Ad Romanos 16

¹commendo autem vobis Phoebem sororem nostram quae est in ministerio ecclesiae quae est Cenchris

²ut eam suscipiatis in Domino digne sanctis et adsistatis ei in quocumque negotio vestri indiguerit etenim ipsa quoque adstitit multis et mihi ipsi

³salutate Priscam et Aquilam adiutores meos in Christo Iesu

⁴qui pro anima mea suas cervices subposuerunt quibus non solus ego gratias ago sed et cunctae ecclesiae gentium

⁵et domesticam eorum ecclesiam salutate Ephaenetum dilectum mihi qui est primitivus Asiae in Christo

⁶salutate Mariam quae multum laboravit in vobis

⁷salutate Andronicum et Iuniam cognatos et concaptivos meos qui sunt nobiles in apostolis qui et ante me fuerunt in Christo

⁸salutate Ampliatum dilectissimum mihi in Domino

⁹salutate Urbanum adiutorem nostrum in Christo et Stachyn dilectum meum

¹⁰salutate Apellen probum in Christo

¹¹salutate eos qui sunt ex Aristoboli salutate Herodionem cognatum meum salutate eos qui sunt ex Narcissi qui sunt in Domino

¹²salutate Tryfenam et Tryfosam quae laborant in Domino salutate Persidam carissimam quae multum laboravit in Domino

¹³salutate Rufum electum in Domino et matrem eius et meam

¹⁴salutate Asyncritum Flegonta Hermen Patrobam Hermam et qui cum eis sunt fratres

¹⁵salutate Filologum et Iuliam Nereum et sororem eius et Olympiadem et omnes qui cum eis sunt sanctos

¹⁶salutate invicem in osculo sancto salutant vos omnes ecclesiae Christi

¹⁷rogo autem vos fratres ut observetis eos qui dissensiones et offendicula praeter doctrinam quam vos didicistis faciunt et declinate ab illis

¹⁸huiusmodi enim Christo Domino nostro non serviunt sed suo ventri et per dulces sermones et benedictiones seducunt corda innocentium

¹⁹vestra enim oboedientia in omnem locum divulgata est gaudeo igitur in vobis sed volo vos sapientes esse in bono et simplices in malo

²⁰Deus autem pacis conteret Satanan sub pedibus vestris velociter gratia Domini nostri Iesu Christi vobiscum

²¹salutat vos Timotheus adiutor meus et Lucius et Iason et Sosipater cognati mei

²²saluto vos ego Tertius qui scripsi epistulam in Domino

²³salutat vos Gaius hospes meus et universae ecclesiae salutat vos Erastus arcarius civitatis et Quartus frater

²⁴[]

²⁵ei autem qui potens est vos confirmare iuxta evangelium meum et praedicationem Iesu Christi secundum revelationem mysterii temporibus aeternis taciti

²⁶quod nunc patefactum est per scripturas prophetarum secundum praeceptum aeterni Dei ad oboeditionem fidei in cunctis gentibus cognito

²⁷solo sapienti Deo per Iesum Christum cui honor in saecula saeculorum amen

Ad Romanos 16

¹Commendo autem vobis Phœben sororem nostram, quæ est in ministerio ecclesiæ, quæ est in Cenchris :

²ut eam suscipiatis in Domino digne sanctis : et assistatis ei in quocumque negotio vestri indiguerit : etenim ipsa quoque astitit multis, et mihi ipsi.

³Salutate Priscam et Aquilam, adjutores meos in Christo Jesu

⁴(qui pro anima mea suas cervices supposuerunt : quibus non solus ego gratias ago, sed et cunctæ ecclesiæ gentium),

⁵et domesticam ecclesiam eorum. Salutate Epænetum dilectum mihi, qui est primitivus Asiæ in Christo.

⁶Salutate Mariam, quæ multum laboravit in vobis.

⁷Salutate Andronicum et Juniam, cognatos, et concaptivos meos : qui sunt nobiles in Apostolis, qui et ante me fuerunt in Christo.

⁸Salutate Ampliatum dilectissimum mihi in Domino.

⁹Salutate Urbanum adjutorem nostrum in Christo Jesu, et Stachyn dilectum meum.

¹⁰Salutate Apellen probum in Christo.

¹¹Salutate eos qui sunt ex Aristoboli domo. Salutate Herodionem cognatum meum. Salutate eos qui sunt ex Narcisi domo, qui sunt in Domino.

¹²Salutate Tryphænam et Tryphosam, quæ laborant in Domino. Salutate Persidem carissimam, quæ multum laboravit in Domino.

¹³Salutate Rufum electum in Domino, et matrem ejus, et meam.

¹⁴Salutate Asyncritum, Phlegontem, Hermam, Patrobam, Hermen, et qui cum eis sunt, fratres.

¹⁵Salutate Philologum et Juliam, Nereum, et sororem ejus, et Olympiadem, et omnes qui cum eis sunt, sanctos.

¹⁶Salutate invicem in osculo sancto. Salutant vos omnes ecclesiæ Christi.

¹⁷Rogo autem vos fratres, ut observetis eos qui dissensiones et offendicula, præter doctrinam, quam vos didicistis, faciunt, et declinate ab illis.

¹⁸Hujuscemodi enim Christo Domino nostro non serviunt, sed suo ventri : et per dulces sermones et benedictiones seducunt corda innocentium.

¹⁹Vestra enim obedientia in omnem locum divulgata est. Gaudeo igitur in vobis. Sed volo vos sapientes esse in bono, et simplices in malo.

²⁰Deus autem pacis conterat Satanam sub pedibus vestris velociter. Gratia Domini nostri Jesu Christi vobiscum.

²¹Salutat vos Timotheus adjutor meus, et Lucius, et Jason, et Sosipater cognati mei.

²²Saluto vos ego Tertius, qui scripsi epistolam, in Domino.

²³Salutat vos Cajus hospes meus, et universa ecclesia. Salutat vos Erastus arcarius civitatis, et Quartus, frater.

²⁴Gratia Domini nostri Jesu Christi cum omnibus vobis. Amen.

²⁵Ei autem, qui potens est vos confirmare juxta Evangelium meum, et prædicationem Jesu Christi, secundum revelationem mysterii temporibus æternis taciti

²⁶(quod nunc patefactum est per Scripturas prophetarum secundum præceptum æterni Dei, ad obeditionem fidei), in cunctis gentibus cogniti,

²⁷soli sapienti Deo, per Jesum Christum, cui honor et gloria in sæcula sæculorum. Amen.