1And Helyu pronounside, and spak also these thingis,

stylus

2Wise men, here ye my wordis, and lerned men, herkne ye me; for the eere preueth wordis,

stylus

3and the throte demeth metis bi taast.

stylus

4Chese we doom to vs; and se we among vs, what is the betere.

stylus

5For Job seide, Y am iust, and God hath distried my doom.

stylus

6For whi lesynge is in demynge me, and myn arowe is violent with out ony synne.

stylus

7Who is a man, as Joob is, that drynkith scornyng as watir?

stylus

8that goith with men worchynge wickidnesse, and goith with vnfeithful men?

stylus

9For he seide, A man schal not plese God, yhe, thouy he renneth with God.

stylus

10Therfor ye men hertid, `that is, vndurstonde, here ye me; vnpite, `ethir cruelte, be fer fro God, and wickidnesse fro Almyyti God.

stylus

11For he schal yelde the werk of man to hym; and bi the weies of ech man he schal restore to hym.

stylus

12For verili God schal not condempne with out cause; nether Almyyti God schal distrie doom.

stylus

13What othere man hath he ordeyned on the lond? ether whom hath he set on the world, which he made?

stylus

14If God dressith his herte to hym, he schal drawe to hym silf his spirit and blast.

stylus

15Ech fleisch schal faile togidere; `and a man schal turne ayen in to aisch.

stylus

16Therfor if thou hast vndurstondyng, here thou that that is seid, and herkne the vois of my speche.

stylus

17Whether he that loueth not doom may be maad hool? and hou condempnest thou so myche him, that is iust?

stylus

18Which seith to the kyng, Thou art apostata; which clepith the duykis vnpitouse, `ethir vnfeithful.

stylus

19`Which takith not the persoones of princes, nether knew a tyraunt, whanne he stryuede ayens a pore man; for alle men ben the werk of hise hondis.

stylus

20Thei schulen die sudeynli, and at mydnyyt puplis schulen be troblid, `ethir schulen be bowid, as othere bookis han; and schulen passe, and schulen take `awei `a violent man with out hond.

stylus

21For the iyen of God ben on the weies of men, and biholdith alle goyngis of hem.

stylus

22No derknessis ben, and no schadewe of deeth is, that thei, that worchen wickidnesse, be hid there;

stylus

23for it is `no more in the power of man, that he come to God in to doom.

stylus

24God schal al to-breke many men and vnnoumbrable; and schal make othere men to stonde for hem.

stylus

25For he knowith the werkis of hem; therfor he schal brynge yn niyt, and thei schulen be al to-brokun.

stylus

26He smoot hem, as vnpitouse men, in the place of seinge men.

stylus

27Whiche yeden awei fro hym bi `castyng afore, and nolden vndurstonde alle hise weies.

stylus

28That thei schulden make the cry of a nedi man to come to hym, and that he schulde here the vois of pore men.

stylus

29For whanne he grauntith pees, who is that condempneth? Sithen he hidith his cheer, who is that seeth hym? And on folkis and on alle men `he hath power `to do siche thingis.

stylus

30Which makith `a man ypocrite to regne, for the synnes of the puple.

stylus

31Therfor for Y haue spoke to God, also Y schal not forbede thee.

stylus

32If Y erride, teche thou me; if Y spak wickidnesse, Y schal no more adde.

stylus

33Whether God axith that wickidnesse of thee, for it displeside thee? For thou hast bigunne to speke, and not Y; that if thou knowist ony thing betere, speke thou.

stylus

34Men vndurstondynge, speke to me; and a wise man, here me.

stylus

35Forsothe Joob spak folili, and hise wordis sownen not techyng.

stylus

36My fadir, be Joob preuede `til to the ende; ceesse thou not fro the man of wickidnesse,

stylus

37`that addith blasfemye ouer hise synnes. Be he constreyned among vs in the meene tyme; and thanne bi hise wordis stire he God to the doom.

stylus