1The `title of the oon and twentithe salm. To ouercome, for `the morewtid hynd; the salm of Dauid.

stylus

2God, my God, biholde thou on me, whi hast thou forsake me? the wordis of my trespassis ben fer fro myn helthe.

stylus

3Mi God, Y schal crye bi dai, and thou schalt not here; and bi nyyt, and not to vnwisdom to me.

stylus

4Forsothe thou, the preisyng of Israel, dwellist in holynesse;

stylus

5oure fadris hopiden in thee, thei hopiden, and thou delyueridist hem.

stylus

6Thei crieden to thee, and thei weren maad saaf; thei hopiden in thee, and thei weren not schent.

stylus

7But Y am a worm, and not man; the schenschip of men, and the outcastyng of the puple.

stylus

8Alle men seynge me scorneden me; thei spaken with lippis, and stiriden the heed.

stylus

9He hopide in the Lord, delyuere he hym; make he hym saaf, for he wole hym.

stylus

10For thou it art that drowist me out of the wombe, thou art myn hope fro the tetis of my modir;

stylus

11in to thee Y am cast forth fro the wombe. Fro the wombe of my modir thou art my God; departe thou not fro me.

stylus

12For tribulacioun is next; for noon is that helpith.

stylus

13Many calues cumpassiden me; fatte bolis bisegiden me.

stylus

14Thei openyden her mouth on me; as doith a lioun rauyschynge and rorynge.

stylus

15I am sched out as watir; and alle my boonys ben scaterid. Myn herte is maad, as wex fletynge abrood; in the myddis of my wombe.

stylus

16Mi vertu driede as a tiyl stoon, and my tunge cleuede to my chekis; and thou hast brouyt forth me in to the dust of deth.

stylus

17For many doggis cumpassiden me; the counsel of wickid men bisegide me. Thei delueden myn hondis and my feet;

stylus

18thei noumbriden alle my boonys. Sotheli thei lokiden, and bihelden me;

stylus

19thei departiden my clothis to hem silf, and thei senten lot on my cloth.

stylus

20But thou, Lord, delaie not thin help fro me; biholde thou to my defence.

stylus

21God, delyuere thou my lijf fro swerd; and delyuere thou myn oon aloone fro the hond of the dogge.

stylus

22Make thou me saaf fro the mouth of a lioun; and my mekenesse fro the hornes of vnycornes.

stylus

23I schal telle thi name to my britheren; Y schal preise thee in the myddis of the chirche.

stylus

24Ye that dreden the Lord, herie hym; alle the seed of Jacob, glorifie ye hym.

stylus

25Al the seed of Israel drede hym; for he forsook not, nethir dispiside the preier of a pore man. Nethir he turnede awei his face fro me; and whanne Y criede to hym, he herde me.

stylus

26Mi preisyng is at thee in a greet chirche; Y schal yelde my vowis in the siyt of men dredynge hym.

stylus

27Pore men schulen ete, and schulen be fillid, and thei schulen herie the Lord, that seken hym; the hertis of hem schulen lyue in to the world of world.

stylus

28Alle the endis of erthe schulen bithenke; and schulen be conuertid to the Lord. And alle the meynees of hethene men; schulen worschipe in his siyt.

stylus

29For the rewme is the Lordis; and he schal be Lord of hethene men.

stylus

30Alle the fatte men of erthe eeten and worschipiden; alle men, that goen doun in to erthe, schulen falle doun in his siyt.

stylus

31And my soule schal lyue to hym; and my seed schal serue him.

stylus

32A generacioun to comyng schal be teld to the Lord; and heuenes schulen telle his riytfulnesse to the puple that schal be borun, whom the Lord made.

stylus