Ad Ephesios 2 Comparatio: Vulgate vs Clementine Vulgate

Ad Ephesios 2

¹et vos cum essetis mortui delictis et peccatis vestris

²in quibus aliquando ambulastis secundum saeculum mundi huius secundum principem potestatis aeris huius spiritus qui nunc operatur in filios diffidentiae

³in quibus et nos omnes aliquando conversati sumus in desideriis carnis nostrae facientes voluntates carnis et cogitationum et eramus natura filii irae sicut et ceteri

⁴Deus autem qui dives est in misericordia propter nimiam caritatem suam qua dilexit nos

⁵et cum essemus mortui peccatis convivificavit nos Christo gratia estis salvati

⁶et conresuscitavit et consedere fecit in caelestibus in Christo Iesu

⁷ut ostenderet in saeculis supervenientibus abundantes divitias gratiae suae in bonitate super nos in Christo Iesu

⁸gratia enim estis salvati per fidem et hoc non ex vobis Dei enim donum est

⁹non ex operibus ut ne quis glorietur

¹⁰ipsius enim sumus factura creati in Christo Iesu in operibus bonis quae praeparavit Deus ut in illis ambulemus

¹¹propter quod memores estote quod aliquando vos gentes in carne qui dicimini praeputium ab ea quae dicitur circumcisio in carne manufacta

¹²quia eratis illo in tempore sine Christo alienati a conversatione Israhel et hospites testamentorum promissionis spem non habentes et sine Deo in mundo

¹³nunc autem in Christo Iesu vos qui aliquando eratis longe facti estis prope in sanguine Christi

¹⁴ipse est enim pax nostra qui fecit utraque unum et medium parietem maceriae solvens inimicitiam in carne sua

¹⁵legem mandatorum decretis evacuans ut duos condat in semet ipsum in unum novum hominem faciens pacem

¹⁶et reconciliet ambos in uno corpore Deo per crucem interficiens inimicitiam in semet ipso

¹⁷et veniens evangelizavit pacem vobis qui longe fuistis et pacem his qui prope

¹⁸quoniam per ipsum habemus accessum ambo in uno Spiritu ad Patrem

¹⁹ergo iam non estis hospites et advenae sed estis cives sanctorum et domestici Dei

²⁰superaedificati super fundamentum apostolorum et prophetarum ipso summo angulari lapide Christo Iesu

²¹in quo omnis aedificatio constructa crescit in templum sanctum in Domino

²²in quo et vos coaedificamini in habitaculum Dei in Spiritu

Ad Ephesios 2

¹Et vos, cum essetis mortui delictis et peccatis vestris,

²in quibus aliquando ambulastis secundum sæculum mundi hujus, secundum principem potestatis aëris hujus, spiritus, qui nunc operatur in filios diffidentiæ,

³in quibus et nos omnes aliquando conversati sumus in desideriis carnis nostræ, facientes voluntatem carnis et cogitationum, et eramus natura filii iræ, sicut et ceteri :

⁴Deus autem, qui dives est in misericordia, propter nimiam caritatem suam, qua dilexit nos,

⁵et cum essemus mortui peccatis, convivificavit nos in Christo (cujus gratia estis salvati),

⁶et conresuscitavit, et consedere fecit in cælestibus in Christo Jesu :

⁷ut ostenderet in sæculis supervenientibus abundantes divitias gratiæ suæ, in bonitate super nos in Christo Jesu.

⁸Gratia enim estis salvati per fidem, et hoc non ex vobis : Dei enim donum est :

⁹non ex operibus, ut ne quis glorietur.

¹⁰Ipsius enim sumus factura, creati in Christo Jesu in operibus bonis, quæ præparavit Deus ut in illis ambulemus.

¹¹Propter quod memores estote quod aliquando vos gentes in carne, qui dicimini præputium ab ea quæ dicitur circumcisio in carne, manu facta :

¹²quia eratis illo in tempore sine Christo, alienati a conversatione Israël, et hospites testamentorum, promissionis spem non habentes, et sine Deo in hoc mundo.

¹³Nunc autem in Christo Jesu, vos, qui aliquando eratis longe, facti estis prope in sanguine Christi.

¹⁴Ipse enim est pax nostra, qui fecit utraque unum, et medium parietem maceriæ solvens, inimicitias in carne sua,

¹⁵legem mandatorum decretis evacuans, ut duos condat in semetipso in unum novum hominem, faciens pacem :

¹⁶et reconciliet ambos in uno corpore, Deo per crucem, interficiens inimicitias in semetipso.

¹⁷Et veniens evangelizavit pacem vobis, qui longe fuistis, et pacem iis, qui prope.

¹⁸Quoniam per ipsum habemus accessum ambo in uno Spiritu ad Patrem.

¹⁹Ergo jam non estis hospites, et advenæ : sed estis cives sanctorum, et domestici Dei,

²⁰superædificati super fundamentum apostolorum, et prophetarum, ipso summo angulari lapide Christo Jesu :

²¹in quo omnis ædificatio constructa crescit in templum sanctum in Domino,

²²in quo et vos coædificamini in habitaculum Dei in Spiritu.