1And the Farisees and the Saducees camen to hym temptynge, and preieden hym to schewe hem a tokene fro heuene.

stylus

2And he answeride, and seide to hem, Whanne the euentid is comun, ye seien, It schal be clere, for heuene is rodi;

stylus

3and the morewtid, To dai tempest, for heuene schyneth heueli.

stylus

4Thanne ye kunne deme the face of heuene, but ye moun not wite the tokenes of tymes. An yuel generacioun and auoutresse sekith a tokene; and a tokene schal not be youun to it, but the tokene of Jonas, the profete. And whanne he hadde left hem, he wente forth.

stylus

5And whanne his disciplis camen ouer the see, thei foryaten to take looues.

stylus

6And he seide to hem, Biholde ye, and be war of the soure dowy of Farisees and Saducees.

stylus

7And thei thouyten among hem, and seiden, For we han not take looues.

stylus

8But Jhesus witynge seide to hem, What thenken ye among you of litel feith, for ye han not looues?

stylus

9Yit `vndurstonden not ye, nether han mynde of fyue looues in to fyue thousynde of men, and hou many cofyns ye token?

stylus

10nether of seuene looues in to foure thousynde of men, and hou many lepis ye token?

stylus

11Whi vndurstonden ye not, for Y seide not to you of breed, Be ye war of the sourdowy of Farisees and of Saducees?

stylus

12Thanne thei vndurstooden, that he seide not to be war of sourdowy of looues, but of the techyng of Farisees and Saducees.

stylus

13And Jhesus cam in to the parties of Cesarie of Filip, and axide hise disciplis, and seide, Whom seien men to be mannus sone?

stylus

14And thei seiden, Summe Joon Baptist; othere Elie; and othere Jeremye, or oon of the prophetis.

stylus

15Jhesus seide to hem, But whom seien ye me to be?

stylus

16Symount Petre answeride, and seide, Thou art Crist, the sone of God lyuynge.

stylus

17Jhesus answeride, and seide to him, Blessid art thou, Symount Bariona; for fleisch and blood schewide not to thee, but my fadir that is in heuenes.

stylus

18And Y seie to thee, that thou art Petre, and on this stoon Y schal bilde my chirche, and the yatis of helle schulen not haue miyt ayens it.

stylus

19And to thee Y shal yyue the keies of the kingdom of heuenes; and what euer thou shalt bynde on erthe, schal be boundun also in heuenes; and what euer thou schalt vnbynde on erthe, schal be vnbounden also in heuenes.

stylus

20Thanne he comaundide to hise disciplis, that thei schulden seie to no man, that he was Crist.

stylus

21Fro that tyme Jhesus bigan to schewe to hise disciplis, that it bihofte hym go to Jerusalem, and suffre many thingis, of the eldere men, and of scribis, and princis of prestis; and be slayn, and the thridde dai to rise ayen.

stylus

22And Petre took hym, and bigan to blame him, and seide, Fer be it fro thee, Lord; this thing schal not be to thee.

stylus

23And he turnede, and seide to Petre, Sathanas, go after me; thou art a sclaundre to me; for thou sauerist not tho thingis that ben of God, but tho thingis that ben of men.

stylus

24Thanne Jhesus seide to his disciplis, If ony man wole come after me, denye he hym silf, and take his cros, and sue me; for he that wole make his lijf saaf,

stylus

25shal leese it; and he that schal leese his lijf for me, schal fynde it.

stylus

26For what profitith it to a man, if he wynne al the world, and suffre peiryng of his soule? or what chaunging schal a man yyue for his soule?

stylus

27For mannes sone schal come in glorie of his fader, with his aungels, and thanne he schal yelde to ech man after his werkis.

stylus

28Treuli Y seie to you, `ther ben summe of hem that stonden here, whiche schulen not taste deth, til thei seen mannus sone comynge in his kyngdom.

stylus