Ioannes 7 Comparatio: Vulgate vs Clementine Vulgate

Ioannes 7

¹post haec ambulabat Iesus in Galilaeam non enim volebat in Iudaeam ambulare quia quaerebant eum Iudaei interficere

²erat autem in proximo dies festus Iudaeorum scenopegia

³dixerunt autem ad eum fratres eius transi hinc et vade in Iudaeam ut et discipuli tui videant opera tua quae facis

⁴nemo quippe in occulto quid facit et quaerit ipse in palam esse si haec facis manifesta te ipsum mundo

⁵neque enim fratres eius credebant in eum

⁶dicit ergo eis Iesus tempus meum nondum advenit tempus autem vestrum semper est paratum

⁷non potest mundus odisse vos me autem odit quia ego testimonium perhibeo de illo quia opera eius mala sunt

⁸vos ascendite ad diem festum hunc ego non ascendo ad diem festum istum quia meum tempus nondum impletum est

⁹haec cum dixisset ipse mansit in Galilaea

¹⁰ut autem ascenderunt fratres eius tunc et ipse ascendit ad diem festum non manifeste sed quasi in occulto

¹¹Iudaei ergo quaerebant eum in die festo et dicebant ubi est ille

¹²et murmur multus de eo erat in turba; quidam enim dicebant quia bonus est alii autem dicebant non sed seducit turbas

¹³nemo tamen palam loquebatur de illo propter metum Iudaeorum

¹⁴iam autem die festo mediante ascendit Iesus in templum et docebat

¹⁵et mirabantur Iudaei dicentes quomodo hic litteras scit cum non didicerit

¹⁶respondit eis Iesus et dixit mea doctrina non est mea sed eius qui misit me

¹⁷si quis voluerit voluntatem eius facere cognoscet de doctrina utrum ex Deo sit an ego a me ipso loquar

¹⁸qui a semet ipso loquitur gloriam propriam quaerit qui autem quaerit gloriam eius qui misit illum hic verax est et iniustitia in illo non est

¹⁹nonne Moses dedit vobis legem et nemo ex vobis facit legem

²⁰quid me quaeritis interficere respondit turba et dixit daemonium habes quis te quaerit interficere

²¹respondit Iesus et dixit eis unum opus feci et omnes miramini

²²propterea Moses dedit vobis circumcisionem non quia ex Mose est sed ex patribus et in sabbato circumciditis hominem

²³si circumcisionem accipit homo in sabbato ut non solvatur lex Mosi mihi indignamini quia totum hominem sanum feci in sabbato

²⁴nolite iudicare secundum faciem sed iustum iudicium iudicate

²⁵dicebant ergo quidam ex Hierosolymis nonne hic est quem quaerunt interficere

²⁶et ecce palam loquitur et nihil ei dicunt numquid vere cognoverunt principes quia hic est Christus

²⁷sed hunc scimus unde sit Christus autem cum venerit nemo scit unde sit

²⁸clamabat ergo docens in templo Iesus et dicens et me scitis et unde sim scitis et a me ipso non veni sed est verus qui misit me quem vos non scitis

²⁹ego scio eum quia ab ipso sum et ipse me misit

³⁰quaerebant ergo eum adprehendere et nemo misit in illum manus quia nondum venerat hora eius

³¹de turba autem multi crediderunt in eum et dicebant Christus cum venerit numquid plura signa faciet quam quae hic facit

³²audierunt Pharisaei turbam murmurantem de illo haec et miserunt principes et Pharisaei ministros ut adprehenderent eum

³³dixit ergo Iesus adhuc modicum tempus vobiscum sum et vado ad eum qui misit me

³⁴quaeretis me et non invenietis et ubi sum ego vos non potestis venire

³⁵dixerunt ergo Iudaei ad se ipsos quo hic iturus est quia non inveniemus eum numquid in dispersionem gentium iturus est et docturus gentes

³⁶quis est hic sermo quem dixit quaeretis me et non invenietis et ubi sum ego non potestis venire

³⁷in novissimo autem die magno festivitatis stabat Iesus et clamabat dicens si quis sitit veniat ad me et bibat

³⁸qui credit in me sicut dixit scriptura flumina de ventre eius fluent aquae vivae

³⁹hoc autem dixit de Spiritu quem accepturi erant credentes in eum non enim erat Spiritus quia Iesus nondum fuerat glorificatus

⁴⁰ex illa ergo turba cum audissent hos sermones eius dicebant hic est vere propheta

⁴¹alii dicebant hic est Christus quidam autem dicebant numquid a Galilaea Christus venit

⁴²nonne scriptura dicit quia ex semine David et Bethleem castello ubi erat David venit Christus

⁴³dissensio itaque facta est in turba propter eum

⁴⁴quidam autem ex ipsis volebant adprehendere eum sed nemo misit super illum manus

⁴⁵venerunt ergo ministri ad pontifices et Pharisaeos et dixerunt eis illi quare non adduxistis eum

⁴⁶responderunt ministri numquam sic locutus est homo sicut hic homo

⁴⁷responderunt ergo eis Pharisaei numquid et vos seducti estis

⁴⁸numquid aliquis ex principibus credidit in eum aut ex Pharisaeis

⁴⁹sed turba haec quae non novit legem maledicti sunt

⁵⁰dicit Nicodemus ad eos ille qui venit ad eum nocte qui unus erat ex ipsis

⁵¹numquid lex nostra iudicat hominem nisi audierit ab ipso prius et cognoverit quid faciat

⁵²responderunt et dixerunt ei numquid et tu Galilaeus es scrutare et vide quia propheta a Galilaea non surgit

⁵³et reversi sunt unusquisque in domum suam

Ioannes 7

¹Post hæc autem ambulabat Jesus in Galilæam : non enim volebat in Judæam ambulare, quia quærebant eum Judæi interficere.

²Erat autem in proximo dies festus Judæorum, Scenopegia.

³Dixerunt autem ad eum fratres ejus : Transi hinc, et vade in Judæam, ut et discipuli tui videant opera tua, quæ facis.

⁴Nemo quippe in occulto quid facit, et quærit ipse in palam esse : si hæc facis, manifesta teipsum mundo.

⁵Neque enim fratres ejus credebant in eum.

⁶Dicit ergo eis Jesus : Tempus meum nondum advenit : tempus autem vestrum semper est paratum.

⁷Non potest mundus odisse vos : me autem odit, quia ego testimonium perhibeo de illo quod opera ejus mala sunt.

⁸Vos ascendite ad diem festum hunc, ego autem non ascendo ad diem festum istum : quia meum tempus nondum impletum est.

⁹Hæc cum dixisset, ipse mansit in Galilæa.

¹⁰Ut autem ascenderunt fratres ejus, tunc et ipse ascendit ad diem festum non manifeste, sed quasi in occulto.

¹¹Judæi ergo quærebant eum in die festo, et dicebant : Ubi est ille ?

¹²Et murmur multum erat in turba de eo. Quidam enim dicebant : Quia bonus est. Alii autem dicebant : Non, sed seducit turbas.

¹³Nemo tamen palam loquebatur de illo propter metum Judæorum.

¹⁴Jam autem die festo mediante, ascendit Jesus in templum, et docebat.

¹⁵Et mirabantur Judæi, dicentes : Quomodo hic litteras scit, cum non didicerit ?

¹⁶Respondit eis Jesus, et dixit : Mea doctrina non est mea, sed ejus qui misit me.

¹⁷Si quis voluerit voluntatem ejus facere, cognoscet de doctrina, utrum ex Deo sit, an ego a meipso loquar.

¹⁸Qui a semetipso loquitur, gloriam propriam quærit ; qui autem quærit gloriam ejus qui misit eum, hic verax est, et injustitia in illo non est.

¹⁹Nonne Moyses dedit vobis legem : et nemo ex vobis facit legem ?

²⁰Quid me quæritis interficere ? Respondit turba, et dixit : Dæmonium habes : quis te quærit interficere ?

²¹Respondit Jesus et dixit eis : Unum opus feci, et omnes miramini :

²²propterea Moyses dedit vobis circumcisionem (non quia ex Moyse est, sed ex patribus), et in sabbato circumciditis hominem.

²³Si circumcisionem accipit homo in sabbato, ut non solvatur lex Moysi : mihi indignamini quia totum hominem sanum feci in sabbato ?

²⁴Nolite judicare secundum faciem, sed justum judicium judicate.

²⁵Dicebant ergo quidam ex Jerosolymis : Nonne hic est, quem quærunt interficere ?

²⁶et ecce palam loquitur, et nihil ei dicunt. Numquid vere cognoverunt principes quia hic est Christus ?

²⁷Sed hunc scimus unde sit : Christus autem cum venerit, nemo scit unde sit.

²⁸Clamabat ergo Jesus in templo docens, et dicens : Et me scitis, et unde sim scitis : et a meipso non veni, sed est verus qui misit me, quem vos nescitis.

²⁹Ego scio eum : quia ab ipso sum, et ipse me misit.

³⁰Quærebant ergo eum apprehendere : et nemo misit in illum manus, quia nondum venerat hora ejus.

³¹De turba autem multi crediderunt in eum, et dicebant : Christus cum venerit, numquid plura signa faciet quam quæ hic facit ?

³²Audierunt pharisæi turbam murmurantem de illo hæc : et miserunt principes et pharisæi ministros ut apprehenderent eum.

³³Dixit ergo eis Jesus : Adhuc modicum tempus vobiscum sum : et vado ad eum qui me misit.

³⁴Quæretis me, et non invenietis : et ubi ego sum, vos non potestis venire.

³⁵Dixerunt ergo Judæi ad semetipsos : Quo hic iturus est, quia non inveniemus eum ? numquid in dispersionem gentium iturus est, et docturus gentes ?

³⁶quis est hic sermo, quem dixit : Quæretis me, et non invenietis : et ubi sum ego, vos non potestis venire ?

³⁷In novissimo autem die magno festivitatis stabat Jesus, et clamabat dicens : Si quis sitit, veniat ad me et bibat.

³⁸Qui credit in me, sicut dicit Scriptura, flumina de ventre ejus fluent aquæ vivæ.

³⁹Hoc autem dixit de Spiritu, quem accepturi erant credentes in eum : nondum enim erat Spiritus datus, quia Jesus nondum erat glorificatus.

⁴⁰Ex illa ergo turba cum audissent hos sermones ejus, dicebant : Hic est vere propheta.

⁴¹Alii dicebant : Hic est Christus. Quidam autem dicebant : Numquid a Galilæa venit Christus ?

⁴²nonne Scriptura dicit : Quia ex semine David, et de Bethlehem castello, ubi erat David, venit Christus ?

⁴³Dissensio itaque facta est in turba propter eum.

⁴⁴Quidam autem ex ipsis volebant apprehendere eum : sed nemo misit super eum manus.

⁴⁵Venerunt ergo ministri ad pontifices et pharisæos. Et dixerunt eis illi : Quare non adduxistis illum ?

⁴⁶Responderunt ministri : Numquam sic locutus est homo, sicut hic homo.

⁴⁷Responderunt ergo eis pharisæi : Numquid et vos seducti estis ?

⁴⁸numquid ex principibus aliquis credidit in eum, aut ex pharisæis ?

⁴⁹sed turba hæc, quæ non novit legem, maledicti sunt.

⁵⁰Dixit Nicodemus ad eos, ille qui venit ad eum nocte, qui unus erat ex ipsis :

⁵¹Numquid lex nostra judicat hominem, nisi prius audierit ab ipso, et cognoverit quid faciat ?

⁵²Responderunt, et dixerunt ei : Numquid et tu Galilæus es ? scrutare Scripturas, et vide quia a Galilæa propheta non surgit.

⁵³Et reversi sunt unusquisque in domum suam.