1The titil of the foure and sixtithe salm. `To victorie, `the salm of the song of Dauid.

stylus

2God, heriyng bicometh thee in Syon; and a vow schal be yolden to thee in Jerusalem.

stylus

3Here thou my preier; ech man schal come to thee.

stylus

4The wordis of wickid men hadden the maistrye ouer vs; and thou schalt do merci to oure wickidnessis.

stylus

5Blessid is he, whom thou hast chose, and hast take; he schal dwelle in thin hallis. We schulen be fillid with the goodis of thin hous;

stylus

6thi temple is hooli, wondurful in equite. God, oure heelthe, here thou vs; thou art hope of alle coostis of erthe, and in the see afer.

stylus

7And thou makest redi hillis in thi vertu, and art gird with power;

stylus

8which disturblist the depthe of the see, the soun of the wawis therof.

stylus

9Folkis schulen be disturblid, and thei that dwellen in the endis schulen drede of thi signes; thou schalt delite the outgoingis of the morewtid and euentid.

stylus

10Thou hast visitid the lond, and hast greetli fillid it; thou hast multiplied to make it riche. The flood of God was fillid with watris; thou madist redi the mete of hem, for the makyng redi therof is so.

stylus

11Thou fillynge greetli the stremes therof, multiplie the fruytis therof; the lond bringinge forth fruytis schal be glad in goteris of it.

stylus

12Thou schalt blesse the coroun of the yeer of thi good wille; and thi feeldis schulen be fillid with plentee of fruytis.

stylus

13The feire thingis of desert schulen wexe fatte; and litle hillis schulen be cumpassid with ful out ioiyng.

stylus

14The wetheris of scheep ben clothid, and valeis schulen be plenteuouse of wheete; thei schulen crye, and sotheli thei schulen seye salm.

stylus