Ecclesiasticus 11

¹sapientia humiliati exaltabit caput illius et in medio magnatorum consedere illum faciet

²non laudes virum in specie sua neque spernas hominem in visu suo

³brevis in volatilibus est apis et initium dulcoris habet fructus illius

⁴in vestitu ne glorieris umquam nec in die honoris tui extollaris quoniam mirabilia opera Altissimi solius et gloriosa et absconsa et invisa opera illius

⁵multi tyranni sederunt in throno et insuspicabilis portavit diadema

⁶multi potentes pressi sunt valide et gloriosi traditi sunt in manus alterorum

⁷priusquam interroges ne vituperes quemquam et cum interrogaveris corripe iuste

⁸priusquam audias ne respondeas verbum et in medio sermonum ne adicias loqui

⁹de re ea quae te non molestat ne certeris et in iudicio peccantium ne consistas

¹⁰fili ne in multis sint actus tui et si dives fueris non eris inmunis a delicto si enim secutus fueris non adprehendes et non effugies si praecucurreris

¹¹est laborans et festinans et dolens impius et tanto magis non abundat

¹²est homo marcidus egens recuperatione plus deficiens virtute et abundans paupertate

¹³et oculus Dei respexit illum in bono et erexit illum ab humilitate ipsius et exaltavit caput eius et mirati sunt in illo multi et honoraverunt Deum

¹⁴bona et mala vita et mors et paupertas et honestas a Deo sunt

¹⁵[]

¹⁶[]

¹⁷datio Dei permanet iustis et profectus illius successus habebunt in aeternum

¹⁸est qui locupletatur parce agendo et haec pars mercedis illius

¹⁹in eo quod dicit inveni requiem mihi et nunc manducabo de bonis meis solus

²⁰et nescit quod tempus praetereat et relinquet omnia aliis

²¹sta in testamento tuo et in illo conloquere et in opere mandatorum tuorum veteresce

²²ne manseris in operibus peccatorum fide autem in Deo et mane in loco tuo

²³facile est enim in oculis Dei de subito honestari pauperem

²⁴benedictio Dei in mercedem iusti festinat et in honore veloci processus illius fructificat

²⁵ne dicas quid est mihi opus et quae erunt mihi ex hoc bona

²⁶ne dicas sufficiens sum et quid ex hoc pessimabor

²⁷in die bonorum ne inmemor sis malorum et in die malorum ne inmemor sis bonorum

²⁸quoniam facile coram Deo in die obitus retribuere unicuique secundum vias suas

²⁹malitia horae oblivionem facit luxuriae magnae et in fine hominis denudatio operum illius

³⁰ante mortem ne laudes hominem quemquam quoniam in filiis suis agnoscitur vir

³¹non omnem hominem inducas in domum tuam multae enim insidiae sunt dolosi

³²sicut enim eructant praecordia fetantium sicut perdix inducitur in caveam et ut caprea in laqueum sic et cor superborum et sicut prospectator videns casum proximi sui

³³bona enim in mala convertens insidiatur et in electis inponet maculam

³⁴ab scintilla una augetur ignis et ab uno doloso augetur sanguis homo vero peccator sanguini insidiatur

³⁵adtende te a pestifero fabricat enim mala ne forte inducat super te subsannationem in perpetuum

³⁶admitte ad te alienigenam et subvertet te in turbore et abalienabit te a tuis propriis

Ecclesiasticus 11

¹Sapientia humiliati exaltabit caput illius, et in medio magnatorum consedere illum faciet.

²Non laudes virum in specie sua, neque spernas hominem in visu suo.

³Brevis in volatilibus est apis, et initium dulcoris habet fructus illius.

⁴In vestitu ne glorieris umquam, nec in die honoris tui extollaris : quoniam mirabilia opera Altissimi solius, et gloriosa, et absconsa, et invisa opera illius.

⁵Multi tyranni sederunt in throno : et insuspicabilis portavit diadema.

⁶Multi potentes oppressi sunt valide, et gloriosi traditi sunt in manus alterorum.

⁷Priusquam interroges, ne vituperes quemquam : et cum interrogaveris, corripe juste.

⁸Priusquam audias, ne respondeas verbum : et in medio sermonum ne adjicias loqui.

⁹De ea re quæ te non molestat, ne certeris : et in judicio peccantium ne consistas.

¹⁰Fili, ne in multis sint actus tui : et si dives fueris, non eris immunis a delicto. Si enim secutus fueris, non apprehendes : et non effugies, si præcucurreris.

¹¹Est homo laborans et festinans, et dolens : impius, et tanto magis non abundabit.

¹²Est homo marcidus egens recuperatione, plus deficiens virtute, et abundans paupertate :

¹³et oculus Dei respexit illum in bono, et erexit eum ab humilitate ipsius, et exaltavit caput ejus : et mirati sunt in illo multi, et honoraverunt Deum.

¹⁴Bona et mala, vita et mors, paupertas et honestas, a Deo sunt :

¹⁵sapientia, et disciplina, et scientia legis, apud Deum : dilectio, et viæ bonorum, apud ipsum.

¹⁶Error et tenebræ peccatoribus concreata sunt : qui autem exsultant in malis consenescunt in malo.

¹⁷Datio Dei permanet justis, et profectus illius successus habebit in æternum.

¹⁸Est qui locupletatur parce agendo, et hæc est pars mercedis illius.

¹⁹In eo quod dicit : Inveni requiem mihi, et nunc manducabo de bonis meis solus :

²⁰et nescit quod tempus præteriet, et mors appropinquet, et relinquat omnia aliis, et morietur.

²¹Sta in testamento tuo, et in illo colloquere, et in opere mandatorum tuorum veterasce.

²²Ne manseris in operibus peccatorum : confide autem in Deo, et mane in loco tuo.

²³Facile est enim in oculis Dei subito honestare pauperem.

²⁴Benedictio Dei in mercedem justi festinat, et in hora veloci processus illius fructificat.

²⁵Ne dicas : Quid est mihi opus ? et quæ erunt mihi ex hoc bona ?

²⁶Ne dicas : Sufficiens mihi sum : et quid ex hoc pessimabor ?

²⁷In die bonorum ne immemor sis malorum, et in die malorum ne immemor sis bonorum :

²⁸quoniam facile est coram Deo in die obitus retribuere unicuique secundum vias suas.

²⁹Malitia horæ oblivionem facit luxuriæ magnæ, et in fine hominis denudatio operum illius.

³⁰Ante mortem ne laudes hominem quemquam : quoniam in filiis suis agnoscitur vir.

³¹Non omnem hominem inducas in domum tuam : multæ enim sunt insidiæ dolosi.

³²Sicut enim eructant præcordia fœtentium, et sicut perdix inducitur in caveam, et ut caprea in laqueum : sic et cor superborum, et sicut prospector videns casum proximi sui.

³³Bona enim in mala convertens insidiatur, et in electis imponet maculam.

³⁴A scintilla una augetur ignis, et ab uno doloso augetur sanguis : homo vero peccator sanguini insidiatur.

³⁵Attende tibi a pestifero, fabricat enim mala, ne inducat super te subsannationem in perpetuum.

³⁶Admitte ad te alienigenam : et subvertet te in turbine, et abalienabit te a tuis propriis.