1Forsothe the Lord answeride to Joob fro the whirlewynd,

stylus

2and seide, Girde thou as a man thi leendis, and Y schal axe thee, and schewe thou to me.

stylus

3Whether thou schalt make voide my doom, and schalt condempne me, that thou be maad iust?

stylus

4And if thou hast an arm, as God hath, and if thou thundrist with lijk vois, `take thou fairnesse aboute thee,

stylus

5and be thou reisid an hiy, and be thou gloriouse, and be thou clothid `in faire clothis.

stylus

6Distrie thou proude men in thi woodnesse, and biholde thou, and make lowe ech bostere.

stylus

7Biholde thou alle proude men, and schende thou hem; and al to-breke thou wickid men in her place.

stylus

8Hide thou hem in dust togidere, and drenche doun her faces in to a diche.

stylus

9And Y schal knowleche, that thi riyt hond may saue thee.

stylus

10Lo! behemot, whom Y made with thee, schal as an oxe ete hey.

stylus

11His strengthe is in hise leendis, and his vertu is in the nawle of his wombe.

stylus

12He streyneth his tail as a cedre; the senewis of his `stones of gendrure ben foldid togidere.

stylus

13Hise boonys ben as the pipis of bras; the gristil of hym is as platis of yrun.

stylus

14He is the bigynnyng of the weies of God; he, that made hym, schal sette his swerd to hym.

stylus

15Hillis beren eerbis to this behemot; alle the beestis of the feeld pleien there.

stylus

16He slepith vndur schadewe, in the pryuete of rehed, in moiste places.

stylus

17Schadewis hilen his schadewe; the salewis of the ryuer cumpassen hym.

stylus

18He schal soupe vp the flood, and he schal not wondre; he hath trist, that Jordan schal flowe in to his mouth.

stylus

19He schal take hem bi `the iyen of hym, as bi an hook; and bi scharpe schaftis he schal perse hise nosethirlis.

stylus

20Whether thou schalt mowe drawe out leuyathan with an hook, and schalt bynde with a roop his tunge?

stylus

21Whethir thou schalt putte a ryng in hise nosethirlis, ethir schalt perse hyse cheke with `an hook?

stylus

22Whether he schal multiplie preieris to thee, ether schal speke softe thingis to thee?

stylus

23Whether he schal make couenaunt with thee, and `thou schalt take him a seruaunt euerlastinge?

stylus

24Whether thou schalt scorne hym as a brid, ethir schalt bynde hym to thin handmaidis?

stylus

25Schulen frendis `kerue hym, schulen marchauntis departe hym?

stylus

26Whether thou schalt fille nettis with his skyn, and a `leep of fischis with his heed?

stylus

27Schalt thou putte thin hond on hym? haue thou mynde of the batel, and adde no more to speke.

stylus

28Lo! his hope schal disseyue hym; and in the siyt of alle men he schal be cast doun.

stylus