Ad Hebraeos 11

¹est autem fides sperandorum substantia rerum argumentum non parentum

²in hac enim testimonium consecuti sunt senes

³fide intellegimus aptata esse saecula verbo Dei ut ex invisibilibus visibilia fierent

⁴fide plurimam hostiam Abel quam Cain obtulit Deo per quam testimonium consecutus est esse iustus testimonium perhibente muneribus eius Deo et per illam defunctus adhuc loquitur

⁵fide Enoch translatus est ne videret mortem et non inveniebatur quia transtulit illum Deus ante translationem enim testimonium habebat placuisse Deo

⁶sine fide autem inpossibile placere credere enim oportet accedentem ad Deum quia est et inquirentibus se remunerator fit

⁷fide Noe responso accepto de his quae adhuc non videbantur metuens aptavit arcam in salutem domus suae per quam damnavit mundum et iustitiae quae per fidem est heres est institutus

⁸fide qui vocatur Abraham oboedivit in locum exire quem accepturus erat in hereditatem et exiit nesciens quo iret

⁹fide moratus est in terra repromissionis tamquam in aliena in casulis habitando cum Isaac et Iacob coheredibus repromissionis eiusdem

¹⁰expectabat enim fundamenta habentem civitatem cuius artifex et conditor Deus

¹¹fide et ipsa Sarra sterilis virtutem in conceptionem seminis accepit etiam praeter tempus aetatis quoniam fidelem credidit esse qui promiserat

¹²propter quod et ab uno orti sunt et haec emortuo tamquam sidera caeli in multitudinem et sicut harena quae est ad oram maris innumerabilis

¹³iuxta fidem defuncti sunt omnes isti non acceptis repromissionibus sed a longe eas aspicientes et salutantes et confitentes quia peregrini et hospites sunt supra terram

¹⁴qui enim haec dicunt significant se patriam inquirere

¹⁵et si quidem illius meminissent de qua exierunt habebant utique tempus revertendi

¹⁶nunc autem meliorem appetunt id est caelestem ideo non confunditur Deus vocari Deus eorum paravit enim illis civitatem

¹⁷fide obtulit Abraham Isaac cum temptaretur et unigenitum offerebat qui susceperat repromissiones

¹⁸ad quem dictum est quia in Isaac vocabitur tibi semen

¹⁹arbitrans quia et a mortuis suscitare potens est Deus unde eum et in parabola accepit

²⁰fide et de futuris benedixit Isaac Iacob et Esau

²¹fide Iacob moriens singulis filiorum Ioseph benedixit et adoravit fastigium virgae eius

²²fide Ioseph moriens de profectione filiorum Israhel memoratus est et de ossibus suis mandavit

²³fide Moses natus occultatus est mensibus tribus a parentibus suis eo quod vidissent elegantem infantem et non timuerunt regis edictum

²⁴fide Moses grandis factus negavit se esse filium filiae Pharaonis

²⁵magis eligens adfligi cum populo Dei quam temporalis peccati habere iucunditatem

²⁶maiores divitias aestimans thesauro Aegyptiorum inproperium Christi aspiciebat enim in remunerationem

²⁷fide reliquit Aegyptum non veritus animositatem regis invisibilem enim tamquam videns sustinuit

²⁸fide celebravit pascha et sanguinis effusionem ne qui vastabat primitiva tangeret eos

²⁹fide transierunt mare Rubrum tamquam per aridam terram quod experti Aegyptii devorati sunt

³⁰fide muri Hiericho ruerunt circuiti dierum septem

³¹fide Raab meretrix non periit cum incredulis excipiens exploratores cum pace

³²et quid adhuc dicam deficiet enim me tempus enarrantem de Gedeon Barac Samson Iepthae David et Samuhel et prophetis

³³qui per fidem devicerunt regna operati sunt iustitiam adepti sunt repromissiones obturaverunt ora leonum

³⁴extinxerunt impetum ignis effugerunt aciem gladii convaluerunt de infirmitate fortes facti sunt in bello castra verterunt exterorum

³⁵acceperunt mulieres de resurrectione mortuos suos alii autem distenti sunt non suscipientes redemptionem ut meliorem invenirent resurrectionem

³⁶alii vero ludibria et verbera experti insuper et vincula et carceres

³⁷lapidati sunt secti sunt temptati sunt in occisione gladii mortui sunt circumierunt in melotis in pellibus caprinis egentes angustiati adflicti

³⁸quibus dignus non erat mundus in solitudinibus errantes et montibus et speluncis et in cavernis terrae

³⁹et hii omnes testimonio fidei probati non acceperunt repromissionem

⁴⁰Deo pro nobis melius aliquid providente ut ne sine nobis consummarentur

Ad Hebraeos 11

¹Est autem fides sperandarum substantia rerum, argumentum non apparentium.

²In hac enim testimonium consecuti sunt senes.

³Fide intelligimus aptata esse sæcula verbo Dei : ut ex invisibilibus visibilia fierent.

⁴Fide plurimam hostiam Abel, quam Cain, obtulit Deo, per quam testimonium consecutus est esse justus, testimonium perhibente muneribus ejus Deo, et per illam defunctus adhuc loquitur.

⁵Fide Henoch translatus est ne videret mortem, et non inveniebatur, quia transtulit illum Deus : ante translationem enim testimonium habuit placuisse Deo.

⁶Sine fide autem impossibile est placere Deo. Credere enim oportet accedentem ad Deum quia est, et inquirentibus se remunerator sit.

⁷Fide Noë responso accepto de iis quæ adhuc non videbantur, metuens aptavit arcam in salutem domus suæ, per quam damnavit mundum : et justitiæ, quæ per fidem est, hæres est institutus.

⁸Fide qui vocatur Abraham obedivit in locum exire, quem accepturus erat in hæreditatem : et exiit, nesciens quo iret.

⁹Fide demoratus est in terra repromissionis, tamquam in aliena, in casulis habitando cum Isaac et Jacob cohæredibus repromissionis ejusdem.

¹⁰Exspectabat enim fundamenta habentem civitatem : cujus artifex et conditor Deus.

¹¹Fide et ipsa Sara sterilis virtutem in conceptionem seminis accepit, etiam præter tempus ætatis : quoniam fidelem credidit esse eum qui repromiserat.

¹²Propter quod et ab uno orti sunt (et hoc emortuo) tamquam sidera cæli in multitudinem, et sicut arena, quæ est ad oram maris, innumerabilis.

¹³Juxta fidem defuncti sunt omnes isti, non acceptis repromissionibus, sed a longe eas aspicientes, et salutantes, et confitentes quia peregrini et hospites sunt super terram.

¹⁴Qui enim hæc dicunt, significant se patriam inquirere.

¹⁵Et si quidem ipsius meminissent de qua exierunt, habebant utique tempus revertendi :

¹⁶nunc autem meliorem appetunt, id est, cælestem. Ideo non confunditur Deus vocari Deus eorum : paravit enim illis civitatem.

¹⁷Fide obtulit Abraham Isaac, cum tentaretur, et unigenitum offerebat, qui susceperat repromissiones :

¹⁸ad quem dictum est : Quia in Isaac vocabitur tibi semen :

¹⁹arbitrans quia et a mortuis suscitare potens est Deus : unde eum et in parabolam accepit.

²⁰Fide et de futuris benedixit Isaac Jacob et Esau.

²¹Fide Jacob, moriens, singulos filiorum Joseph benedixit : et adoravit fastigium virgæ ejus.

²²Fide Joseph, moriens, de profectione filiorum Israël memoratus est, et de ossibus suis mandavit.

²³Fide Moyses, natus, occultatus est mensibus tribus a parentibus suis, eo quod vidissent elegantem infantem, et non timuerunt regis edictum.

²⁴Fide Moyses grandis factus negavit se esse filium filiæ Pharaonis,

²⁵magis eligens affligi cum populo Dei, quam temporalis peccati habere jucunditatem,

²⁶majores divitias æstimans thesauro Ægyptiorum, improperium Christi : aspiciebat enim in remunerationem.

²⁷Fide reliquit Ægyptum, non veritus animositatem regis : invisibilem enim tamquam videns sustinuit.

²⁸Fide celebravit Pascha, et sanguinis effusionem : ne qui vastabat primitiva, tangeret eos.

²⁹Fide transierunt mare Rubrum tamquam per aridam terram : quod experti Ægyptii, devorati sunt.

³⁰Fide muri Jericho corruerunt, circuitu dierum septem.

³¹Fide Rahab meretrix non periit cum incredulis, excipiens exploratores cum pace.

³²Et quid adhuc dicam ? deficiet enim me tempus enarrantem de Gedeon, Barac, Samson, Jephte, David, Samuel, et prophetis :

³³qui per fidem vicerunt regna, operati sunt justitiam, adepti sunt repromissiones, obturaverunt ora leonum,

³⁴extinxerunt impetum ignis, effugerunt aciem gladii, convaluerunt de infirmitate, fortes facti sunt in bello, castra verterunt exterorum :

³⁵acceperunt mulieres de resurrectione mortuos suos : alii autem distenti sunt non suscipientes redemptionem ut meliorem invenirent resurrectionem.

³⁶Alii vero ludibria, et verbera experti, insuper et vincula, et carceres :

³⁷lapidati sunt, secti sunt, tentati sunt, in occisione gladii mortui sunt, circuierunt in melotis, in pellibus caprinis, egentes, angustiati, afflicti :

³⁸quibus dignus non erat mundus : in solitudinibus errantes, in montibus, in speluncis, et in cavernis terræ.

³⁹Et hi omnes testimonio fidei probati, non acceperunt repromissionem,

⁴⁰Deo pro nobis melius aliquid providente, ut non sine nobis consummarentur.