Iob 33 Comparatio: Vulgate vs Clementine Vulgate

Iob 33

¹audi igitur Iob eloquia mea et omnes sermones meos ausculta

²ecce aperui os meum loquatur lingua mea in faucibus meis

³simplici corde meo sermones mei et sententiam labia mea puram loquentur

⁴spiritus Dei fecit me et spiraculum Omnipotentis vivificavit me

⁵si potes responde mihi et adversus faciem meam consiste

⁶ecce et me sicut et te fecit Deus et de eodem luto ego quoque formatus sum

⁷verumtamen miraculum meum non te terreat et eloquentia mea non sit tibi gravis

⁸dixisti ergo in auribus meis et vocem verborum audivi

⁹mundus sum ego absque delicto inmaculatus et non est iniquitas in me

¹⁰quia querellas in me repperit ideo arbitratus est me inimicum sibi

¹¹posuit in nervo pedes meos custodivit omnes semitas meas

¹²hoc est ergo in quo non es iustificatus respondebo tibi quia maior sit Deus homine

¹³adversum eum contendis quod non ad omnia verba responderit tibi

¹⁴semel loquitur Deus et secundo id ipsum non repetit

¹⁵per somnium in visione nocturna quando inruit sopor super homines et dormiunt in lectulo

¹⁶tunc aperit aures virorum et erudiens eos instruit disciplinam

¹⁷ut avertat hominem ab his quae facit et liberet eum de superbia

¹⁸eruens animam eius a corruptione et vitam illius ut non transeat in gladium

¹⁹increpat quoque per dolorem in lectulo et omnia ossa eius marcescere facit

²⁰abominabilis ei fit in vita sua panis et animae illius cibus ante desiderabilis

²¹tabescet caro eius et ossa quae tecta fuerant nudabuntur

²²adpropinquabit corruptioni anima eius et vita illius mortiferis

²³si fuerit pro eo angelus loquens unum de milibus ut adnuntiet hominis aequitatem

²⁴miserebitur eius et dicet libera eum et non descendat in corruptionem inveni in quo ei propitier

²⁵consumpta est caro eius a suppliciis revertatur ad dies adulescentiae suae

²⁶deprecabitur Deum et placabilis ei erit et videbit faciem eius in iubilo et reddet homini iustitiam suam

²⁷respiciet homines et dicet peccavi et vere deliqui et ut eram dignus non recepi

²⁸liberavit animam suam ne pergeret in interitum sed vivens lucem videret

²⁹ecce haec omnia operatur Deus tribus vicibus per singulos

³⁰ut revocet animas eorum a corruptione et inluminet luce viventium

³¹adtende Iob et audi me et tace dum ego loquar

³²si autem habes quod loquaris responde mihi loquere volo enim te apparere iustum

³³quod si non habes audi me tace et docebo te sapientiam

Iob 33

¹Audi igitur, Job, eloquia mea, et omnes sermones meos ausculta.

²Ecce aperui os meum : loquatur lingua mea in faucibus meis.

³Simplici corde meo sermones mei, et sententiam puram labia mea loquentur.

⁴Spiritus Dei fecit me, et spiraculum Omnipotentis vivificavit me.

⁵Si potes, responde mihi, et adversus faciem meam consiste.

⁶Ecce, et me sicut et te fecit Deus, et de eodem luto ego quoque formatus sum.

⁷Verumtamen miraculum meum non te terreat, et eloquentia mea non sit tibi gravis.

⁸Dixisti ergo in auribus meis, et vocem verborum tuorum audivi :

⁹Mundus sum ego, et absque delicto : immaculatus, et non est iniquitas in me.

¹⁰Quia querelas in me reperit, ideo arbitratus est me inimicum sibi.

¹¹Posuit in nervo pedes meos ; custodivit omnes semitas meas.

¹²Hoc est ergo in quo non es justificatus : respondebo tibi, quia major sit Deus homine.

¹³Adversus eum contendis, quod non ad omnia verba responderit tibi ?

¹⁴Semel loquitur Deus, et secundo idipsum non repetit.

¹⁵Per somnium, in visione nocturna, quando irruit sopor super homines, et dormiunt in lectulo,

¹⁶tunc aperit aures virorum, et erudiens eos instruit disciplina,

¹⁷ut avertat hominem ab his quæ facit, et liberet eum de superbia,

¹⁸eruens animam ejus a corruptione, et vitam illius ut non transeat in gladium.

¹⁹Increpat quoque per dolorem in lectulo, et omnia ossa ejus marcescere facit.

²⁰Abominabilis ei fit in vita sua panis, et animæ illius cibus ante desiderabilis.

²¹Tabescet caro ejus, et ossa, quæ tecta fuerant, nudabuntur.

²²Appropinquavit corruptioni anima ejus, et vita illius mortiferis.

²³Si fuerit pro eo angelus loquens, unus de millibus, ut annuntiet hominis æquitatem,

²⁴miserebitur ejus, et dicet : Libera eum, ut non descendat in corruptionem : inveni in quo ei propitier.

²⁵Consumpta est caro ejus a suppliciis : revertatur ad dies adolescentiæ suæ.

²⁶Deprecabitur Deum, et placabilis ei erit : et videbit faciem ejus in jubilo, et reddet homini justitiam suam.

²⁷Respiciet homines, et dicet : Peccavi, et vere deliqui, et ut eram dignus, non recepi.

²⁸Liberavit animam suam, ne pergeret in interitum, sed vivens lucem videret.

²⁹Ecce hæc omnia operatur Deus tribus vicibus per singulos,

³⁰ut revocet animas eorum a corruptione, et illuminet luce viventium.

³¹Attende, Job, et audi me : et tace, dum ego loquor.

³²Si autem habes quod loquaris, responde mihi : loquere, volo enim te apparere justum.

³³Quod si non habes, audi me : tace, et docebo te sapientiam.