Iob 41 Comparatio: Vulgate vs Clementine Vulgate

Iob 41

¹non quasi crudelis suscitabo eum quis enim resistere potest vultui meo

²quis ante dedit mihi ut reddam ei omnia quae sub caelo sunt mea sunt

³non parcam ei et verbis potentibus et ad deprecandum conpositis

⁴quis revelavit faciem indumenti eius et in medium oris eius quis intrabit

⁵portas vultus eius quis aperiet per gyrum dentium eius formido

⁶corpus illius quasi scuta fusilia et conpactum squamis se prementibus

⁷una uni coniungitur et ne spiraculum quidem incedit per eas

⁸una alteri adherebunt et tenentes se nequaquam separabuntur

⁹sternutatio eius splendor ignis et oculi eius ut palpebrae diluculi

¹⁰de ore eius lampades procedunt sicut taedae ignis accensae

¹¹de naribus eius procedit fumus sicut ollae succensae atque ferventis

¹²halitus eius prunas ardere facit et flamma de ore eius egreditur

¹³in collo eius morabitur fortitudo et faciem eius praecedet egestas

¹⁴membra carnium eius coherentia sibi mittet contra eum fulmina et ad locum alium non ferentur

¹⁵cor eius indurabitur quasi lapis et stringetur quasi malleatoris incus

¹⁶cum sublatus fuerit timebunt angeli et territi purgabuntur

¹⁷cum adprehenderit eum gladius subsistere non poterit neque hasta neque torax

¹⁸reputabit enim quasi paleas ferrum et quasi lignum putridum aes

¹⁹non fugabit eum vir sagittarius in stipulam versi sunt ei lapides fundae

²⁰quasi stipulam aestimabit malleum et deridebit vibrantem hastam

²¹sub ipso erunt radii solis sternet sibi aurum quasi lutum

²²fervescere faciet quasi ollam profundum mare ponet quasi cum unguenta bulliunt

²³post eum lucebit semita aestimabit abyssum quasi senescentem

²⁴non est super terram potestas quae conparetur ei qui factus est ut nullum timeret

²⁵omne sublime videt ipse est rex super universos filios superbiae

Iob 41

¹Non quasi crudelis suscitabo eum : quis enim resistere potest vultui meo ?

²Quis ante dedit mihi, ut reddam ei ? omnia quæ sub cælo sunt, mea sunt.

³Non parcam ei, et verbis potentibus, et ad deprecandum compositis.

⁴Quis revelabit faciem indumenti ejus ? et in medium oris ejus quis intrabit ?

⁵Portas vultus ejus quis aperiet ? per gyrum dentium ejus formido.

⁶Corpus illius quasi scuta fusilia, compactum squamis se prementibus.

⁷Una uni conjungitur, et ne spiraculum quidem incedit per eas.

⁸Una alteri adhærebit, et tenentes se nequaquam separabuntur.

⁹Sternutatio ejus splendor ignis, et oculi ejus ut palpebræ diluculi.

¹⁰De ore ejus lampades procedunt, sicut tædæ ignis accensæ.

¹¹De naribus ejus procedit fumus, sicut ollæ succensæ atque ferventis.

¹²Halitus ejus prunas ardere facit, et flamma de ore ejus egreditur.

¹³In collo ejus morabitur fortitudo, et faciem ejus præcedit egestas.

¹⁴Membra carnium ejus cohærentia sibi : mittet contra eum fulmina, et ad locum alium non ferentur.

¹⁵Cor ejus indurabitur tamquam lapis, et stringetur quasi malleatoris incus.

¹⁶Cum sublatus fuerit, timebunt angeli, et territi purgabuntur.

¹⁷Cum apprehenderit eum gladius, subsistere non poterit, neque hasta, neque thorax :

¹⁸reputabit enim quasi paleas ferrum, et quasi lignum putridum æs.

¹⁹Non fugabit eum vir sagittarius : in stipulam versi sunt ei lapides fundæ.

²⁰Quasi stipulam æstimabit malleum, et deridebit vibrantem hastam.

²¹Sub ipso erunt radii solis, et sternet sibi aurum quasi lutum.

²²Fervescere faciet quasi ollam profundum mare, et ponet quasi cum unguenta bulliunt.

²³Post eum lucebit semita : æstimabit abyssum quasi senescentem.

²⁴Non est super terram potestas quæ comparetur ei, qui factus est ut nullum timeret.

²⁵Omne sublime videt : ipse est rex super universos filios superbiæ.