Ecclesiasticus 7

¹noli facere mala et non te adprehendent

²discede ab iniquo et deficient mala abs te

³non semines mala in sulcis iniuriae et non metes ea in septuplum

⁴noli quaerere ab homine ducatum neque a rege cathedram honoris

⁵non te iustifices ante Deum quoniam agnitor cordis ipse est et penes regem noli velle videri sapiens

⁶noli quaerere fieri iudex nisi si valeas virtute inrumpere iniquitates ne forte extimescas faciem potentis et ponas scandalum in agilitate tua

⁷non pecces in multitudinem civitatis nec te inmittas in populum

⁸neque alliges duplicia peccata nec enim in uno eris inmunis

⁹noli esse pusillanimis in anima tua

¹⁰exorare et facere elemosynam non despicias

¹¹ne dicas in multitudine munerum meorum respiciet Deus et offerentem me Deo altissimo suscipiet munera mea

¹²non inrideas hominem in amaritudine animae est enim qui humiliat et exaltat circumspector Deus

¹³noli amare mendacium adversus fratrem tuum neque amico similiter facias

¹⁴noli velle mentiri omne mendacium adsiduitas enim illius non bona

¹⁵noli verbosus esse in multitudine presbyterorum et non iteres verbum in tua oratione

¹⁶non oderis laboriosa opera et rusticationem ab Altissimo creatam

¹⁷non te reputes in multitudine indisciplinatorum

¹⁸memento irae quoniam non tardabit

¹⁹humilia valde spiritum tuum quoniam vindicta carnis impii ignis et vermes

²⁰noli praevaricari in amicum pecunia differenti neque fratrem carissimum auro spreveris

²¹noli discedere a muliere sensata et bona quam sortitus es in timore Dei gratia enim verecundiae illius super aurum

²²non laedas servum operantem in veritate neque mercennarium dantem animam suam

²³servus sensatus dilectus quasi anima tua non defraudes illum libertate neque inopem derelinquas illum

²⁴pecora tibi sunt adtende illis et si sunt utilia perseverent apud te

²⁵filii tibi sunt erudi illos et curva illos a pueritia illorum

²⁶filiae tibi sunt serva corpus illarum et non ostendas hilarem faciem tuam ad illas

²⁷trade filiam et grande opus feceris et homini sensato da illam

²⁸mulier si est tibi secundum animam tuam non proicias illam et odibili non credas te in toto corde

²⁹honora patrem tuum et gemitus matris tuae ne obliviscaris

³⁰memento quoniam nisi per illos non fuisses et retribue illis quomodo et illi tibi

³¹in tota anima tua time Deum et sacerdotes illius sanctifica

³²in omni virtute dilige eum qui te fecit et ministros eius non derelinquas

³³honora Deum ex tota anima tua et honorifica sacerdotes et propurga te cum brachiis

³⁴da illi partem sicut mandatum est tibi primitiarum et purgationis et de neglegentia purga te cum paucis

³⁵datum brachiorum tuorum et sacrificium sanctificationis offers initia sanctorum

³⁶et pauperi porrige manum tuam ut perficiatur propitiatio et benedictio tua

³⁷gratia datus in conspectu omnis viventis et mortuo non prohibeas gratiam

³⁸non desis plorantibus in conrogatione et cum lugentibus ambula

³⁹non te pigeat visitare infirmum ex his enim in dilectione firmaberis

⁴⁰in omnibus operibus tuis memorare novissima tua et in aeternum non peccabis

Ecclesiasticus 7

¹Noli facere mala, et non te apprehendent :

²discede ab iniquo, et deficient mala abs te.

³Fili, non semines mala in sulcis injustitiæ, et non metes ea in septuplum.

⁴Noli quærere a Domino ducatum, neque a rege cathedram honoris.

⁵Non te justifices ante Deum, quoniam agnitor cordis ipse est : et penes regem noli velle videri sapiens.

⁶Noli quærere fieri judex, nisi valeas virtute irrumpere iniquitates : ne forte extimescas faciem potentis, et ponas scandalum in æquitate tua.

⁷Non pecces in multitudinem civitatis, nec te immittas in populum :

⁸neque alliges duplicia peccata, nec enim in uno eris immunis.

⁹Noli esse pusillanimis in animo tuo :

¹⁰exorare et facere eleemosynam ne despicias.

¹¹Ne dicas : In multitudine munerum meorum respiciet Deus, et offerente me Deo altissimo, munera mea suscipiet.

¹²Non irrideas hominem in amaritudine animæ : est enim qui humiliat et exaltat circumspector Deus.

¹³Noli amare mendacium adversus fratrem tuum, neque in amicum similiter facias.

¹⁴Noli velle mentiri omne mendacium : assiduitas enim illius non est bona.

¹⁵Noli verbosus esse in multitudine presbyterorum, et non iteres verbum in oratione tua.

¹⁶Non oderis laboriosa opera, et rusticationem creatam ab Altissimo.

¹⁷Non te reputes in multitudine indisciplinatorum.

¹⁸Memento iræ, quoniam non tardabit.

¹⁹Humilia valde spiritum tuum, quoniam vindicta carnis impii ignis et vermis.

²⁰Noli prævaricari in amicum pecuniam differentem, neque fratrem carissimum auro spreveris.

²¹Noli discedere a muliere sensata et bona, quam sortitus es in timore Domini : gratia enim verecundiæ illius super aurum.

²²Non lædas servum in veritate operantem, neque mercenarium dantem animam suam.

²³Servus sensatus sit tibi dilectus quasi anima tua : non defraudes illum libertate, neque inopem derelinquas illum.

²⁴Pecora tibi sunt, attende illis : et si sunt utilia, perseverent apud te.

²⁵Filii tibi sunt ? erudi illos, et curva illos a pueritia illorum.

²⁶Filiæ tibi sunt ? serva corpus illarum, et non ostendas hilarem faciem tuam ad illas.

²⁷Trade filiam, et grande opus feceris : et homini sensato da illam.

²⁸Mulier si est tibi secundum animam tuam, non projicias illam : et odibili non credas te. In toto corde tuo

²⁹honora patrem tuum, et gemitus matris tuæ ne obliviscaris :

³⁰memento quoniam nisi per illos natus non fuisses : et retribue illis, quomodo et illi tibi.

³¹In tota anima tua time Dominum, et sacerdotes illius sanctifica.

³²In omni virtute tua dilige eum qui te fecit, et ministros ejus ne derelinquas.

³³Honora Deum ex tota anima tua, et honorifica sacerdotes, et propurga te cum brachiis.

³⁴Da illis partem, sicut mandatum est tibi, primitiarum et purgationis, et de negligentia tua purga te cum paucis.

³⁵Datum brachiorum tuorum, et sacrificium sanctificationis offeres Domino, et initia sanctorum.

³⁶Et pauperi porrige manum tuam, ut perficiatur propitiatio et benedictio tua.

³⁷Gratia dati in conspectu omnis viventis, et mortuo non prohibeas gratiam.

³⁸Non desis plorantibus in consolatione, et cum lugentibus ambula.

³⁹Non te pigeat visitare infirmum : ex his enim in dilectione firmaberis.

⁴⁰In omnibus operibus tuis memorare novissima tua, et in æternum non peccabis.