Ecclesiasticus 3 Comparatio: Vulgate vs Clementine Vulgate

Ecclesiasticus 3

¹filii sapientiae ecclesia iustorum et natio illorum obaudientia et dilectio

²iudicium patris audite filii dilecti et sic facite ut salvi sitis

³Deus enim honoravit patrem in filiis et iudicium matris exquirens in filios

⁴qui diligit Deum exorabit pro peccatis et continebit se ab illis in oratione dierum exaudietur

⁵et sicut qui thesaurizat ita et qui honorificat matrem suam

⁶qui honorat patrem iucundabitur in filiis

⁷qui honorat patrem suum vita vivet longiore et qui obaudit patrem refrigerabit matri

⁸qui timet Deum honorat parentes et quasi dominis serviet in his qui se generaverunt

⁹in opere et sermone et omni patientia honora patrem tuum

¹⁰ut superveniat tibi benedictio a Deo et benedictio illius in novissimo manet

¹¹benedictio patris firmat domos filiorum maledictio autem matris eradicat fundamenta

¹²ne glorieris in contumelia patris tui non est enim tibi gloria sed confusio

¹³gloria enim hominis ex honore patris sui et dedecus filiis pater sine honore

¹⁴fili suscipe senectam patris tui et ne contristes eum in vita illius

¹⁵et si defecerit sensu veniam da et ne spernas eum in tua virtute elemosyna enim patris non erit in oblivione

¹⁶nam pro peccato matris restituetur tibi bonum

¹⁷et iniustitia aedificabitur tibi in die tribulationis commemorabitur tui sicut in sereno glacies solventur tua peccata

¹⁸quam malae famae est qui relinquit patrem et est maledictus a Deo qui exasperat matrem

¹⁹fili in mansuetudine opera tua perfice et super hominum gloriam diligeris

²⁰quanto magnus es humilia te in omnibus et coram Deo invenies gratiam

²¹quoniam magna potentia Dei solius et ab humilibus honoratur

²²altiora te ne scrutaveris et fortiora te ne exquisieris sed quae praecepit tibi Deus illa cogita semper et in pluribus operibus eius ne fueris curiosus

²³non est enim tibi necessarium ea quae abscondita sunt videre oculis tuis

²⁴in supervacuis rebus noli scrutari multipliciter et in pluribus operibus eius non eris curiosus

²⁵plurima enim super sensum hominis ostensa sunt tibi

²⁶multos enim inplanavit suspicio illorum et in vanitate detinuit sensus illorum

²⁷cor durum male habebit in novissimo et qui amat periculum in illo peribit

²⁸cor ingrediens duas vias non habebit successus et pravicordius in illis scandalizabitur

²⁹cor nequam gravabitur doloribus et peccator adiciet ad peccandum

³⁰synagogae superborum non est sanitas frutex enim peccati eradicabitur in illis et non intellegetur

³¹cor sapiens intellegitur in sapientia et auris bona audiet cum omni concupiscentia sapientiam

³²sapiens cor et intellegibile abstinebit se a peccatis et in operibus iustitiae successus habebit

³³ignem ardentem extinguit aqua et elemosyna resistit peccatis

³⁴et Deus conspector qui reddit gratiam meminit in posterum et in tempore casus tui invenies firmamentum

Ecclesiasticus 3

¹Filii sapientiæ ecclesia justorum, et natio illorum obedientia et dilectio.

²Judicium patris audite, filii, et sic facite, ut salvi sitis.

³Deus enim honoravit patrem in filiis : et judicium matris exquirens, firmavit in filios.

⁴Qui diligit Deum exorabit pro peccatis, et continebit se ab illis, et in oratione dierum exaudietur.

⁵Et sicut qui thesaurizat, ita et qui honorificat matrem suam.

⁶Qui honorat patrem suum jucundabitur in filiis, et in die orationis suæ exaudietur.

⁷Qui honorat patrem suum vita vivet longiore, et qui obedit patri refrigerabit matrem.

⁸Qui timet Dominum honorat parentes, et quasi dominis serviet his qui se genuerunt.

⁹In opere, et sermone, et omni patientia, honora patrem tuum,

¹⁰ut superveniat tibi benedictio ab eo, et benedictio illius in novissimo maneat.

¹¹Benedictio patris firmat domos filiorum : maledictio autem matris eradicat fundamenta.

¹²Ne glorieris in contumelia patris tui : non enim est tibi gloria ejus confusio.

¹³Gloria enim hominis ex honore patris sui, et dedecus filii pater sine honore.

¹⁴Fili, suscipe senectam patris tui, et non contristes eum in vita illius :

¹⁵et si defecerit sensu, veniam da, et ne spernas eum in virtute tua : eleemosyna enim patris non erit in oblivione.

¹⁶Nam pro peccato matris restituetur tibi bonum :

¹⁷et in justitia ædificabitur tibi, et in die tribulationis commemorabitur tui, et sicut in sereno glacies, solventur peccata tua.

¹⁸Quam malæ famæ est qui derelinquit patrem, et est maledictus a Deo qui exasperat matrem !

¹⁹Fili, in mansuetudine opera tua perfice, et super hominum gloriam diligeris.

²⁰Quanto magnus es, humilia te in omnibus, et coram Deo invenies gratiam :

²¹quoniam magna potentia Dei solius, et ab humilibus honoratur.

²²Altiora te ne quæsieris, et fortiora te ne scrutatus fueris : sed quæ præcepit tibi Deus, illa cogita semper, et in pluribus operibus ejus ne fueris curiosus.

²³Non est enim tibi necessarium ea, quæ abscondita sunt, videre oculis tuis.

²⁴In supervacuis rebus noli scrutari multipliciter, et in pluribus operibus ejus non eris curiosus.

²⁵Plurima enim super sensum hominum ostensa sunt tibi :

²⁶multos quoque supplantavit suspicio illorum, et in vanitate detinuit sensus illorum.

²⁷Cor durum habebit male in novissimo, et qui amat periculum in illo peribit.

²⁸Cor ingrediens duas vias non habebit successus, et pravus corde in illis scandalizabitur.

²⁹Cor nequam gravabitur in doloribus, et peccator adjiciet ad peccandum.

³⁰Synagogæ superborum non erit sanitas, frutex enim peccati radicabitur in illis, et non intelligetur.

³¹Cor sapientis intelligitur in sapientia, et auris bona audiet cum omni concupiscentia sapientiam.

³²Sapiens cor et intelligibile abstinebit se a peccatis, et in operibus justitiæ successus habebit.

³³Ignem ardentem exstinguit aqua, et eleemosyna resistit peccatis :

³⁴et Deus prospector est ejus qui reddit gratiam : meminit ejus in posterum, et in tempore casus sui inveniet firmamentum.