1Lo! myn iye siy alle thingis, and myn eere herde; and Y vndurstood alle thingis.

stylus

2Euene with youre kunnyng also Y kan, and Y am not lowere than ye.

stylus

3But netheles Y schal speke to Almyyti God, and Y coueite to dispute with God;

stylus

4and firste Y schewe you makeris of leesyng, and louyeris of weyward techyngis.

stylus

5And `Y wolde that ye weren stille, that ye weren gessid to be wise men.

stylus

6Therfor here ye my chastisyngis; and perseyue ye the doom of my lippis.

stylus

7Whether God hath nede to youre leesyng, that ye speke gilis for hym?

stylus

8Whether ye taken his face, and enforsen to deme for God?

stylus

9Ethir it schal plese hym, fro whom no thing mai be hid? Whether he as a man schal be disseyued with youre falsnessis?

stylus

10He schal repreue you; for ye taken his face in hiddlis.

stylus

11Anoon as he schal stire hym, he schal disturble you; and his drede schal falle on you.

stylus

12Youre mynde schal be comparisound to aische; and youre nollis schulen be dryuun in to clei.

stylus

13Be ye stille a litil, that Y speke, what euer thing the mynde hath schewid to me.

stylus

14Whi to-rende Y my fleischis with my teeth, and bere my lijf in myn hondis?

stylus

15Yhe, thouy God sleeth me, Y schal hope in hym; netheles Y schal preue my weies in his siyt.

stylus

16And he schal be my sauyour; for whi ech ypocrite schal not come in his siyt.

stylus

17Here ye my word, and perseyue ye with eeris derke and harde figuratif spechis.

stylus

18Yf Y schal be demed, Y woot that Y schal be foundun iust.

stylus

19Who is he that is demed with me? Come he; whi am Y stille, and am wastid?

stylus

20Do thou not to me twei thingis oneli; and thanne Y schal not be hid fro thi face.

stylus

21Make thin hond fer fro me; and thi drede make not me aferd.

stylus

22Clepe thou me, and Y schal answere thee; ethir certis Y schal speke, and thou schalt answere me.

stylus

23Hou grete synnes and wickidnessis haue Y? Schewe thou to me my felonyes, and trespassis.

stylus

24Whi hidist thou thi face, and demest me thin enemy?

stylus

25Thou schewist thi myyt ayens a leef, which is rauyschid with the wynd; and thou pursuest drye stobil.

stylus

26For thou writist bitternessis ayens me; and wolt waste me with the synnes of my yong wexynge age.

stylus

27Thou hast set my foot in a stok, and thou hast kept alle my pathis; and thou hast biholde the steppis of my feet.

stylus

28And Y schal be wastid as rot, and as a cloth, which is etun of a mouyte.

stylus