Ad Galatas 3 Comparatio: Vulgate vs Clementine Vulgate

Ad Galatas 3

¹o insensati Galatae quis vos fascinavit ante quorum oculos Iesus Christus proscriptus est crucifixus

²hoc solum volo a vobis discere ex operibus legis Spiritum accepistis an ex auditu fidei

³sic stulti estis cum Spiritu coeperitis nunc carne consummamini

⁴tanta passi estis sine causa si tamen sine causa

⁵qui ergo tribuit vobis Spiritum et operatur virtutes in vobis ex operibus legis an ex auditu fidei

⁶sicut Abraham credidit Deo et reputatum est ei ad iustitiam

⁷cognoscitis ergo quia qui ex fide sunt hii sunt filii Abrahae

⁸providens autem scriptura quia ex fide iustificat gentes Deus praenuntiavit Abrahae quia benedicentur in te omnes gentes

⁹igitur qui ex fide sunt benedicentur cum fideli Abraham

¹⁰quicumque enim ex operibus legis sunt sub maledicto sunt scriptum est enim maledictus omnis qui non permanserit in omnibus quae scripta sunt in libro legis ut faciat ea

¹¹quoniam autem in lege nemo iustificatur apud Deum manifestum est quia iustus ex fide vivit

¹²lex autem non est ex fide sed qui fecerit ea vivet in illis

¹³Christus nos redemit de maledicto legis factus pro nobis maledictum quia scriptum est maledictus omnis qui pendet in ligno

¹⁴ut in gentibus benedictio Abrahae fieret in Christo Iesu ut pollicitationem Spiritus accipiamus per fidem

¹⁵fratres secundum hominem dico tamen hominis confirmatum testamentum nemo spernit aut superordinat

¹⁶Abrahae dictae sunt promissiones et semini eius non dicit et seminibus quasi in multis sed quasi in uno et semini tuo qui est Christus

¹⁷hoc autem dico testamentum confirmatum a Deo quae post quadringentos et triginta annos facta est lex non irritam facit ad evacuandam promissionem

¹⁸nam si ex lege hereditas iam non ex repromissione Abrahae autem per promissionem donavit Deus

¹⁹quid igitur lex propter transgressiones posita est donec veniret semen cui promiserat ordinata per angelos in manu mediatoris

²⁰mediator autem unius non est Deus autem unus est

²¹lex ergo adversus promissa Dei absit si enim data esset lex quae posset vivificare vere ex lege esset iustitia

²²sed conclusit scriptura omnia sub peccato ut promissio ex fide Iesu Christi daretur credentibus

²³prius autem quam veniret fides sub lege custodiebamur conclusi in eam fidem quae revelanda erat

²⁴itaque lex pedagogus noster fuit in Christo ut ex fide iustificemur

²⁵at ubi venit fides iam non sumus sub pedagogo

²⁶omnes enim filii Dei estis per fidem in Christo Iesu

²⁷quicumque enim in Christo baptizati estis Christum induistis

²⁸non est Iudaeus neque Graecus non est servus neque liber non est masculus neque femina omnes enim vos unum estis in Christo Iesu

²⁹si autem vos Christi ergo Abrahae semen estis secundum promissionem heredes

Ad Galatas 3

¹O insensati Galatæ, quis vos fascinavit non obedire veritati, ante quorum oculos Jesus Christus præscriptus est, in vobis crucifixus ?

²Hoc solum a vobis volo discere : ex operibus legis Spiritum accepistis, an ex auditu fidei ?

³sic stulti estis, ut cum Spiritu cœperitis, nunc carne consummemini ?

⁴tanta passi estis sine causa ? si tamen sine causa.

⁵Qui ergo tribuit vobis Spiritum, et operatur virtutes in vobis : ex operibus legis, an ex auditu fidei ?

⁶Sicut scriptum est : Abraham credidit Deo, et reputatum est illi ad justitiam :

⁷cognoscite ergo quia qui ex fide sunt, ii sunt filii Abrahæ.

⁸Providens autem Scriptura quia ex fide justificat gentes Deus, prænuntiavit Abrahæ : Quia benedicentur in te omnes gentes.

⁹Igitur qui ex fide sunt, benedicentur cum fideli Abraham.

¹⁰Quicumque enim ex operibus legis sunt, sub maledicto sunt. Scriptum est enim : Maledictus omnis qui non permanserit in omnibus quæ scripta sunt in libro legis ut faciat ea.

¹¹Quoniam autem in lege nemo justificatur apud Deum, manifestum est : quia justus ex fide vivit.

¹²Lex autem non est ex fide, sed : Qui fecerit ea, vivet in illis.

¹³Christus nos redemit de maledicto legis, factus pro nobis maledictum : quia scriptum est : Maledictus omnis qui pendet in ligno :

¹⁴ut in gentibus benedictio Abrahæ fieret in Christo Jesu, ut pollicitationem Spiritus accipiamus per fidem.

¹⁵Fratres (secundum hominem dico) tamen hominis confirmatum testamentum nemo spernit, aut superordinat.

¹⁶Abrahæ dictæ sunt promissiones, et semini ejus. Non dicit : Et seminibus, quasi in multis : sed quasi in uno : Et semini tuo, qui est Christus.

¹⁷Hoc autem dico, testamentum confirmatum a Deo : quæ post quadringentos et triginta annos facta est lex, non irritum facit ad evacuandam promissionem.

¹⁸Nam si ex lege hæreditas, jam non ex promissione. Abrahæ autem per repromissionem donavit Deus.

¹⁹Quid igitur lex ? Propter transgressiones posita est donec veniret semen, cui promiserat, ordinata per angelos in manu mediatoris.

²⁰Mediator autem unius non est : Deus autem unus est.

²¹Lex ergo adversus promissa Dei ? Absit. Si enim data esset lex, quæ posset vivificare, vere ex lege esset justitia.

²²Sed conclusit Scriptura omnia sub peccato, ut promissio ex fide Jesu Christi daretur credentibus.

²³Prius autem quam veniret fides, sub lege custodiebamur conclusi in eam fidem quæ revelanda erat.

²⁴Itaque lex pædagogus noster fuit in Christo, ut ex fide justificemur.

²⁵At ubi venit fides, jam non sumus sub pædagogo.

²⁶Omnes enim filii Dei estis per fidem, quæ est in Christo Jesu.

²⁷Quicumque enim in Christo baptizati estis, Christum induistis.

²⁸Non est Judæus, neque Græcus : non est servus, neque liber : non est masculus, neque femina. Omnes enim vos unum estis in Christo Jesu.

²⁹Si autem vos Christi, ergo semen Abrahæ estis, secundum promissionem hæredes.