I Ad Timotheum 3 Comparatio: Vulgate vs Clementine Vulgate

I Ad Timotheum 3

¹fidelis sermo si quis episcopatum desiderat bonum opus desiderat

²oportet ergo episcopum inreprehensibilem esse unius uxoris virum sobrium prudentem ornatum hospitalem doctorem

³non vinolentum non percussorem sed modestum non litigiosum non cupidum

⁴suae domui bene praepositum filios habentem subditos cum omni castitate

⁵si quis autem domui suae praeesse nescit quomodo ecclesiae Dei diligentiam habebit

⁶non neophytum ne in superbia elatus in iudicium incidat diaboli

⁷oportet autem illum et testimonium habere bonum ab his qui foris sunt ut non in obprobrium incidat et laqueum diaboli

⁸diaconos similiter pudicos non bilingues non multo vino deditos non turpe lucrum sectantes

⁹habentes mysterium fidei in conscientia pura

¹⁰et hii autem probentur primum et sic ministrent nullum crimen habentes

¹¹mulieres similiter pudicas non detrahentes sobrias fideles in omnibus

¹²diacones sint unius uxoris viri qui filiis suis bene praesunt et suis domibus

¹³qui enim bene ministraverint gradum sibi bonum adquirent et multam fiduciam in fide quae est in Christo Iesu

¹⁴haec tibi scribo sperans venire ad te cito

¹⁵si autem tardavero ut scias quomodo oporteat te in domo Dei conversari quae est ecclesia Dei vivi columna et firmamentum veritatis

¹⁶et manifeste magnum est pietatis sacramentum quod manifestatum est in carne iustificatum est in spiritu apparuit angelis praedicatum est gentibus creditum est in mundo adsumptum est in gloria

I Ad Timotheum 3

¹Fidelis sermo : si quis episcopatum desiderat, bonum opus desiderat.

²Oportet ergo episcopum irreprehensibilem esse, unius uxoris virum, sobrium, prudentem, ornatum, pudicum, hospitalem, doctorem,

³non vinolentum, non percussorem, sed modestum : non litigiosum, non cupidum, sed

⁴suæ domui bene præpositum : filios habentem subditos cum omni castitate.

⁵Si quis autem domui suæ præesse nescit, quomodo ecclesiæ Dei diligentiam habebit ?

⁶Non neophytum : ne in superbiam elatus, in judicium incidat diaboli.

⁷Oportet autem illum et testimonium habere bonum ab iis qui foris sunt, ut non in opprobrium incidat, et in laqueum diaboli.

⁸Diaconos similiter pudicos, non bilingues, non multo vino deditos, non turpe lucrum sectantes :

⁹habentes mysterium fidei in conscientia pura.

¹⁰Et hi autem probentur primum : et sic ministrent, nullum crimen habentes.

¹¹Mulieres similiter pudicas, non detrahentes, sobrias, fideles in omnibus.

¹²Diaconi sint unius uxoris viri, qui filiis suis bene præsint, et suis domibus.

¹³Qui enim bene ministraverint, gradum bonum sibi acquirent, et multam fiduciam in fide, quæ est in Christo Jesu.

¹⁴Hæc tibi scribo, sperans me ad te venire cito :

¹⁵si autem tardavero, ut scias quomodo oporteat te in domo Dei conversari, quæ est ecclesia Dei vivi, columna et firmamentum veritatis.

¹⁶Et manifeste magnum est pietatis sacramentum, quod manifestatum est in carne, justificatum est in spiritu, apparuit angelis, prædicatum est gentibus, creditum est in mundo, assumptum est in gloria.