Iob 36 Comparatio: Vulgate vs Clementine Vulgate

Iob 36

¹addens quoque Heliu haec locutus est

²sustine me paululum et indicabo tibi adhuc enim habeo quod pro Deo loquar

³repetam scientiam meam a principio et operatorem meum probabo iustum

⁴vere enim absque mendacio sermones mei et perfecta scientia probabitur tibi

⁵Deus potentes non abicit cum et ipse sit potens

⁶sed non salvat impios et iudicium pauperibus tribuit

⁷non aufert a iusto oculos suos et reges in solio conlocat in perpetuum et illi eriguntur

⁸et si fuerint in catenis et vinciantur funibus paupertatis

⁹indicabit eis opera eorum et scelera eorum quia violenti fuerint

¹⁰revelabit quoque aurem eorum ut corripiat et loquetur ut revertantur ab iniquitate

¹¹si audierint et observaverint conplebunt dies suos in bono et annos suos in gloria

¹²si autem non audierint transibunt per gladium et consumentur in stultitia

¹³simulatores et callidi provocant iram Dei neque clamabunt cum vincti fuerint

¹⁴morietur in tempestate anima eorum et vita eorum inter effeminatos

¹⁵eripiet pauperem de angustia sua et revelabit in tribulatione aurem eius

¹⁶igitur salvabit te de ore angusto latissime et non habentis fundamentum subter se requies autem mensae tuae erit plena pinguedine

¹⁷causa tua quasi impii iudicata est causam iudiciumque recipies

¹⁸non te ergo superet ira ut aliquem opprimas nec multitudo donorum inclinet te

¹⁹depone magnitudinem tuam absque tribulatione et omnes robustos fortitudine

²⁰ne protrahas noctem ut ascendant populi pro eis

²¹cave ne declines ad iniquitatem hanc enim coepisti sequi post miseriam

²²ecce Deus excelsus in fortitudine sua et nullus ei similis in legislatoribus

²³quis poterit scrutari vias eius aut quis ei dicere operatus es iniquitatem

²⁴memento quod ignores opus eius de quo cecinerunt viri

²⁵omnes homines vident eum unusquisque intuetur procul

²⁶ecce Deus magnus vincens scientiam nostram numerus annorum eius inaestimabilis

²⁷qui aufert stillas pluviae et effundit imbres ad instar gurgitum

²⁸qui de nubibus fluunt quae praetexunt cuncta desuper

²⁹si voluerit extendere nubes quasi tentorium suum

³⁰et fulgurare lumine suo desuper cardines quoque maris operiet

³¹per haec enim iudicat populos et dat escas multis mortalibus

³²in manibus abscondit lucem et praecipit ei ut rursus adveniat

³³adnuntiat de ea amico suo quod possessio eius sit et ad eam possit ascendere

Iob 36

¹Addens quoque Eliu, hæc locutus est :

²Sustine me paululum, et indicabo tibi : adhuc enim habeo quod pro Deo loquar.

³Repetam scientiam meam a principio, et operatorem meum probabo justum.

⁴Vere enim absque mendacio sermones mei, et perfecta scientia probabitur tibi.

⁵Deus potentes non abjicit, cum et ipse sit potens :

⁶sed non salvat impios, et judicium pauperibus tribuit.

⁷Non auferet a justo oculos suos : et reges in solio collocat in perpetuum, et illi eriguntur.

⁸Et si fuerint in catenis, et vinciantur funibus paupertatis,

⁹indicabit eis opera eorum, et scelera eorum, quia violenti fuerunt.

¹⁰Revelabit quoque aurem eorum, ut corripiat : et loquetur, ut revertantur ab iniquitate.

¹¹Si audierint et observaverint, complebunt dies suos in bono, et annos suos in gloria :

¹²si autem non audierint, transibunt per gladium, et consumentur in stultitia.

¹³Simulatores et callidi provocant iram Dei, neque clamabunt cum vincti fuerint.

¹⁴Morietur in tempestate anima eorum, et vita eorum inter effeminatos.

¹⁵Eripiet de angustia sua pauperem, et revelabit in tribulatione aurem ejus.

¹⁶Igitur salvabit te de ore angusto latissime, et non habente fundamentum subter se : requies autem mensæ tuæ erit plena pinguedine.

¹⁷Causa tua quasi impii judicata est : causam judiciumque recipies.

¹⁸Non te ergo superet ira ut aliquem opprimas : nec multitudo donorum inclinet te.

¹⁹Depone magnitudinem tuam absque tribulatione, et omnes robustos fortitudine.

²⁰Ne protrahas noctem, ut ascendant populi pro eis.

²¹Cave ne declines ad iniquitatem : hanc enim cœpisti sequi post miseriam.

²²Ecce Deus excelsus in fortitudine sua, et nullus ei similis in legislatoribus.

²³Quis poterit scrutari vias ejus ? aut quis potest ei dicere : Operatus es iniquitatem ?

²⁴Memento quod ignores opus ejus, de quo cecinerunt viri.

²⁵Omnes homines vident eum : unusquisque intuetur procul.

²⁶Ecce Deus magnus vincens scientiam nostram : numerus annorum ejus inæstimabilis.

²⁷Qui aufert stillas pluviæ, et effundit imbres ad instar gurgitum,

²⁸qui de nubibus fluunt quæ prætexunt cuncta desuper.

²⁹Si voluerit extendere nubes quasi tentorium suum,

³⁰et fulgurare lumine suo desuper, cardines quoque maris operiet.

³¹Per hæc enim judicat populos, et dat escas multis mortalibus.

³²In manibus abscondit lucem, et præcepit ei ut rursus adveniat.

³³Annuntiat de ea amico suo, quod possessio ejus sit, et ad eam possit ascendere.