Marcus 16

¹et cum transisset sabbatum Maria Magdalene et Maria Iacobi et Salome emerunt aromata ut venientes unguerent eum

²et valde mane una sabbatorum veniunt ad monumentum orto iam sole

³et dicebant ad invicem quis revolvet nobis lapidem ab ostio monumenti

⁴et respicientes vident revolutum lapidem erat quippe magnus valde

⁵et introeuntes in monumento viderunt iuvenem sedentem in dextris coopertum stola candida et obstipuerunt

⁶qui dicit illis nolite expavescere Iesum quaeritis Nazarenum crucifixum surrexit non est hic ecce locus ubi posuerunt eum

⁷sed ite et dicite discipulis eius et Petro quia praecedit vos in Galilaeam ibi eum videbitis sicut dixit vobis

⁸at illae exeuntes fugerunt de monumento invaserat enim eas tremor et pavor et nemini quicquam dixerunt timebant enim

⁹surgens autem mane prima sabbati apparuit primo Mariae Magdalenae de qua eiecerat septem daemonia

¹⁰illa vadens nuntiavit his qui cum eo fuerant lugentibus et flentibus

¹¹et illi audientes quia viveret et visus esset ab ea non crediderunt

¹²post haec autem duobus ex eis ambulantibus ostensus est in alia effigie euntibus in villam

¹³et illi euntes nuntiaverunt ceteris nec illis crediderunt

¹⁴novissime recumbentibus illis undecim apparuit et exprobravit incredulitatem illorum et duritiam cordis quia his qui viderant eum resurrexisse non crediderant

¹⁵et dixit eis euntes in mundum universum praedicate evangelium omni creaturae

¹⁶qui crediderit et baptizatus fuerit salvus erit qui vero non crediderit condemnabitur

¹⁷signa autem eos qui crediderint haec sequentur in nomine meo daemonia eicient linguis loquentur novis

¹⁸serpentes tollent et si mortiferum quid biberint non eos nocebit super aegrotos manus inponent et bene habebunt

¹⁹et Dominus quidem postquam locutus est eis adsumptus est in caelum et sedit a dextris Dei

²⁰illi autem profecti praedicaverunt ubique Domino cooperante et sermonem confirmante sequentibus signis

Marcus 16

¹Et cum transisset sabbatum, Maria Magdalene, et Maria Jacobi, et Salome emerunt aromata ut venientes ungerent Jesum.

²Et valde mane una sabbatorum, veniunt ad monumentum, orto jam sole.

³Et dicebant ad invicem : Quis revolvet nobis lapidem ab ostio monumenti ?

⁴Et respicientes viderunt revolutum lapidem. Erat quippe magnus valde.

⁵Et introëuntes in monumentum viderunt juvenem sedentem in dextris, coopertum stola candida, et obstupuerunt.

⁶Qui dicit illis : Nolite expavescere : Jesum quæritis Nazarenum, crucifixum : surrexit, non est hic, ecce locus ubi posuerunt eum.

⁷Sed ite, dicite discipulis ejus, et Petro, quia præcedit vos in Galilæam : ibi eum videbitis, sicut dixit vobis.

⁸At illæ exeuntes, fugerunt de monumento : invaserat enim eas tremor et pavor : et nemini quidquam dixerunt : timebant enim.

⁹Surgens autem mane prima sabbati, apparuit primo Mariæ Magdalene, de qua ejecerat septem dæmonia.

¹⁰Illa vadens nuntiavit his, qui cum eo fuerant, lugentibus et flentibus.

¹¹Et illi audientes quia viveret, et visus esset ab ea, non crediderunt.

¹²Post hæc autem duobus ex his ambulantibus ostensus est in alia effigie, euntibus in villam :

¹³et illi euntes nuntiaverunt ceteris : nec illis crediderunt.

¹⁴Novissime recumbentibus illis undecim apparuit : et exprobravit incredulitatem eorum et duritiam cordis : quia iis, qui viderant eum resurrexisse, non crediderunt.

¹⁵Et dixit eis : Euntes in mundum universum prædicate Evangelium omni creaturæ.

¹⁶Qui crediderit, et baptizatus fuerit, salvus erit : qui vero non crediderit, condemnabitur.

¹⁷Signa autem eos qui crediderint, hæc sequentur : in nomine meo dæmonia ejicient : linguis loquentur novis :

¹⁸serpentes tollent : et si mortiferum quid biberint, non eis nocebit : super ægros manus imponent, et bene habebunt.

¹⁹Et Dominus quidem Jesus postquam locutus est eis, assumptus est in cælum, et sedet a dextris Dei.

²⁰Illi autem profecti prædicaverunt ubique, Domino cooperante, et sermonem confirmante, sequentibus signis.