1Sotheli Joob answeride, and seide,

stylus

2Now also my word is in bitternesse, and the hond of my wounde is agreggid on my weilyng.

stylus

3Who yyueth to me, that Y knowe, and fynde hym, and come `til to his trone?

stylus

4Y schal sette doom bifor hym, and Y schal fille my mouth with blamyngis;

stylus

5that Y kunne the wordis, whiche he schal answere to me, and that Y vnderstonde, what he schal speke to me.

stylus

6Y nyle, that he stryue with me bi greet strengthe, nether oppresse me with the heuynesse of his greetnesse.

stylus

7Sette he forth equite ayens me, and my doom come perfitli to victorie.

stylus

8If Y go to the eest, God apperith not; if Y go to the west, Y schal not vndurstonde hym; if Y go to the left side,

stylus

9what schal Y do? Y schal not take hym; if Y turne me to the riyt side, Y schal not se hym.

stylus

10But he knowith my weie, and he schal preue me as gold, that passith thorouy fier.

stylus

11My foot suede hise steppis; Y kepte his weie, and Y bowide not awey fro it.

stylus

12Y yede not awei fro the comaundementis of hise lippis; and Y hidde in my bosum the wordis of his mouth.

stylus

13For he is aloone, and no man may turne awei hise thouytis; and what euer thing he wolde, his wille dide this thing.

stylus

14Whanne he hath fillid his wille in me, also many othere lijk thingis ben redi to hym.

stylus

15And therfor Y am disturblid of his face, and Y biholdynge hym am anguyschid for drede.

stylus

16God hath maad neische myn herte, and Almyyti God hath disturblid me.

stylus

17For Y perischide not for derknessis neiyynge; nethir myist hilide my face.

stylus