1The title of `hundred and secounde salm. `Of Dauid. Mi soule, blesse thou the Lord; and alle thingis that ben with ynne me, blesse his hooli name.

stylus

2Mi soule, blesse thou the Lord; and nyle thou foryete alle the yeldyngis of him.

stylus

3Which doith merci to alle thi wickidnessis; which heelith alle thi sijknessis.

stylus

4Which ayenbieth thi lijf fro deth; which corowneth thee in merci and merciful doyngis.

stylus

5Which fillith thi desijr in goodis; thi yongthe schal be renulid as the yongthe of an egle.

stylus

6The Lord doynge mercies; and doom to alle men suffringe wrong.

stylus

7He made hise weies knowun to Moises; hise willis to the sones of Israel.

stylus

8The Lord is merciful doer, and merciful in wille; longe abidinge, and myche merciful.

stylus

9He schal not be wrooth with outen ende; and he schal not thretne with outen ende.

stylus

10He dide not to vs aftir oure synnes; nether he yeldide to vs aftir oure wickidnessis.

stylus

11For bi the hiynesse of heuene fro erthe; he made strong his merci on men dredynge hym.

stylus

12As myche as the eest is fer fro the west; he made fer oure wickidnessis fro vs.

stylus

13As a fadir hath merci on sones, the Lord hadde merci on men dredynge him;

stylus

14for he knewe oure makyng.

stylus

15He bithouyte that we ben dust, a man is as hey; his dai schal flowre out so as a flour of the feeld.

stylus

16For the spirit schal passe in hym, and schal not abide; and schal no more knowe his place.

stylus

17But the merci of the Lord is fro with out bigynnyng, and til in to with outen ende; on men dredinge hym. And his riytfulnesse is in to the sones of sones;

stylus

18to hem that kepen his testament. And ben myndeful of hise comaundementis; to do tho.

stylus

19The Lord hath maad redi his seete in heuene; and his rewme schal be lord of alle.

stylus

20Aungels of the Lord, blesse ye the Lord; ye myyti in vertu, doynge his word, to here the vois of hise wordis.

stylus

21Alle vertues of the Lord, blesse ye the Lord; ye mynystris of hym that doen his wille.

stylus

22Alle werkis of the Lord, blesse ye the Lord, in ech place of his lordschipe; my soule, blesse thou the Lord.

stylus