1Forsothe Baldach Suythes answeride, and seide,

stylus

2`Til to what ende schalt thou booste with wordis? Vndurstonde thou first, and so speke we.

stylus

3Whi ben we arettid as beestis, and han we be foule bifor thee?

stylus

4What leesist thou thi soule in thi woodnes? Whether the erthe schal be forsakun `for thee, and hard stoonys schulen be borun ouer fro her place?

stylus

5Whethir the liyt of a wickid man schal not be quenchid; and the flawme of his fier schal not schyne?

stylus

6Liyt schal wexe derke in his tabernacle; and the lanterne, which is on hym, schal be quenchid.

stylus

7The steppis of his vertu schulen be maad streit; and his counsel schal caste hym doun.

stylus

8For he hath sent hise feet in to a net; and he goith in the meschis therof.

stylus

9His foot schal be holdun with a snare; and thirst schal brenne out ayens hym.

stylus

10The foot trappe of hym is hid in the erthe, and his snare on the path.

stylus

11Dredis schulen make hym aferd on ech side, and schulen biwlappe hise feet.

stylus

12His strengthe be maad feble bi hungur; and pouert asaile hise ribbis.

stylus

13Deuoure it the fairnesse of his skyn; the firste gendrid deth waste hise armes.

stylus

14His trist be takun awei fro his tabernacle; and perischyng, as a kyng, aboue trede on hym.

stylus

15The felowis of hym that is not, dwelle in his tabernacle; brymston be spreynt in his tabernacle.

stylus

16The rootis of hym be maad drie bynethe; sotheli his ripe corn be al to-brokun aboue.

stylus

17His mynde perische fro the erthe; and his name be not maad solempne in stretis.

stylus

18He schal put hym out fro `liyt in to derknessis; and he schal bere hym ouer fro the world.

stylus

19Nethir his seed nether kynrede schal be in his puple, nether ony relifs in hise cuntreis.

stylus

20The laste men schulen wondre in hise daies; and hidousnesse schal asaile the firste men.

stylus

21Therfor these ben the tabernaclis of a wickid man; and this is the place of hym, that knowith not God.

stylus