and the bodie more than cloth?

stylus

26Biholde ye the foulis of the eire, for thei sowen not, nethir repen, nethir gaderen in to bernes; and youre fadir of heuene fedith hem. Whether ye ben not more worthi than thei?

stylus

27But who of you thenkynge mai putte to his stature o cubit?

stylus

28And of clothing what ben ye bisye? Biholde ye the lilies of the feeld, how thei wexen. Thei trauelen not, nether spynnen;

stylus

29and Y seie to you, Salomon in al his glorie was not keuered as oon of these.

stylus

30And if God clothith thus the hei of the feeld, that to day is, and to morewe is cast in to an ouen, hou myche more you of litel feith?

stylus

31Therfor nyle ye be bisi, seiynge, What schulen we ete? or, What schulen we drinke? or, With what thing schulen we be keuered?

stylus

32For hethene men seken alle these thingis; and youre fadir woot, that ye han nede to alle these thingis.

stylus

33Therfor seke ye first the kyngdom of God, and his riytfulnesse, and alle these thingis shulen be cast to you.

stylus

34Therfor nyle ye be bisy in to the morew, for the morew shal be bisi to `hym silf; for it suffisith to the dai his owen malice.

stylus