1Tymes ben not hid fro Almyyti God; sotheli thei that knowen hym, knowen not hise daies.

stylus

2Othere men turneden ouer the termes of neiyboris eritage, thei token awei flockis, and fedden tho.

stylus

3Thei driueden awei the asse of fadirlesse children, and token awei the cow of a widewe for a wed.

stylus

4Thei distrieden the weie of pore men, and thei oppressiden togidere the mylde men of erthe.

stylus

5Othere men as wielde assis in deseert goon out to her werk; and thei waken to prey, and bifor maken redy breed to her children.

stylus

6Thei kitten doun a feeld not hern, and thei gaderen grapis of his vyner, whom thei han oppressid bi violence.

stylus

7Thei leeuen men nakid, and taken awei the clothis, to whiche men is noon hiling in coold;

stylus

8whiche men the reynes of munteyns weeten, and thei han noon hilyng, and biclippen stoonys.

stylus

9Thei diden violence, and robbiden fadirles and modirles children; and thei spuyliden, `ether robbiden, the comynte of pore men.

stylus

10Thei token awey eeris of corn fro nakid men, and goynge with out cloth, and fro hungry men.

stylus

11Thei weren hid in myddai among the heepis of tho men, that thirsten, whanne the presses ben trodun.

stylus

12Thei maden men of citees to weile, and the soulis of woundid men schulen crye; and God suffrith it not to go awei vnpunyschid.

stylus

13Thei weren rebel to liyt; thei knewen not the weyes therof, nether thei turneden ayen bi the pathis therof.

stylus

14A mansleere risith ful eerli, and sleeth a nedi man, and a pore man; sotheli bi nyyt he schal be as a nyyt theef.

stylus

15The iye of avouter kepith derknesse, and seith, An yye schal not se me; and he schal hile his face.

stylus

16Thei mynen housis in derknessis, as thei seiden togidere to hem silf in the dai; and thei knewen not liyt.

stylus

17If the morewtid apperith sudeynli, thei demen the schadewe of deth; and so thei goon in derknessis as in liyt.

stylus

18He is vnstablere than the face of the water; his part in erthe be cursid, and go he not bi the weie of vyneris.

stylus

19Passe he to ful greet heete fro the watris of snowis, and the synne of hym `til to hellis.

stylus

20Merci foryete hym; his swetnesse be a worm; be he not in mynde, but be he al to-brokun as `a tre vnfruytful.

stylus

21For he fedde the bareyn, and hir that childith not, and he dide not wel to the widewe.

stylus

22He drow doun stronge men in his strengthe; and whanne he stondith in `greet state, he schal not bileue to his lijf.

stylus

23God yaf to hym place of penaunce, and he mysusith that in to pride; for the iyen of God ben in the weies of that man.

stylus

24Thei ben reisid at a litil, and thei schulen not stonde; and thei schulen be maad low as alle thingis, and thei schulen be takun awei; and as the hyynessis of eeris of corn thei schulen be al to-brokun.

stylus

25That if it is not so, who may repreue me, that Y liede, and putte my wordis bifor God?

stylus