Ioannes 8

¹Iesus autem perrexit in montem Oliveti

²et diluculo iterum venit in templum et omnis populus venit ad eum et sedens docebat eos

³adducunt autem scribae et Pharisaei mulierem in adulterio deprehensam et statuerunt eam in medio

⁴et dixerunt ei magister haec mulier modo deprehensa est in adulterio

⁵in lege autem Moses mandavit nobis huiusmodi lapidare tu ergo quid dicis

⁶haec autem dicebant temptantes eum ut possent accusare eum Iesus autem inclinans se deorsum digito scribebat in terra

⁷cum autem perseverarent interrogantes eum erexit se et dixit eis qui sine peccato est vestrum primus in illam lapidem mittat

⁸et iterum se inclinans scribebat in terra

⁹audientes autem unus post unum exiebant incipientes a senioribus et remansit solus et mulier in medio stans

¹⁰erigens autem se Iesus dixit ei mulier ubi sunt nemo te condemnavit

¹¹quae dixit nemo Domine dixit autem Iesus nec ego te condemnabo vade et amplius iam noli peccare

¹²iterum ergo locutus est eis Iesus dicens ego sum lux mundi qui sequitur me non ambulabit in tenebris sed habebit lucem vitae

¹³dixerunt ergo ei Pharisaei tu de te ipso testimonium perhibes testimonium tuum non est verum

¹⁴respondit Iesus et dixit eis et si ego testimonium perhibeo de me ipso verum est testimonium meum quia scio unde veni et quo vado vos autem nescitis unde venio aut quo vado

¹⁵vos secundum carnem iudicatis ego non iudico quemquam

¹⁶et si iudico ego iudicium meum verum est quia solus non sum sed ego et qui me misit Pater

¹⁷et in lege vestra scriptum est quia duorum hominum testimonium verum est

¹⁸ego sum qui testimonium perhibeo de me ipso et testimonium perhibet de me qui misit me Pater

¹⁹dicebant ergo ei ubi est Pater tuus respondit Iesus neque me scitis neque Patrem meum si me sciretis forsitan et Patrem meum sciretis

²⁰haec verba locutus est in gazofilacio docens in templo et nemo adprehendit eum quia necdum venerat hora eius

²¹dixit ergo iterum eis Iesus ego vado et quaeretis me et in peccato vestro moriemini quo ego vado vos non potestis venire

²²dicebant ergo Iudaei numquid interficiet semet ipsum quia dicit quo ego vado vos non potestis venire

²³et dicebat eis vos de deorsum estis ego de supernis sum vos de mundo hoc estis ego non sum de hoc mundo

²⁴dixi ergo vobis quia moriemini in peccatis vestris si enim non credideritis quia ego sum moriemini in peccato vestro

²⁵dicebant ergo ei tu quis es dixit eis Iesus principium quia et loquor vobis

²⁶multa habeo de vobis loqui et iudicare sed qui misit me verax est et ego quae audivi ab eo haec loquor in mundo

²⁷et non cognoverunt quia Patrem eis dicebat

²⁸dixit ergo eis Iesus cum exaltaveritis Filium hominis tunc cognoscetis quia ego sum et a me ipso facio nihil sed sicut docuit me Pater haec loquor

²⁹et qui me misit mecum est non reliquit me solum quia ego quae placita sunt ei facio semper

³⁰haec illo loquente multi crediderunt in eum

³¹dicebat ergo Iesus ad eos qui crediderunt ei Iudaeos si vos manseritis in sermone meo vere discipuli mei eritis

³²et cognoscetis veritatem et veritas liberabit vos

³³responderunt ei semen Abrahae sumus et nemini servivimus umquam quomodo tu dicis liberi eritis

³⁴respondit eis Iesus amen amen dico vobis quia omnis qui facit peccatum servus est peccati

³⁵servus autem non manet in domo in aeternum filius manet in aeternum

³⁶si ergo Filius vos liberaverit vere liberi eritis

³⁷scio quia filii Abrahae estis sed quaeritis me interficere quia sermo meus non capit in vobis

³⁸ego quod vidi apud Patrem loquor et vos quae vidistis apud patrem vestrum facitis

³⁹responderunt et dixerunt ei pater noster Abraham est dicit eis Iesus si filii Abrahae estis opera Abrahae facite

⁴⁰nunc autem quaeritis me interficere hominem qui veritatem vobis locutus sum quam audivi a Deo hoc Abraham non fecit

⁴¹vos facitis opera patris vestri dixerunt itaque ei nos ex fornicatione non sumus nati unum patrem habemus Deum

⁴²dixit ergo eis Iesus si Deus pater vester esset diligeretis utique me ego enim ex Deo processi et veni neque enim a me ipso veni sed ille me misit

⁴³quare loquellam meam non cognoscitis quia non potestis audire sermonem meum

⁴⁴vos ex patre diabolo estis et desideria patris vestri vultis facere ille homicida erat ab initio et in veritate non stetit quia non est veritas in eo cum loquitur mendacium ex propriis loquitur quia mendax est et pater eius

⁴⁵ego autem quia veritatem dico non creditis mihi

⁴⁶quis ex vobis arguit me de peccato si veritatem dico quare vos non creditis mihi

⁴⁷qui est ex Deo verba Dei audit propterea vos non auditis quia ex Deo non estis

⁴⁸responderunt igitur Iudaei et dixerunt ei nonne bene dicimus nos quia Samaritanus es tu et daemonium habes

⁴⁹respondit Iesus ego daemonium non habeo sed honorifico Patrem meum et vos inhonoratis me

⁵⁰ego autem non quaero gloriam meam est qui quaerit et iudicat

⁵¹amen amen dico vobis si quis sermonem meum servaverit mortem non videbit in aeternum

⁵²dixerunt ergo Iudaei nunc cognovimus quia daemonium habes Abraham mortuus est et prophetae et tu dicis si quis sermonem meum servaverit non gustabit mortem in aeternum

⁵³numquid tu maior es patre nostro Abraham qui mortuus est et prophetae mortui sunt quem te ipsum facis

⁵⁴respondit Iesus si ego glorifico me ipsum gloria mea nihil est est Pater meus qui glorificat me quem vos dicitis quia Deus noster est

⁵⁵et non cognovistis eum ego autem novi eum et si dixero quia non scio eum ero similis vobis mendax sed scio eum et sermonem eius servo

⁵⁶Abraham pater vester exultavit ut videret diem meum et vidit et gavisus est

⁵⁷dixerunt ergo Iudaei ad eum quinquaginta annos nondum habes et Abraham vidisti

⁵⁸dixit eis Iesus amen amen dico vobis antequam Abraham fieret ego sum

⁵⁹tulerunt ergo lapides ut iacerent in eum Iesus autem abscondit se et exivit de templo

Ioannes 8

¹Jesus autem perrexit in montem Oliveti :

²et diluculo iterum venit in templum, et omnis populus venit ad eum, et sedens docebat eos.

³Adducunt autem scribæ et pharisæi mulierem in adulterio deprehensam : et statuerunt eam in medio,

⁴et dixerunt ei : Magister, hæc mulier modo deprehensa est in adulterio.

⁵In lege autem Moyses mandavit nobis hujusmodi lapidare. Tu ergo quid dicis ?

⁶Hoc autem dicebant tentantes eum, ut possent accusare eum. Jesus autem inclinans se deorsum, digito scribebat in terra.

⁷Cum ergo perseverarent interrogantes eum, erexit se, et dixit eis : Qui sine peccato est vestrum, primus in illam lapidem mittat.

⁸Et iterum se inclinans, scribebat in terra.

⁹Audientes autem unus post unum exibant, incipientes a senioribus : et remansit solus Jesus, et mulier in medio stans.

¹⁰Erigens autem se Jesus, dixit ei : Mulier, ubi sunt qui te accusabant ? nemo te condemnavit ?

¹¹Quæ dixit : Nemo, Domine. Dixit autem Jesus : Nec ego te condemnabo : vade, et jam amplius noli peccare.

¹²Iterum ergo locutus est eis Jesus, dicens : Ego sum lux mundi : qui sequitur me, non ambulat in tenebris, sed habebit lumen vitæ.

¹³Dixerunt ergo ei pharisæi : Tu de teipso testimonium perhibes ; testimonium tuum non est verum.

¹⁴Respondit Jesus, et dixit eis : Et si ego testimonium perhibeo de meipso, verum est testimonium meum : quia scio unde veni et quo vado ; vos autem nescitis unde venio aut quo vado.

¹⁵Vos secundum carnem judicatis : ego non judico quemquam ;

¹⁶et si judico ego, judicium meum verum est, quia solus non sum : sed ego et qui misit me, Pater.

¹⁷Et in lege vestra scriptum est, quia duorum hominum testimonium verum est.

¹⁸Ego sum qui testimonium perhibeo de meipso, et testimonium perhibet de me qui misit me, Pater.

¹⁹Dicebant ergo ei : Ubi est Pater tuus ? Respondit Jesus : Neque me scitis, neque Patrem meum : si me sciretis, forsitan et Patrem meum sciretis.

²⁰Hæc verba locutus est Jesus in gazophylacio, docens in templo : et nemo apprehendit eum, quia necdum venerat hora ejus.

²¹Dixit ergo iterum eis Jesus : Ego vado, et quæretis me, et in peccato vestro moriemini. Quo ego vado, vos non potestis venire.

²²Dicebant ergo Judæi : Numquid interficiet semetipsum, quia dixit : Quo ego vado, vos non potestis venire ?

²³Et dicebat eis : Vos de deorsum estis, ego de supernis sum. Vos de mundo hoc estis, ego non sum de hoc mundo.

²⁴Dixi ergo vobis quia moriemini in peccatis vestris : si enim non credideritis quia ego sum, moriemini in peccato vestro.

²⁵Dicebant ergo ei : Tu quis es ? Dixit eis Jesus : Principium, qui et loquor vobis.

²⁶Multa habeo de vobis loqui, et judicare ; sed qui me misit, verax est ; et ego quæ audivi ab eo, hæc loquor in mundo.

²⁷Et non cognoverunt quia Patrem ejus dicebat Deum.

²⁸Dixit ergo eis Jesus : Cum exaltaveritis Filium hominis, tunc cognoscetis quia ego sum, et a meipso facio nihil, sed sicut docuit me Pater, hæc loquor :

²⁹et qui me misit, mecum est, et non reliquit me solum : quia ego quæ placita sunt ei, facio semper.

³⁰Hæc illo loquente, multi crediderunt in eum.

³¹Dicebat ergo Jesus ad eos, qui crediderunt ei, Judæos : Si vos manseritis in sermone meo, vere discipuli mei eritis,

³²et cognoscetis veritatem, et veritas liberabit vos.

³³Responderunt ei : Semen Abrahæ sumus, et nemini servivimus umquam : quomodo tu dicis : Liberi eritis ?

³⁴Respondit eis Jesus : Amen, amen dico vobis : quia omnis qui facit peccatum, servus est peccati.

³⁵Servus autem non manet in domo in æternum : filius autem manet in æternum.

³⁶Si ergo vos filius liberaverit, vere liberi eritis.

³⁷Scio quia filii Abrahæ estis : sed quæritis me interficere, quia sermo meus non capit in vobis.

³⁸Ego quod vidi apud Patrem meum, loquor : et vos quæ vidistis apud patrem vestrum, facitis.

³⁹Responderunt, et dixerunt ei : Pater noster Abraham est. Dicit eis Jesus : Si filii Abrahæ estis, opera Abrahæ facite.

⁴⁰Nunc autem quæritis me interficere, hominem, qui veritatem vobis locutus sum, quam audivi a Deo : hoc Abraham non fecit.

⁴¹Vos facitis opera patris vestri. Dixerunt itaque ei : Nos ex fornicatione non sumus nati : unum patrem habemus Deum.

⁴²Dixit ergo eis Jesus : Si Deus pater vester esset, diligeretis utique et me ; ego enim ex Deo processi, et veni : neque enim a meipso veni, sed ille me misit.

⁴³Quare loquelam meam non cognoscitis ? Quia non potestis audire sermonem meum.

⁴⁴Vos ex patre diabolo estis : et desideria patris vestri vultis facere. Ille homicida erat ab initio, et in veritate non stetit : quia non est veritas in eo : cum loquitur mendacium, ex propriis loquitur, quia mendax est, et pater ejus.

⁴⁵Ego autem si veritatem dico, non creditis mihi.

⁴⁶Quis ex vobis arguet me de peccato ? si veritatem dico vobis, quare non creditis mihi ?

⁴⁷Qui ex Deo est, verba Dei audit. Propterea vos non auditis, quia ex Deo non estis.

⁴⁸Responderunt ergo Judæi, et dixerunt ei : Nonne bene dicimus nos quia Samaritanus es tu, et dæmonium habes ?

⁴⁹Respondit Jesus : Ego dæmonium non habeo : sed honorifico Patrem meum, et vos inhonorastis me.

⁵⁰Ego autem non quæro gloriam meam : est qui quærat, et judicet.

⁵¹Amen, amen dico vobis : si quis sermonem meum servaverit, mortem non videbit in æternum.

⁵²Dixerunt ergo Judæi : Nunc cognovimus quia dæmonium habes. Abraham mortuus est, et prophetæ ; et tu dicis : Si quis sermonem meum servaverit, non gustabit mortem in æternum.

⁵³Numquid tu major es patre nostro Abraham, qui mortuus est ? et prophetæ mortui sunt. Quem teipsum facis ?

⁵⁴Respondit Jesus : Si ego glorifico meipsum, gloria mea nihil est : est Pater meus, qui glorificat me, quem vos dicitis quia Deus vester est,

⁵⁵et non cognovistis eum : ego autem novi eum. Et si dixero quia non scio eum, ero similis vobis, mendax. Sed scio eum, et sermonem ejus servo.

⁵⁶Abraham pater vester exsultavit ut videret diem meum : vidit, et gavisus est.

⁵⁷Dixerunt ergo Judæi ad eum : Quinquaginta annos nondum habes, et Abraham vidisti ?

⁵⁸Dixit eis Jesus : Amen, amen dico vobis, antequam Abraham fieret, ego sum.

⁵⁹Tulerunt ergo lapides, ut jacerent in eum : Jesus autem abscondit se, et exivit de templo.