1Sotheli Joob answeride, and seide,

stylus

2Therfor ben ye men aloone, that wisdom dwelle with you?

stylus

3And to me is an herte, as and to you, and Y am not lowere than ye; for who knowith not these thingis, whiche ye knowen?

stylus

4He that is scorned of his frend, as Y am, schal inwardli clepe God, and God schal here hym; for the symplenesse of a iust man is scorned.

stylus

5A laumpe is dispisid at the thouytis of riche men, and the laumpe is maad redi to a tyme ordeyned.

stylus

6The tabernaclis of robberis ben plenteuouse, `ether ful of goodis; and boldli thei terren God to wraththe, whanne he hath youe alle thingis in to her hondis.

stylus

7No wondur, ax thou beestis, and tho schulen teche thee; and axe thou volatilis of the eir, and tho schulen schewe to thee.

stylus

8Speke thou to the erthe, and it schal answere thee; and the fischis of the see schulen telle tho thingis.

stylus

9Who knowith not that the hond of the Lord made alle these thingis?

stylus

10In whos hond the soule is of ech lyuynge thing, and the spirit, `that is, resonable soule, of ech fleisch of man.

stylus

11Whether the eere demeth not wordis, and the chekis of the etere demen sauour?

stylus

12Wisdom is in elde men, and prudence is in myche tyme.

stylus

13Wisdom and strengthe is at God; he hath counsel and vndurstondyng.

stylus

14If he distrieth, no man is that bildith; if he schittith in a man, `noon is that openith.

stylus

15If he holdith togidere watris, alle thingis schulen be maad drie; if he sendith out tho watris, tho schulen distrie the erthe.

stylus

16Strengthe and wisdom is at God; he knowith bothe hym that disseyueth and hym that is disseyued.

stylus

17And he bryngith conselours in to a fonned eende, and iugis in to wondryng, ethir astonying.

stylus

18He vnbindith the girdil of kyngis, and girdith her reynes with a coorde.

stylus

19He ledith her prestis with out glorie, and he disseyueth the principal men, `ethir counselours;

stylus

20and he chaungith the lippis of sothefast men, and takith awei the doctrine of elde men.

stylus

21He schedith out dispisyng on princes, and releeueth hem, that weren oppressid.

stylus

22Which schewith depe thingis fro derknessis; and bryngith forth in to liyt the schadewe of deeth.

stylus

23Which multiplieth folkis, and leesith hem, and restorith hem destried in to the hool.

stylus

24Which chaungith the herte of princes of the puple of erthe; and disseyueth hem, that thei go in veyn out of the weie.

stylus

25Thei schulen grope, as in derknessis, and not in liyt; and he schal make hem to erre as drunken men.

stylus