1A man is borun of a womman, and lyueth schort tyme, and is fillid with many wretchidnessis.

stylus

2Which goith out, and is defoulid as a flour; and fleeth as schadewe, and dwellith neuere perfitli in the same staat.

stylus

3And gessist thou it worthi to opene thin iyen on siche a man; and to brynge hym in to doom with thee?

stylus

4Who may make a man clene conseyued of vnclene seed? Whether not thou, which art aloone?

stylus

5The daies of man ben schorte, the noumbre of his monethis is at thee; thou hast set, ethir ordeyned, hise termes, whiche moun not be passid.

stylus

6Therfor go thou awey fro hym a litil, `that is, bi withdrawyng of bodili lijf, that he haue reste; til the meede coueitid come, and his dai is as the dai of an hirid man.

stylus

7A tree hath hope, if it is kit doun; and eft it wexith greene, and hise braunches spreden forth.

stylus

8If the roote therof is eeld in the erthe, and the stok therof is nyy deed in dust;

stylus

9it schal buriowne at the odour of watir, and it schal make heer, as whanne it was plauntid first.

stylus

10But whanne a man is deed, and maad nakid, and wastid; Y preye, where is he?

stylus

11As if watris goen awei fro the see, and a ryuer maad voide wexe drie,

stylus

12so a man, whanne he hath slept, `that is, deed, he schal not rise ayen, til heuene be brokun, `that is, be maad newe; he schal not wake, nether he schal ryse togidere fro his sleep.

stylus

13Who yiueth this to me, that thou defende me in helle, and that thou hide me, til thi greet veniaunce passe; and thou sette to me a tyme, in which thou haue mynde on me?

stylus

14Gessist thou, whethir a deed man schal lyue ayen? In alle the daies, in whiche Y holde knyythod, now Y abide, til my chaungyng come.

stylus

15Thou schalt clepe me, and Y schal answere thee; thou schalt dresse the riyt half, `that is, blis, to the werk of thin hondis.

stylus

16Sotheli thou hast noumbrid my steppis; but spare thou my synnes.

stylus

17Thou hast seelid as in a bagge my trespassis, but thou hast curid my wickidnesse.

stylus

18An hil fallynge droppith doun; and a rooche of stoon is borun ouer fro his place.

stylus

19Watris maken stoonys holowe, and the erthe is wastid litil and litil bi waischyng a wey of watir; and therfor thou schalt leese men in lijk maner.

stylus

20Thou madist a man strong a litil, that he schulde passe with outen ende; thou schalt chaunge his face, and schalt sende hym out.

stylus

21Whether hise sones ben noble, ether vnnoble, he schal not vndurstonde.

stylus

22Netheles his fleisch, while he lyueth, schal haue sorewe, and his soule schal morne on hym silf.

stylus