Ad Philemonem 1 Comparatio: Vulgate vs Clementine Vulgate

Ad Philemonem 1

¹Paulus vinctus Iesu Christi et Timotheus frater Philemoni dilecto et adiutori nostro

²et Appiae sorori et Archippo commilitoni nostro et ecclesiae quae in domo tua est

³gratia vobis et pax a Deo Patre nostro et Domino Iesu Christo

⁴gratias ago Deo meo semper memoriam tui faciens in orationibus meis

⁵audiens caritatem tuam et fidem quam habes in Domino Iesu et in omnes sanctos

⁶ut communicatio fidei tuae evidens fiat in agnitione omnis boni in nobis in Christo Iesu

⁷gaudium enim magnum habui et consolationem in caritate tua quia viscera sanctorum requieverunt per te frater

⁸propter quod multam fiduciam habentes in Christo Iesu imperandi tibi quod ad rem pertinet

⁹propter caritatem magis obsecro cum sis talis ut Paulus senex nunc autem et vinctus Iesu Christi

¹⁰obsecro te de meo filio quem genui in vinculis Onesimo

¹¹qui tibi aliquando inutilis fuit nunc autem et tibi et mihi utilis

¹²quem remisi tu autem illum id est mea viscera suscipe

¹³quem ego volueram mecum detinere ut pro te mihi ministraret in vinculis evangelii

¹⁴sine consilio autem tuo nihil volui facere uti ne velut ex necessitate bonum tuum esset sed voluntarium

¹⁵forsitan enim ideo discessit ad horam a te ut aeternum illum recipere

¹⁶iam non ut servum sed plus servo carissimum fratrem maxime mihi quanto autem magis tibi et in carne et in Domino

¹⁷si ergo habes me socium suscipe illum sicut me

¹⁸si autem aliquid nocuit tibi aut debet hoc mihi inputa

¹⁹ego Paulus scripsi mea manu ego reddam ut non dicam tibi quod et te ipsum mihi debes

²⁰ita frater ego te fruar in Domino refice viscera mea in Domino

²¹confidens oboedientia tua scripsi tibi sciens quoniam et super id quod dico facies

²²simul autem et para mihi hospitium nam spero per orationes vestras donari me vobis

²³salutat te Epaphras concaptivus meus in Christo Iesu

²⁴Marcus Aristarchus Demas Lucas adiutores mei

²⁵gratia Domini nostri Iesu Christi cum spiritu vestro amen

Ad Philemonem 1

¹Paulus vinctus Christi Jesu, et Timotheus frater, Philemoni dilecto, et adjutori nostro,

²et Appiæ sorori carissimæ, et Archippo commilitoni nostro, et ecclesiæ, quæ in domo tua est.

³Gratia vobis, et pax a Deo Patre nostro, et Domino Jesu Christo.

⁴Gratias ago Deo meo, semper memoriam tui faciens in orationibus meis,

⁵audiens caritatem tuam, et fidem, quam habes in Domino Jesu, et in omnes sanctos :

⁶ut communicatio fidei tuæ evidens fiat in agnitione omnis operis boni, quod est in vobis in Christo Jesu.

⁷Gaudium enim magnum habui, et consolationem in caritate tua : quia viscera sanctorum requieverunt per te, frater.

⁸Propter quod multam fiduciam habens in Christo Jesu imperandi tibi quod ad rem pertinet :

⁹propter caritatem magis obsecro, cum sis talis, ut Paulus senex, nunc autem et vinctus Jesu Christi :

¹⁰obsecro te pro meo filio, quem genui in vinculis, Onesimo,

¹¹qui tibi aliquando inutilis fuit, nunc autem et mihi et tibi utilis,

¹²quem remisi tibi. Tu autem illum, ut mea viscera, suscipe :

¹³quem ego volueram mecum detinere, ut pro te mihi ministraret in vinculis Evangelii :

¹⁴sine consilio autem tuo nihil volui facere, uti ne velut ex necessitate bonum tuum esset, sed voluntarium.

¹⁵Forsitan enim ideo discessit ad horam a te, ut æternum illum reciperes :

¹⁶jam non ut servum, sed pro servo carissimum fratrem, maxime mihi : quanto autem magis tibi et in carne, et in Domino ?

¹⁷Si ergo habes me socium, suscipe illum sicut me :

¹⁸si autem aliquid nocuit tibi, aut debet, hoc mihi imputa.

¹⁹Ego Paulus scripsi mea manu : ego reddam, ut non dicam tibi, quod et teipsum mihi debes :

²⁰ita, frater. Ego te fruar in Domino : refice viscera mea in Domino.

²¹Confidens in obedientia tua scripsi tibi : sciens quoniam et super id, quod dico, facies.

²²Simul autem et para mihi hospitium : nam spero per orationes vestras donari me vobis.

²³Salutat te Epaphras concaptivus meus in Christo Jesu,

²⁴Marcus, Aristarchus, Demas, et Lucas, adjutores mei.

²⁵Gratia Domini nostri Jesu Christi cum spiritu vestro. Amen.