Ecclesiasticus 9 Comparatio: Vulgate vs Clementine Vulgate

Ecclesiasticus 9

¹non zeles mulierem sinus tui ne ostendas super te malitiam doctrinae nequam

²non des mulieri potestatem animae tuae ne ingrediatur in virtute tua et confundaris

³ne respicias mulierem multivolam ne forte incidas in laqueos illius

⁴cum psaltrice ne adsiduus sis nec audias illam ne forte pereas in efficacia illius

⁵virginem ne conspicias ne forte scandalizeris in decore illius

⁶non des fornicariis animam tuam in nullo ne perdas te et hereditatem tuam

⁷noli conspicere in vicis civitatis nec oberraveris in plateis illius

⁸averte faciem tuam a muliere compta et non circumspicias speciem alienam

⁹propter speciem mulieris multi perierunt et ex hoc concupiscentia quasi ignis exardescit

¹⁰omnis mulier quae est fornicaria quasi stercus in via conculcatur

¹¹speciem mulieris alienae multi admirati reprobi facti sunt conloquium enim illius quasi ignis exardescit

¹²cum aliena muliere non accumbas super cubitum cum aliena muliere ne sedeas omnino nec accumbas cum ea super cubitum

¹³et non alterceris cum ea in vino ne forte declinet cor tuum in illa et sanguine tuo labaris in perditionem

¹⁴ne derelinquas amicum antiquum novus enim non erit similis illi

¹⁵vinum novum amicus novus veterescat et cum suavitate bibes illud

¹⁶non zeles gloriam et opes peccatoris non enim scis quae futura sit illius subversio

¹⁷non placeat tibi iniuria iniustorum sciens quoniam usque ad inferos non placebit impius

¹⁸longe abesto ab homine potestatem habente occidendi et non suspicaberis timorem mortis

¹⁹et si accesseris ad illum noli aliquid committere ne forte auferat vitam tuam

²⁰communionem mortis scito quoniam in medium laqueorum ingredieris et super dolentium arma ambulabis

²¹secundum virtutem tuam cave te a proximo et cum sapientibus et prudentibus tracta

²²viri iusti sint tibi convivae et in timore Dei sit gloriatio tibi

²³et in sensu sit tibi cogitatus et omnis narratio tua in praeceptis Altissimi

²⁴in manus artificum opera laudabitur et princeps populi in sapientia sermonis sui in sensu vero seniorum verbum

²⁵terribilis est in civitate sua homo linguosus et temerarius in verbo suo odibilis erit

Ecclesiasticus 9

¹Non zeles mulierem sinus tui, ne ostendat super te malitiam doctrinæ nequam.

²Non des mulieri potestatem animæ tuæ, ne ingrediatur in virtutem tuam, et confundaris.

³Ne respicias mulierem multivolam, ne forte incidas in laqueos illius.

⁴Cum saltatrice ne assiduus sis, nec audias illam, ne forte pereas in efficacia illius.

⁵Virginem ne conspicias, ne forte scandalizeris in decore illius.

⁶Ne des fornicariis animam tuam in ullo, ne perdas te et hæreditatem tuam.

⁷Noli circumspicere in vicis civitatis, nec oberraveris in plateis illius.

⁸Averte faciem tuam a muliere compta, et ne circumspicias speciem alienam.

⁹Propter speciem mulieris multi perierunt : et ex hoc concupiscentia quasi ignis exardescit.

¹⁰Omnis mulier quæ est fornicaria, quasi stercus in via conculcabitur.

¹¹Speciem mulieris alienæ multi admirati, reprobi facti sunt : colloquium enim illius quasi ignis exardescit.

¹²Cum aliena muliere ne sedeas omnino, nec accumbas cum ea super cubitum :

¹³et non alterceris cum illa in vino, ne forte declinet cor tuum in illam, et sanguine tuo labaris in perditionem.

¹⁴Ne derelinquas amicum antiquum : novus enim non erit similis illi.

¹⁵Vinum novum amicus novus : veterascet, et cum suavitate bibes illud.

¹⁶Non zeles gloriam et opes peccatoris : non enim scis quæ futura sit illius subversio.

¹⁷Non placeat tibi injuria injustorum, sciens quoniam usque ad inferos non placebit impius.

¹⁸Longe abesto ab homine potestatem habente occidendi, et non suspicaberis timorem mortis.

¹⁹Et si accesseris ad illum, noli aliquid committere, ne forte auferat vitam tuam.

²⁰Communionem mortis scito, quoniam in medio laqueorum ingredieris, et super dolentium arma ambulabis.

²¹Secundum virtutem tuam cave te a proximo tuo, et cum sapientibus et prudentibus tracta.

²²Viri justi sint tibi convivæ, et in timore Dei sit tibi gloriatio :

²³et in sensu sit tibi cogitatus Dei, et omnis enarratio tua in præceptis Altissimi.

²⁴In manu artificum opera laudabuntur, et princeps populi in sapientia sermonis sui, in sensu vero seniorum verbum.

²⁵Terribilis est in civitate sua homo linguosus : et temerarius in verbo suo odibilis erit.