Ioannes 17

¹haec locutus est Iesus et sublevatis oculis in caelum dixit Pater venit hora clarifica Filium tuum ut Filius tuus clarificet te

²sicut dedisti ei potestatem omnis carnis ut omne quod dedisti ei det eis vitam aeternam

³haec est autem vita aeterna ut cognoscant te solum verum Deum et quem misisti Iesum Christum

⁴ego te clarificavi super terram opus consummavi quod dedisti mihi ut faciam

⁵et nunc clarifica me tu Pater apud temet ipsum claritatem quam habui priusquam mundus esset apud te

⁶manifestavi nomen tuum hominibus quos dedisti mihi de mundo tui erant et mihi eos dedisti et sermonem tuum servaverunt

⁷nunc cognoverunt quia omnia quae dedisti mihi abs te sunt

⁸quia verba quae dedisti mihi dedi eis et ipsi acceperunt et cognoverunt vere quia a te exivi et crediderunt quia tu me misisti

⁹ego pro eis rogo non pro mundo rogo sed pro his quos dedisti mihi quia tui sunt

¹⁰et mea omnia tua sunt et tua mea sunt et clarificatus sum in eis

¹¹et iam non sum in mundo et hii in mundo sunt et ego ad te venio Pater sancte serva eos in nomine tuo quos dedisti mihi ut sint unum sicut et nos

¹²cum essem cum eis ego servabam eos in nomine tuo quos dedisti mihi custodivi et nemo ex his perivit nisi filius perditionis ut scriptura impleatur

¹³nunc autem ad te venio et haec loquor in mundo ut habeant gaudium meum impletum in semet ipsis

¹⁴ego dedi eis sermonem tuum et mundus odio eos habuit quia non sunt de mundo sicut et ego non sum de mundo

¹⁵non rogo ut tollas eos de mundo sed ut serves eos ex malo

¹⁶de mundo non sunt sicut et ego non sum de mundo

¹⁷sanctifica eos in veritate sermo tuus veritas est

¹⁸sicut me misisti in mundum et ego misi eos in mundum

¹⁹et pro eis ego sanctifico me ipsum ut sint et ipsi sanctificati in veritate

²⁰non pro his autem rogo tantum sed et pro eis qui credituri sunt per verbum eorum in me

²¹ut omnes unum sint sicut tu Pater in me et ego in te ut et ipsi in nobis unum sint ut mundus credat quia tu me misisti

²²et ego claritatem quam dedisti mihi dedi eis ut sint unum sicut nos unum sumus

²³ego in eis et tu in me ut sint consummati in unum et cognoscat mundus quia tu me misisti et dilexisti eos sicut me dilexisti

²⁴Pater quos dedisti mihi volo ut ubi ego sum et illi sint mecum ut videant claritatem meam quam dedisti mihi quia dilexisti me ante constitutionem mundi

²⁵Pater iuste et mundus te non cognovit ego autem te cognovi et hii cognoverunt quia tu me misisti

²⁶et notum feci eis nomen tuum et notum faciam ut dilectio qua dilexisti me in ipsis sit et ego in ipsis

Ioannes 17

¹Hæc locutus est Jesus : et sublevatis oculis in cælum, dixit : Pater, venit hora : clarifica Filium tuum, ut Filius tuus clarificet te :

²sicut dedisti ei potestatem omnis carnis, ut omne, quod dedisti ei, det eis vitam æternam.

³Hæc est autem vita æterna : ut cognoscant te, solum Deum verum, et quem misisti Jesum Christum.

⁴Ego te clarificavi super terram : opus consummavi, quod dedisti mihi ut faciam :

⁵et nunc clarifica me tu, Pater, apud temetipsum, claritate quam habui, priusquam mundus esset, apud te.

⁶Manifestavi nomen tuum hominibus, quos dedisti mihi de mundo : tui erant, et mihi eos dedisti : et sermonem tuum servaverunt.

⁷Nunc cognoverunt quia omnia quæ dedisti mihi, abs te sunt :

⁸quia verba quæ dedisti mihi, dedi eis : et ipsi acceperunt, et cognoverunt vere quia a te exivi, et crediderunt quia tu me misisti.

⁹Ego pro eis rogo ; non pro mundo rogo, sed pro his quos dedisti mihi : quia tui sunt :

¹⁰et mea omnia tua sunt, et tua mea sunt : et clarificatus sum in eis.

¹¹Et jam non sum in mundo, et hi in mundo sunt, et ego ad te venio. Pater sancte, serva eos in nomine tuo, quos dedisti mihi : ut sint unum, sicut et nos.

¹²Cum essem cum eis, ego servabam eos in nomine tuo. Quos dedisti mihi, custodivi : et nemo ex eis periit, nisi filius perditionis, ut Scriptura impleatur.

¹³Nunc autem ad te venio : et hæc loquor in mundo, ut habeant gaudium meum impletum in semetipsis.

¹⁴Ego dedi eis sermonem tuum, et mundus eos odio habuit, quia non sunt de mundo, sicut et ego non sum de mundo.

¹⁵Non rogo ut tollas eos de mundo, sed ut serves eos a malo.

¹⁶De mundo non sunt, sicut et ego non sum de mundo.

¹⁷Sanctifica eos in veritate. Sermo tuus veritas est.

¹⁸Sicut tu me misisti in mundum, et ego misi eos in mundum :

¹⁹et pro eis ego sanctifico meipsum : ut sint et ipsi sanctificati in veritate.

²⁰Non pro eis autem rogo tantum, sed et pro eis qui credituri sunt per verbum eorum in me :

²¹ut omnes unum sint, sicut tu Pater in me, et ego in te, ut et ipsi in nobis unum sint : ut credat mundus, quia tu me misisti.

²²Et ego claritatem, quam dedisti mihi, dedi eis : ut sint unum, sicut et nos unum sumus.

²³Ego in eis, et tu in me : ut sint consummati in unum : et cognoscat mundus quia tu me misisti, et dilexisti eos, sicut et me dilexisti.

²⁴Pater, quos dedisti mihi, volo ut ubi sum ego, et illi sint mecum : ut videant claritatem meam, quam dedisti mihi : quia dilexisti me ante constitutionem mundi.

²⁵Pater juste, mundus te non cognovit, ego autem te cognovi : et hi cognoverunt, quia tu me misisti.

²⁶Et notum feci eis nomen tuum, et notum faciam : ut dilectio, qua dilexisti me, in ipsis sit, et ego in ipsis.