Ecclesiasticus 2 Comparatio: Vulgate vs Clementine Vulgate

Ecclesiasticus 2

¹fili accedens servituti Dei sta in iustitia et timore et praepara animam tuam ad temptationem

²deprime cor tuum et sustine declina aurem et excipe verba intellectus et ne festines in tempus obductionis

³sustine sustentationes Dei coniungere Deo et sustine ut crescat in novissimo vita tua

⁴omne quod tibi adplicitum fuerit accipe et in dolore sustine et in humilitate tua habe patientiam

⁵quoniam in igne probatur aurum et argentum homines vero receptibiles in camino humiliationis

⁶crede Deo et recuperabit te et dirige viam tuam et spera in illum serva timorem illius et in illo veteresce

⁷metuentes Deum sustinete misericordiam eius et non deflectatis ab illo ne cadatis

⁸qui timetis Deum credite illi et non evacuabitur merces vestra

⁹qui timetis Deum sperate in illum et in oblectatione veniet vobis misericordia

¹⁰qui timetis Deum diligite illum et inluminabuntur corda vestra

¹¹respicite filii nationes hominum et scitote quis speravit in Dominum et confusus est

¹²permansit in mandatis eius et derelictus est et quis invocavit illum et despexit illum

¹³quoniam pius et misericors Deus et remittit in tempore tribulationis peccata omnibus exquirentibus se in veritate

¹⁴vae duplici corde et labiis scelestis et manibus malefacientibus et peccatori terram ingredienti duabus viis

¹⁵vae dissolutis corde qui non credunt Deo ideo non protegentur ab eo

¹⁶vae his qui perdiderunt sustinentiam qui dereliquerunt vias rectas et deverterunt in vias pravas

¹⁷et quid facietis cum inspicere coeperit Deus

¹⁸qui timent Dominum non erunt incredibiles verbo illius et qui diligunt illum conservabunt viam illius

¹⁹qui timent Dominum inquirent quae beneplacita sunt illi et qui diligunt eum replebuntur lege ipsius

²⁰qui timent Dominum parabunt corda sua et in conspectu illius sanctificabunt animas suas

²¹qui timent Dominum custodiunt mandata illius et patientiam habebunt usque ad inspectionem illius

²²dicentes si paenitentiam non egerimus incidemus in Dei manus et non in manus hominum

²³secundum enim magnitudinem illius sic et misericordia ipsius cum ipso

Ecclesiasticus 2

¹Fili, accedens ad servitutem Dei sta in justitia et timore, et præpara animam tuam ad tentationem.

²Deprime cor tuum, et sustine : inclina aurem tuam, et suscipe verba intellectus : et ne festines in tempore obductionis.

³Sustine sustentationes Dei : conjungere Deo, et sustine, ut crescat in novissimo vita tua.

⁴Omne quod tibi applicitum fuerit accipe : et in dolore sustine, et in humilitate tua patientiam habe :

⁵quoniam in igne probatur aurum et argentum, homines vero receptibiles in camino humiliationis.

⁶Crede Deo, et recuperabit te : et dirige viam tuam, et spera in illum : serva timorem illius, et in illo veterasce.

⁷Metuentes Dominum, sustinete misericordiam ejus : et non deflectatis ab illo, ne cadatis.

⁸Qui timetis Dominum, credite illi, et non evacuabitur merces vestra.

⁹Qui timetis Dominum, sperate in illum, et in oblectationem veniet vobis misericordia.

¹⁰Qui timetis Dominum, diligite illum, et illuminabuntur corda vestra.

¹¹Respicite, filii, nationes hominum : et scitote quia nullus speravit in Domino et confusus est.

¹²Quis enim permansit in mandatis ejus, et derelictus est ? aut quis invocavit eum, et despexit illum ?

¹³Quoniam pius et misericors est Deus, et remittet in die tribulationis peccata, et protector est omnibus exquirentibus se in veritate.

¹⁴Væ duplici corde, et labiis scelestis, et manibus malefacientibus, et peccatori terram ingredienti duabus viis !

¹⁵Væ dissolutis corde, qui non credunt Deo, et ideo non protegentur ab eo !

¹⁶Væ his qui perdiderunt sustinentiam, et qui dereliquerunt vias rectas, et diverterunt in vias pravas !

¹⁷Et quid facient cum inspicere cœperit Dominus ?

¹⁸Qui timent Dominum non erunt incredibiles verbo illius : et qui diligunt illum conservabunt viam illius.

¹⁹Qui timent Dominum inquirent quæ beneplacita sunt ei, et qui diligunt eum replebuntur lege ipsius.

²⁰Qui timent Dominum præparabunt corda sua, et in conspectu illius sanctificabunt animas suas.

²¹Qui timent Dominum custodiunt mandata illius, et patientiam habebunt usque ad inspectionem illius,

²²dicentes : Si pœnitentiam non egerimus, incidemus in manus Domini, et non in manus hominum.

²³Secundum enim magnitudinem ipsius, sic et misericordia illius cum ipso est.