1The title of the foure and fourtithe salm. To the ouercomere for the lilies, the most loued song of lernyng of the sones of Chore.

stylus

2Myn herte hath teld out a good word; Y seie my workis `to the kyng. Mi tunge is `a penne of a writere; writynge swiftli.

stylus

3Crist, thou art fairer in schap than the sones of men; grace is spred abrood in thi lippis; therfor God blessid thee withouten ende.

stylus

4Be thou gird with thi swerd; on thi hipe most myytili.

stylus

5Biholde thou in thi schaplynesse and thi fairnesse; come thou forth with prosperite, and regne thou. For treuthe, and myldenesse, and riytfulnesse; and thi riyt hond schal lede forth thee wondurfuli.

stylus

6Thi scharpe arowis schulen falle in to the hertis of the enemyes of the kyng; puplis schulen be vndur thee.

stylus

7God, thi seete is in to the world of world; the yerde of thi rewme is a yerde of riyt reulyng, `ethir of equite.

stylus

8Thou louedist riytfulnesse, and hatidist wickidnesse; therfor thou, God, thi God, anoyntide thee with the oile of gladnesse, more than thi felowis.

stylus

9Mirre, and gumme, and cassia, of thi clothis, of the `housis yuer;

stylus

10of whiche the douytris of kyngis delitiden thee. A queen stood nyy on thi riyt side in clothing ouergildid; cumpassid with dyuersitee.

stylus

11Douyter, here thou, and se, and bowe doun thin eere; and foryete thi puple, and the hows of thi fadir.

stylus

12And the kyng schal coueyte thi fairnesse; for he is thi Lord God, and thei schulen worschipe hym.

stylus

13And the douytris of Tire in yiftis; alle the riche men of the puple schulen biseche thi cheer.

stylus

14Al the glorye of that douyter of the kyng is with ynne in goldun hemmes;

stylus

15sche is clothid aboute with dyuersitees. Virgyns schulen be brouyt to the kyng aftir hir; hir neiyboressis schulen be brouyt to thee.

stylus

16Thei schulen be brouyt in gladnesse, and ful out ioiyng; thei schulen be brouyt in to the temple of the kyng.

stylus

17Sones ben borun to thee, for thi fadris; thou schalt ordeyne hem princes on al erthe.

stylus

18Lord, thei schulen be myndeful of thi name; in ech generacioun, and in to generacioun. Therfor puplis schulen knouleche to thee withouten ende; and in to the world of world.

stylus