1Be ye my foleweris, as Y am of Crist.

stylus

2And, britheren, Y preise you, that bi alle thingis ye ben myndeful of me; and as Y bitook to you my comaundementis, ye holden.

stylus

3But Y wole that ye wite, that Crist is heed of ech man; but the heed of the womman is the man; and the heed of Crist is God.

stylus

4Ech man preiynge, or profeciynge, whanne his heed is hilid, defoulith his heed.

stylus

5But ech womman preiynge, or profeciynge, whanne hir heed is not hilid, defoulith hir heed; for it is oon, as if sche were pollid.

stylus

6And if a womman be not keuered, be sche pollid; and if it is foul thing to a womman to be pollid, or to be maad ballid, hile sche hir heed.

stylus

7But a man schal not hile his heed, for he is the ymage and the glorie of God; but a womman is the glorie of man.

stylus

8For a man is not of the womman, but the womman of the man.

stylus

9And the man is not maad for the womman, but the womman for the man.

stylus

10Therfor the womman schal haue an hilyng on hir heed, also for aungelis.

stylus

11Netheles nether the man is with outen womman, nether the womman is with oute man, in the Lord.

stylus

12Forwhi as the womman is of man, so the man is bi the womman; but alle thingis ben of God.

stylus

13Deme ye you silf; bisemeth it a womman not hilid on the heed to preye God?

stylus

14Nether the kynde it silf techith vs, for if a man nursche longe heer, it is schenschipe to hym;

stylus

15but if a womman nurische longe heer, it is glorie to hir, for heeris ben youun to hir for keueryng.

stylus

16But if ony man is seyn to be ful of strijf, we han noon siche custom, nethir the chirche of God.

stylus

17But this thing Y comaunde, not preisynge, that ye comen togidere not in to the betere, but in to the worse.

stylus

18First for whanne ye comen togidere in to the chirche, Y here that discenciouns ben, and in parti Y bileue.

stylus

19For it bihoueth eresies to be, that thei that ben prouyd, ben opynli knowun in you.

stylus

20Therfor whanne ye comen togidere in to oon, now it is not to ete the Lordis soper;

stylus

21for whi ech man bifor takith his soper to ete, and oon is hungry, and another is drunkun.

stylus

22Whether ye han not housis to ete and drynke, or ye dispisen the chirche of God, and confounden hem that han noon? What schal Y seie to you? Y preise you, but here yn Y preise you not.

stylus

23For Y haue takun of the Lord that thing, which Y haue bitakun to you. For the Lord Jhesu, in what niyt he was bitraied,

stylus

24took breed, and dide thankyngis, and brak, and seide, Take ye, and ete ye; this is my bodi, which schal be bitraied for you; do ye this thing in to my mynde.

stylus

25Also the cuppe, aftir that he hadde soupid, and seide, This cuppe is the newe testament in my blood; do ye this thing, as ofte as ye schulen drynke, in to my mynde.

stylus

26For as ofte as ye schulen ete this breed, and schulen drynke the cuppe, ye schulen telle the deth of the Lord, til that he come.

stylus

27Therfor who euere etith the breed, or drynkith the cuppe of the Lord vnworthili, he schal be gilti of the bodi and of the blood of the Lord.

stylus

28But preue a man hym silf, and so ete he of `the ilke breed, and drynke of the cuppe.

stylus

29For he that etith and drinkith vnworthili, etith and drinkith doom to hym, not wiseli demyng the bodi of the Lord.

stylus

30Therfor among you many ben sijke and feble, and manye slepen.

stylus

31And if we demyden wiseli vs silf, we schulden not be demyd;

stylus

32but while we ben demyd of the Lord, we ben chastisid, that we be not dampnyd with this world.

stylus

33Therfor, my britheren, whanne ye comen togidere to ete, abide ye togidere.

stylus

34If ony man hungrith, ete he at home, that ye come not togidere in to doom. And Y schal dispose othere thingis, whanne Y come.

stylus