Iob 19 Comparatio: Vulgate vs Clementine Vulgate

Iob 19

¹respondens autem Iob dixit

²usquequo adfligitis animam meam et adteritis me sermonibus

³en decies confunditis me et non erubescitis opprimentes me

⁴nempe et si ignoravi mecum erit ignorantia mea

⁵at vos contra me erigimini et arguitis me obprobriis meis

⁶saltim nunc intellegite quia Deus non aequo iudicio adflixerit me et flagellis suis me cinxerit

⁷ecce clamabo vim patiens et nemo audiet vociferabor et non est qui iudicet

⁸semitam meam circumsepsit et transire non possum et in calle meo tenebras posuit

⁹spoliavit me gloria mea et abstulit coronam de capite meo

¹⁰destruxit me undique et pereo et quasi evulsae arbori abstulit spem meam

¹¹iratus est contra me furor eius et sic me habuit quasi hostem suum

¹²simul venerunt latrones eius et fecerunt sibi viam per me et obsederunt in gyro tabernaculum meum

¹³fratres meos longe fecit a me et noti mei quasi alieni recesserunt a me

¹⁴dereliquerunt me propinqui mei et qui me noverant obliti sunt mei

¹⁵inquilini domus meae et ancillae meae sicut alienum habuerunt me et quasi peregrinus fui in oculis eorum

¹⁶servum meum vocavi et non respondit ore proprio deprecabar illum

¹⁷halitum meum exhorruit uxor mea et orabam filios uteri mei

¹⁸stulti quoque despiciebant me et cum ab eis recessissem detrahebant mihi

¹⁹abominati sunt me quondam consiliarii mei et quem maxime diligebam aversatus est me

²⁰pelli meae consumptis carnibus adhesit os meum et derelicta sunt tantummodo labia circa dentes meos

²¹miseremini mei miseremini mei saltim vos amici mei quia manus Domini tetigit me

²²quare persequimini me sicut Deus et carnibus meis saturamini

²³quis mihi tribuat ut scribantur sermones mei quis mihi det ut exarentur in libro

²⁴stilo ferreo et plumbi lammina vel certe sculpantur in silice

²⁵scio enim quod redemptor meus vivat et in novissimo de terra surrecturus sim

²⁶et rursum circumdabor pelle mea et in carne mea videbo Deum

²⁷quem visurus sum ego ipse et oculi mei conspecturi sunt et non alius reposita est haec spes mea in sinu meo

²⁸quare ergo nunc dicitis persequamur eum et radicem verbi inveniamus contra eum

²⁹fugite ergo a facie gladii quoniam ultor iniquitatum gladius est et scitote esse iudicium

Iob 19

¹Respondens autem Job, dixit :

²Usquequo affligitis animam meam, et atteritis me sermonibus ?

³En decies confunditis me, et non erubescitis opprimentes me.

⁴Nempe etsi ignoravi, mecum erit ignorantia mea.

⁵At vos contra me erigimini, et arguitis me opprobriis meis.

⁶Saltem nunc intelligite quia Deus non æquo judicio afflixerit me, et flagellis suis me cinxerit.

⁷Ecce clamabo, vim patiens, et nemo audiet ; vociferabor, et non est qui judicet.

⁸Semitam meam circumsepsit, et transire non possum : et in calle meo tenebras posuit.

⁹Spoliavit me gloria mea, et abstulit coronam de capite meo.

¹⁰Destruxit me undique, et pereo : et quasi evulsæ arbori abstulit spem meam.

¹¹Iratus est contra me furor ejus, et sic me habuit quasi hostem suum.

¹²Simul venerunt latrones ejus, et fecerunt sibi viam per me, et obsederunt in gyro tabernaculum meum.

¹³Fratres meos longe fecit a me, et noti mei quasi alieni recesserunt a me.

¹⁴Dereliquerunt me propinqui mei, et qui me noverant obliti sunt mei.

¹⁵Inquilini domus meæ et ancillæ meæ sicut alienum habuerunt me, et quasi peregrinus fui in oculis eorum.

¹⁶Servum meum vocavi, et non respondit : ore proprio deprecabar illum.

¹⁷Halitum meum exhorruit uxor mea, et orabam filios uteri mei.

¹⁸Stulti quoque despiciebant me : et cum ab eis recessissem, detrahebant mihi.

¹⁹Abominati sunt me quondam consiliarii mei, et quem maxime diligebam, aversatus est me.

²⁰Pelli meæ, consumptis carnibus, adhæsit os meum, et derelicta sunt tantummodo labia circa dentes meos.

²¹Miseremini mei, miseremini mei saltem vos, amici mei, quia manus Domini tetigit me.

²²Quare persequimini me sicut Deus, et carnibus meis saturamini ?

²³Quis mihi tribuat ut scribantur sermones mei ? quis mihi det ut exarentur in libro

²⁴stylo ferreo et plumbi lamina, vel celte sculpantur in silice ?

²⁵Scio enim quod redemptor meus vivit, et in novissimo die de terra surrecturus sum :

²⁶et rursum circumdabor pelle mea, et in carne mea videbo Deum meum :

²⁷quem visurus sum ego ipse, et oculi mei conspecturi sunt, et non alius : reposita est hæc spes mea in sinu meo.

²⁸Quare ergo nunc dicitis : Persequamur eum, et radicem verbi inveniamus contra eum ?

²⁹Fugite ergo a facie gladii, quoniam ultor iniquitatum gladius est : et scitote esse judicium.