Ad Galatas 2

¹deinde post annos quattuordecim iterum ascendi Hierosolyma cum Barnaba adsumpto et Tito

²ascendi autem secundum revelationem et contuli cum illis evangelium quod praedico in gentibus seorsum autem his qui videbantur ne forte in vacuum currerem aut cucurrissem

³sed neque Titus qui mecum erat cum esset gentilis conpulsus est circumcidi

⁴sed propter subintroductos falsos fratres qui subintroierunt explorare libertatem nostram quam habemus in Christo Iesu ut nos in servitutem redigerent

⁵quibus neque ad horam cessimus subiectioni ut veritas evangelii permaneat apud vos

⁶ab his autem qui videbantur esse aliquid quales aliquando fuerint nihil mea interest Deus personam hominis non accipit mihi enim qui videbantur nihil contulerunt

⁷sed e contra cum vidissent quod creditum est mihi evangelium praeputii sicut Petro circumcisionis

⁸qui enim operatus est Petro in apostolatum circumcisionis operatus est et mihi inter gentes

⁹et cum cognovissent gratiam quae data est mihi Iacobus et Cephas et Iohannes qui videbantur columnae esse dextras dederunt mihi et Barnabae societatis ut nos in gentes ipsi autem in circumcisionem

¹⁰tantum ut pauperum memores essemus quod etiam sollicitus fui hoc ipsum facere

¹¹cum autem venisset Cephas Antiochiam in faciem ei restiti quia reprehensibilis erat

¹²prius enim quam venirent quidam ab Iacobo cum gentibus edebat cum autem venissent subtrahebat et segregabat se timens eos qui ex circumcisione erant

¹³et simulationi eius consenserunt ceteri Iudaei ita ut et Barnabas duceretur ab eis in illa simulatione

¹⁴sed cum vidissem quod non recte ambularent ad veritatem evangelii dixi Cephae coram omnibus si tu cum Iudaeus sis gentiliter et non iudaice vivis quomodo gentes cogis iudaizare

¹⁵nos natura Iudaei et non ex gentibus peccatores

¹⁶scientes autem quod non iustificatur homo ex operibus legis nisi per fidem Iesu Christi et nos in Christo Iesu credidimus ut iustificemur ex fide Christi et non ex operibus legis propter quod ex operibus legis non iustificabitur omnis caro

¹⁷quod si quaerentes iustificari in Christo inventi sumus et ipsi peccatores numquid Christus peccati minister est absit

¹⁸si enim quae destruxi haec iterum aedifico praevaricatorem me constituo

¹⁹ego enim per legem legi mortuus sum ut Deo vivam Christo confixus sum cruci

²⁰vivo autem iam non ego vivit vero in me Christus quod autem nunc vivo in carne in fide vivo Filii Dei qui dilexit me et tradidit se ipsum pro me

²¹non abicio gratiam Dei si enim per legem iustitia ergo Christus gratis mortuus est

Ad Galatas 2

¹Deinde post annos quatuordecim, iterum ascendi Jerosolymam cum Barnaba, assumpto et Tito.

²Ascendi autem secundum revelationem : et contuli cum illis Evangelium, quod prædico in gentibus, seorsum autem iis qui videbantur aliquid esse : ne forte in vacuum currerem, aut cucurrissem.

³Sed neque Titus, qui mecum erat, cum esset gentilis, compulsus est circumcidi :

⁴sed propter subintroductos falsos fratres, qui subintroierunt explorare libertatem nostram, quam habemus in Christo Jesu, ut nos in servitutem redigerent.

⁵Quibus neque ad horam cessimus subjectione, ut veritas Evangelii permaneat apud vos :

⁶ab iis autem, qui videbantur esse aliquid (quales aliquando fuerint, nihil mea interest : Deus personam hominis non accipit) : mihi enim qui videbantur esse aliquid, nihil contulerunt.

⁷Sed e contra cum vidissent quod creditum est mihi Evangelium præputii, sicut et Petro circumcisionis

⁸(qui enim operatus est Petro in apostolatum circumcisionis, operatus est et mihi inter gentes) :

⁹et cum cognovissent gratiam, quæ data est mihi, Jacobus, et Cephas, et Joannes, qui videbantur columnæ esse, dextras dederunt mihi, et Barnabæ societatis : ut nos in gentes, ipsi autem in circumcisionem :

¹⁰tantum ut pauperum memores essemus, quod etiam sollicitus fui hoc ipsum facere.

¹¹Cum autem venisset Cephas Antiochiam, in faciem ei restiti, quia reprehensibilis erat.

¹²Prius enim quam venirent quidam a Jacobo, cum gentibus edebat : cum autem venissent, subtrahebat, et segregabat se, timens eos qui ex circumcisione erant.

¹³Et simulationi ejus consenserunt ceteri Judæi, ita ut et Barnabas duceretur ab eis in illam simulationem.

¹⁴Sed cum vidissem quod non recte ambularent ad veritatem Evangelii, dixi Cephæ coram omnibus : Si tu, cum Judæus sis, gentiliter vivis, et non judaice : quomodo gentes cogis judaizare ?

¹⁵Nos natura Judæi, et non ex gentibus peccatores.

¹⁶Scientes autem quod non justificatur homo ex operibus legis, nisi per fidem Jesu Christi : et nos in Christo Jesu credimus, ut justificemur ex fide Christi, et non ex operibus legis : propter quod ex operibus legis non justificabitur omnis caro.

¹⁷Quod si quærentes justificari in Christo, inventi sumus et ipsi peccatores, numquid Christus peccati minister est ? Absit.

¹⁸Si enim quæ destruxi, iterum hæc ædifico : prævaricatorem me constituo.

¹⁹Ego enim per legem, legi mortuus sum, ut Deo vivam : Christo confixus sum cruci.

²⁰Vivo autem, jam non ego : vivit vero in me Christus. Quod autem nunc vivo in carne : in fide vivo Filii Dei, qui dilexit me, et tradidit semetipsum pro me.

²¹Non abjicio gratiam Dei. Si enim per legem justitia, ergo gratis Christus mortuus est.