Ad Galatas 4 Comparatio: Vulgate vs Clementine Vulgate

Ad Galatas 4

¹dico autem quanto tempore heres parvulus est nihil differt servo cum sit dominus omnium

²sed sub tutoribus est et actoribus usque ad praefinitum tempus a patre

³ita et nos cum essemus parvuli sub elementis mundi eramus servientes

⁴at ubi venit plenitudo temporis misit Deus Filium suum factum ex muliere factum sub lege

⁵ut eos qui sub lege erant redimeret ut adoptionem filiorum reciperemus

⁶quoniam autem estis filii misit Deus Spiritum Filii sui in corda nostra clamantem Abba Pater

⁷itaque iam non es servus sed filius quod si filius et heres per Deum

⁸sed tunc quidem ignorantes Deum his qui natura non sunt dii serviebatis

⁹nunc autem cum cognoveritis Deum immo cogniti sitis a Deo quomodo convertimini iterum ad infirma et egena elementa quibus denuo servire vultis

¹⁰dies observatis et menses et tempora et annos

¹¹timeo vos ne forte sine causa laboraverim in vobis

¹²estote sicut et ego quia et ego sicut vos fratres obsecro vos nihil me laesistis

¹³scitis autem quia per infirmitatem carnis evangelizavi vobis iam pridem

¹⁴et temptationem vestram in carne mea non sprevistis neque respuistis sed sicut angelum Dei excepistis me sicut Christum Iesum

¹⁵ubi est ergo beatitudo vestra testimonium enim perhibeo vobis quia si fieri posset oculos vestros eruissetis et dedissetis mihi

¹⁶ergo inimicus vobis factus sum verum dicens vobis

¹⁷aemulantur vos non bene sed excludere vos volunt ut illos aemulemini

¹⁸bonum autem aemulamini in bono semper et non tantum cum praesens sum apud vos

¹⁹filioli mei quos iterum parturio donec formetur Christus in vobis

²⁰vellem autem esse apud vos modo et mutare vocem meam quoniam confundor in vobis

²¹dicite mihi qui sub lege vultis esse legem non legistis

²²scriptum est enim quoniam Abraham duos filios habuit unum de ancilla et unum de libera

²³sed qui de ancilla secundum carnem natus est qui autem de libera per repromissionem

²⁴quae sunt per allegoriam dicta haec enim sunt duo testamenta unum quidem a monte Sina in servitutem generans quae est Agar

²⁵Sina enim mons est in Arabia qui coniunctus est ei quae nunc est Hierusalem et servit cum filiis eius

²⁶illa autem quae sursum est Hierusalem libera est quae est mater nostra

²⁷scriptum est enim laetare sterilis quae non paris erumpe et exclama quae non parturis quia multi filii desertae magis quam eius quae habet virum

²⁸nos autem fratres secundum Isaac promissionis filii sumus

²⁹sed quomodo tunc qui secundum carnem natus fuerat persequebatur eum qui secundum spiritum ita et nunc

³⁰sed quid dicit scriptura eice ancillam et filium eius non enim heres erit filius ancillae cum filio liberae

³¹itaque fratres non sumus ancillae filii sed liberae qua libertate nos Christus liberavit

Ad Galatas 4

¹Dico autem : quanto tempore hæres parvulus est, nihil differt a servo, cum sit dominus omnium :

²sed sub tutoribus et actoribus est usque ad præfinitum tempus a patre :

³ita et nos cum essemus parvuli, sub elementis mundi eramus servientes.

⁴At ubi venit plenitudo temporis, misit Deus Filium suum factum ex muliere, factum sub lege,

⁵ut eos, qui sub lege erant, redimeret, ut adoptionem filiorum reciperemus.

⁶Quoniam autem estis filii, misit Deus Spiritum Filii sui in corda vestra, clamantem : Abba, Pater.

⁷Itaque jam non est servus, sed filius : quod si filius, et hæres per Deum.

⁸Sed tunc quidem ignorantes Deum, iis, qui natura non sunt dii, serviebatis.

⁹Nunc autem cum cognoveritis Deum, immo cogniti sitis a Deo : quomodo convertimini iterum ad infirma et egena elementa, quibus denuo servire vultis ?

¹⁰Dies observatis, et menses, et tempora, et annos.

¹¹Timeo vos, ne forte sine causa laboraverim in vobis.

¹²Estote sicut ego, quia et ego sicut vos : fratres, obsecro vos. Nihil me læsistis.

¹³Scitis autem quia per infirmitatem carnis evangelizavi vobis jampridem : et tentationem vestram in carne mea

¹⁴non sprevistis, neque respuistis : sed sicut angelum Dei excepistis me, sicut Christum Jesum.

¹⁵Ubi est ergo beatitudo vestra ? testimonium enim perhibeo vobis, quia, si fieri posset, oculos vestros eruissetis, et dedissetis mihi.

¹⁶Ergo inimicus vobis factus sum, verum dicens vobis ?

¹⁷Æmulantur vos non bene : sed excludere vos volunt, ut illos æmulemini.

¹⁸Bonum autem æmulamini in bono semper : et non tantum cum præsens sum apud vos.

¹⁹Filioli mei, quos iterum parturio, donec formetur Christus in vobis :

²⁰vellem autem esse apud vos modo, et mutare vocem meam : quoniam confundor in vobis.

²¹Dicite mihi qui sub lege vultis esse : legem non legistis ?

²²Scriptum est enim : Quoniam Abraham duos filios habuit : unum de ancilla, et unum de libera.

²³Sed qui de ancilla, secundum carnem natus est : qui autem de libera, per repromissionem :

²⁴quæ sunt per allegoriam dicta. Hæc enim sunt duo testamenta. Unum quidem in monte Sina, in servitutem generans, quæ est Agar :

²⁵Sina enim mons est in Arabia, qui conjunctus est ei quæ nunc est Jerusalem, et servit cum filiis suis.

²⁶Illa autem, quæ sursum est Jerusalem, libera est, quæ est mater nostra.

²⁷Scriptum est enim : Lætare, sterilis, quæ non paris ; erumpe et clama, quæ non parturis : quia multi filii desertæ, magis quam ejus quæ habet virum.

²⁸Nos autem, fratres, secundum Isaac promissionis filii sumus.

²⁹Sed quomodo tunc is, qui secundum carnem natus fuerat, persequebatur eum qui secundum spiritum : ita et nunc.

³⁰Sed quid dicit Scriptura ? Ejice ancillam, et filium ejus : non enim hæres erit filius ancillæ cum filio liberæ.

³¹Itaque, fratres, non sumus ancillæ filii, sed liberæ : qua libertate Christus nos liberavit.