I Ad Corinthios 1

¹Paulus vocatus apostolus Christi Iesu per voluntatem Dei et Sosthenes frater

²ecclesiae Dei quae est Corinthi sanctificatis in Christo Iesu vocatis sanctis cum omnibus qui invocant nomen Domini nostri Iesu Christi in omni loco ipsorum et nostro

³gratia vobis et pax a Deo Patre nostro et Domino Iesu Christo

⁴gratias ago Deo meo semper pro vobis in gratia Dei quae data est vobis in Christo Iesu

⁵quia in omnibus divites facti estis in illo in omni verbo et in omni scientia

⁶sicut testimonium Christi confirmatum est in vobis

⁷ita ut nihil vobis desit in ulla gratia expectantibus revelationem Domini nostri Iesu Christi

⁸qui et confirmabit vos usque ad finem sine crimine in die adventus Domini nostri Iesu Christi

⁹fidelis Deus per quem vocati estis in societatem Filii eius Iesu Christi Domini nostri

¹⁰obsecro autem vos fratres per nomen Domini nostri Iesu Christi ut id ipsum dicatis omnes et non sint in vobis scismata sitis autem perfecti in eodem sensu et in eadem sententia

¹¹significatum est enim mihi de vobis fratres mei ab his qui sunt Chloes quia contentiones inter vos sunt

¹²hoc autem dico quod unusquisque vestrum dicit ego quidem sum Pauli ego autem Apollo ego vero Cephae ego autem Christi

¹³divisus est Christus numquid Paulus crucifixus est pro vobis aut in nomine Pauli baptizati estis

¹⁴gratias ago Deo quod neminem vestrum baptizavi nisi Crispum et Gaium

¹⁵ne quis dicat quod in nomine meo baptizati sitis

¹⁶baptizavi autem et Stephanae domum ceterum nescio si quem alium baptizaverim

¹⁷non enim misit me Christus baptizare sed evangelizare non in sapientia verbi ut non evacuetur crux Christi

¹⁸verbum enim crucis pereuntibus quidem stultitia est his autem qui salvi fiunt id est nobis virtus Dei est

¹⁹scriptum est enim perdam sapientiam sapientium et prudentiam prudentium reprobabo

²⁰ubi sapiens ubi scriba ubi conquisitor huius saeculi nonne stultam fecit Deus sapientiam huius mundi

²¹nam quia in Dei sapientia non cognovit mundus per sapientiam Deum placuit Deo per stultitiam praedicationis salvos facere credentes

²²quoniam et Iudaei signa petunt et Graeci sapientiam quaerunt

²³nos autem praedicamus Christum crucifixum Iudaeis quidem scandalum gentibus autem stultitiam

²⁴ipsis autem vocatis Iudaeis atque Graecis Christum Dei virtutem et Dei sapientiam

²⁵quia quod stultum est Dei sapientius est hominibus et quod infirmum est Dei fortius est hominibus

²⁶videte enim vocationem vestram fratres quia non multi sapientes secundum carnem non multi potentes non multi nobiles

²⁷sed quae stulta sunt mundi elegit Deus ut confundat sapientes et infirma mundi elegit Deus ut confundat fortia

²⁸et ignobilia mundi et contemptibilia elegit Deus et quae non sunt ut ea quae sunt destrueret

²⁹ut non glorietur omnis caro in conspectu eius

³⁰ex ipso autem vos estis in Christo Iesu qui factus est sapientia nobis a Deo et iustitia et sanctificatio et redemptio

³¹ut quemadmodum scriptum est qui gloriatur in Domino glorietur

I Ad Corinthios 1

¹Paulus vocatus Apostolus Jesu Christi per voluntatem Dei, et Sosthenes frater,

²ecclesiæ Dei, quæ est Corinthi, sanctificatis in Christo Jesu, vocatis sanctis, cum omnibus qui invocant nomen Domini nostri Jesu Christi, in omni loco ipsorum et nostro.

³Gratia vobis, et pax a Deo Patre nostro, et Domino Jesu Christo.

⁴Gratias ago Deo meo semper pro vobis in gratia Dei, quæ data est vobis in Christo Jesu :

⁵quod in omnibus divites facti estis in illo, in omni verbo, et in omni scientia.

⁶Sicut testimonium Christi confirmatum est in vobis :

⁷ita ut nihil vobis desit in ulla gratia, exspectantibus revelationem Domini nostri Jesu Christi,

⁸qui et confirmabit vos usque in finem sine crimine, in die adventus Domini nostri Jesu Christi.

⁹Fidelis Deus : per quem vocati estis in societatem filii ejus Jesu Christi Domini nostri.

¹⁰Obsecro autem vos fratres per nomen Domini nostri Jesu Christi : ut idipsum dicatis omnes, et non sint in vobis schismata : sitis autem perfecti in eodem sensu, et in eadem sententia.

¹¹Significatum est enim mihi de vobis fratres mei ab iis, qui sunt Chloës, quia contentiones sunt inter vos.

¹²Hoc autem dico, quod unusquisque vestrum dicit : Ego quidem sum Pauli : ego autem Apollo : ego vero Cephæ : ego autem Christi.

¹³Divisus est Christus ? numquid Paulus crucifixus est pro vobis ? aut in nomine Pauli baptizati estis ?

¹⁴Gratias ago Deo, quod neminem vestrum baptizavi, nisi Crispum et Caium :

¹⁵ne quis dicat quod in nomine meo baptizati estis.

¹⁶Baptizavi autem et Stephanæ domum : ceterum nescio si quem alium baptizaverim.

¹⁷Non enim misit me Christus baptizare, sed evangelizare : non in sapientia verbi, ut non evacuetur crux Christi.

¹⁸Verbum enim crucis pereuntibus quidem stultitia est : iis autem qui salvi fiunt, id est nobis, Dei virtus est.

¹⁹Scriptum est enim : Perdam sapientiam sapientium, et prudentiam prudentium reprobabo.

²⁰Ubi sapiens ? ubi scriba ? ubi conquisitor hujus sæculi ? Nonne stultam fecit Deus sapientiam hujus mundi ?

²¹Nam quia in Dei sapientia non cognovit mundus per sapientiam Deum : placuit Deo per stultitiam prædicationis salvos facere credentes.

²²Quoniam et Judæi signa petunt, et Græci sapientiam quærunt :

²³nos autem prædicamus Christum crucifixum : Judæis quidem scandalum, gentibus autem stultitiam,

²⁴ipsis autem vocatis Judæis, atque Græcis Christum Dei virtutem, et Dei sapientiam :

²⁵quia quod stultum est Dei, sapientius est hominibus : et quod infirmum est Dei, fortius est hominibus.

²⁶Videte enim vocationem vestram, fratres, quia non multi sapientes secundum carnem, non multi potentes, non multi nobiles :

²⁷sed quæ stulta sunt mundi elegit Deus, ut confundat sapientes : et infirma mundi elegit Deus, ut confundat fortia :

²⁸et ignobilia mundi, et contemptibilia elegit Deus, et ea quæ non sunt, ut ea quæ sunt destrueret :

²⁹ut non glorietur omnis caro in conspectu ejus.

³⁰Ex ipso autem vos estis in Christo Jesu, qui factus est nobis sapientia a Deo, et justitia, et sanctificatio, et redemptio :

³¹ut quemadmodum scriptum est : Qui gloriatur, in Domino glorietur.