Ecclesiasticus 50

¹Simon Onii filius sacerdos magnus qui in vita sua suffulsit domum et in diebus suis corroboravit

²templi etiam altitudo ab ipso fundata est duplex aedificatio excelsa parietis templi

³in diebus ipsius remanaverunt putei aquarum et quasi mare adimpleti sunt supra modum

⁴qui curavit gentem suam et liberavit illam a pernicie

⁵qui praevaluit amplificare civitatem qui adeptus est gloriam in conversatione gentis et ingressum domus et atrii amplificatus est

⁶quasi stella matutina in medio nebulae et quasi luna plena in diebus suis lucet

⁷et quasi sol refulgens sic ille effulsit in templo Dei

⁸quasi arcus effulgens in nebulam gloriae et quasi flos rosarum in diebus veris quasi lilia quae sunt in transitu aquae et quasi tus redolens in diebus aestatis

⁹quasi ignis effulgens et tus ardens in igni

¹⁰quasi vas auri solidum ornatum omni lapide pretioso

¹¹quasi oliva pullulans et gyrus in altitudinem se tollens in accipiendo ipsum stolam gloriae et vestiri eum consummatione virtutis

¹²in ascensu altarii sancti gloriam dedit sanctitatis amictum

¹³in accipiendo autem partes de manu sacerdotum et ipse stans iuxta aram circa illum corona fratrum quasi plantatio cedri in monte Libano

¹⁴sic circa illum steterunt quasi rami in palma et omnes filii Aaron in gloria sua

¹⁵oblatio autem Domini in manibus ipsorum coram omni synagoga Israhel et consummationem fungens in ara amplificare oblationem excelsi Regis

¹⁶porrexit manum suam in libatione et libavit de sanguine uvae

¹⁷et fudit in fundamenta altarii odorem divinum excelso Principi

¹⁸tunc exclamaverunt filii Aaron in tubis productilibus sonaverunt et auditam fecerunt magnam vocem in memoriam coram Deo

¹⁹tunc omnis populus simul properaverunt et ceciderunt in faciem super terram adorare Dominum suum et dare preces Deo omnipotenti excelso

²⁰et amplificaverunt psallentes in vocibus suis et in magna domo auctus est sonus suavitate plenus

²¹et rogavit populus Dominum excelsum in prece usque dum perfectus est honor Domini et munus suum perfecerunt

²²tunc descendens extulit manus suas in omnem congregationem filiorum Israhel dare gloriam Deo a labiis suis et in nomine ipsius gloriari

²³et iteravit orationem suam volens ostendere virtutem Dei

²⁴et nunc orate Dominum omnium qui magna fecit in omni terra qui auxit dies nostros a ventre matris nostrae et fecit nobiscum secundum suam misericordiam

²⁵det nobis iucunditatem cordis et fieri pacem in diebus nostris in Israhel per dies sempiternos

²⁶credere Israhel nobiscum esse misericordiam Dei ut sanet vos in diebus suis

²⁷duas gentes odit anima mea tertia autem non est gens quam oderim

²⁸qui sedent in monte Seir et Philisthim et stultus populus qui habitat in Sicimis

²⁹doctrinam sapientiae et disciplinae scripsi in codice isto Iesus filius Sirach Hierosolymita qui renovavit sapientiam de corde suo

³⁰beatus qui in istis versatur bonis qui ponit illa in corde suo sapiens erit semper

³¹si enim haec fecerit ad omnia valebit quia lux Dei vestigium eius est

Ecclesiasticus 50

¹Simon, Oniæ filius, sacerdos magnus, qui in vita sua suffulsit domum, et in diebus suis corroboravit templum.

²Templi etiam altitudo ab ipso fundata est, duplex ædificatio, et excelsi parietes templi.

³In diebus ipsius emanaverunt putei aquarum, et quasi mare adimpleti sunt supra modum.

⁴Qui curavit gentem suam, et liberavit eam a perditione :

⁵qui prævaluit amplificare civitatem, qui adeptus est gloriam in conversatione gentis, et ingressum domus et atrii amplificavit.

⁶Quasi stella matutina in medio nebulæ, et quasi luna plena, in diebus suis lucet :

⁷et quasi sol refulgens, sic ille effulsit in templo Dei.

⁸Quasi arcus refulgens inter nebulas gloriæ, et quasi flos rosarum in diebus vernis, et quasi lilia quæ sunt in transitu aquæ, et quasi thus redolens in diebus æstatis :

⁹quasi ignis effulgens, et thus ardens in igne :

¹⁰quasi vas auri solidum, ornatum omni lapide pretioso :

¹¹quasi oliva pullulans, et cypressus in altitudinem se extollens, in accipiendo ipsum stolam gloriæ, et vestiri eum in consummationem virtutis.

¹²In ascensu altaris sancti gloriam dedit sanctitatis amictum.

¹³In accipiendo autem partes de manu sacerdotum, et ipse stans juxta aram : et circa illum corona fratrum : quasi plantatio cedri in monte Libano,

¹⁴sic circa illum steterunt quasi rami palmæ : et omnes filii Aaron in gloria sua.

¹⁵Oblatio autem Domini in manibus ipsorum coram omni synagoga Israël : et consummatione fungens in ara, amplificare oblationem excelsi Regis,

¹⁶porrexit manum suam in libatione, et libavit de sanguine uvæ.

¹⁷Effudit in fundamento altaris odorem divinum excelso Principi.

¹⁸Tunc exclamaverunt filii Aaron, in tubis productilibus sonuerunt : et auditam fecerunt vocem magnam in memoriam coram Deo.

¹⁹Tunc omnis populus simul properaverunt, et ceciderunt in faciem super terram, adorare Dominum Deum suum, et dare preces omnipotenti Deo excelso.

²⁰Et amplificaverunt psallentes in vocibus suis, et in magna domo auctus est sonus suavitatis plenus.

²¹Et rogavit populus Dominum excelsum in prece, usque dum perfectus est honor Domini, et munus suum perfecerunt.

²²Tunc descendens, manus suas extulit in omne congregationem filiorum Israël, dare gloriam Deo a labiis suis, et in nomine ipsius gloriari :

²³et iteravit orationem suam, volens ostendere virtutem Dei.

²⁴Et nunc orate Deum omnium, qui magna fecit in omni terra, qui auxit dies nostros a ventre matris nostræ, et fecit nobiscum secundum suam misericordiam :

²⁵det nobis jucunditatem cordis, et fieri pacem in diebus nostris in Israël per dies sempiternos :

²⁶credere Israël nobiscum esse Dei misericordiam, ut liberet nos in diebus suis.

²⁷Duas gentes odit anima mea : tertia autem non est gens quam oderim :

²⁸qui sedent in monte Seir, et Philisthiim, et stultus populus qui habitat in Sichimis.

²⁹Doctrinam sapientiæ et disciplinæ scripsit in codice isto Jesus, filius Sirach, Jerosolymita, qui renovavit sapientiam de corde suo.

³⁰Beatus qui in istis versatur bonis : qui ponit illa in corde suo, sapiens erit semper.

³¹Si enim hæc fecerit, ad omnia valebit, quia lux Dei vestigium ejus est.