Actus Apostolorum 9

¹Saulus autem adhuc inspirans minarum et caedis in discipulos Domini accessit ad principem sacerdotum

²et petiit ab eo epistulas in Damascum ad synagogas ut si quos invenisset huius viae viros ac mulieres vinctos perduceret in Hierusalem

³et cum iter faceret contigit ut adpropinquaret Damasco et subito circumfulsit eum lux de caelo

⁴et cadens in terram audivit vocem dicentem sibi Saule Saule quid me persequeris

⁵qui dixit quis es Domine et ille ego sum Iesus quem tu persequeris

⁶[]

⁷sed surge et ingredere civitatem et dicetur tibi quid te oporteat facere viri autem illi qui comitabantur cum eo stabant stupefacti audientes quidem vocem neminem autem videntes

⁸surrexit autem Saulus de terra apertisque oculis nihil videbat ad manus autem illum trahentes introduxerunt Damascum

⁹et erat tribus diebus non videns et non manducavit neque bibit

¹⁰erat autem quidam discipulus Damasci nomine Ananias et dixit ad illum in visu Dominus Anania at ille ait ecce ego Domine

¹¹et Dominus ad illum surgens vade in vicum qui vocatur Rectus et quaere in domo Iudae Saulum nomine Tarsensem ecce enim orat

¹²et vidit virum Ananiam nomine introeuntem et inponentem sibi manus ut visum recipiat

¹³respondit autem Ananias Domine audivi a multis de viro hoc quanta mala sanctis tuis fecerit in Hierusalem

¹⁴et hic habet potestatem a principibus sacerdotum alligandi omnes qui invocant nomen tuum

¹⁵dixit autem ad eum Dominus vade quoniam vas electionis est mihi iste ut portet nomen meum coram gentibus et regibus et filiis Israhel

¹⁶ego enim ostendam illi quanta oporteat eum pro nomine meo pati

¹⁷et abiit Ananias et introivit in domum et inponens ei manus dixit Saule frater Dominus misit me Iesus qui apparuit tibi in via qua veniebas ut videas et implearis Spiritu Sancto

¹⁸et confestim ceciderunt ab oculis eius tamquam squamae et visum recepit et surgens baptizatus est

¹⁹et cum accepisset cibum confortatus est fuit autem cum discipulis qui erant Damasci per dies aliquot

²⁰et continuo in synagogis praedicabat Iesum quoniam hic est Filius Dei

²¹stupebant autem omnes qui audiebant et dicebant nonne hic est qui expugnabat in Hierusalem eos qui invocabant nomen istud et huc ad hoc venit ut vinctos illos duceret ad principes sacerdotum

²²Saulus autem magis convalescebat et confundebat Iudaeos qui habitabant Damasci adfirmans quoniam hic est Christus

²³cum implerentur autem dies multi consilium fecerunt Iudaei ut eum interficerent

²⁴notae autem factae sunt Saulo insidiae eorum custodiebant autem et portas die ac nocte ut eum interficerent

²⁵accipientes autem discipuli eius nocte per murum dimiserunt eum submittentes in sporta

²⁶cum autem venisset in Hierusalem temptabat iungere se discipulis et omnes timebant eum non credentes quia esset discipulus

²⁷Barnabas autem adprehensum illum duxit ad apostolos et narravit illis quomodo in via vidisset Dominum et quia locutus est ei et quomodo in Damasco fiducialiter egerit in nomine Iesu

²⁸et erat cum illis intrans et exiens in Hierusalem et fiducialiter agens in nomine Domini

²⁹loquebatur quoque et disputabat cum Graecis illi autem quaerebant occidere eum

³⁰quod cum cognovissent fratres deduxerunt eum Caesaream et dimiserunt Tarsum

³¹ecclesia quidem per totam Iudaeam et Galilaeam et Samariam habebat pacem et aedificabatur ambulans in timore Domini et consolatione Sancti Spiritus replebatur

³²factum est autem Petrum dum pertransiret universos devenire et ad sanctos qui habitabant Lyddae

³³invenit autem ibi hominem quendam nomine Aeneam ab annis octo iacentem in grabatto qui erat paralyticus

³⁴et ait illi Petrus Aeneas sanat te Iesus Christus surge et sterne tibi et continuo surrexit

³⁵et viderunt illum omnes qui habitabant Lyddae et Saronae qui conversi sunt ad Dominum

³⁶in Ioppe autem fuit quaedam discipula nomine Tabitas quae interpretata dicitur Dorcas haec erat plena operibus bonis et elemosynis quas faciebat

³⁷factum est autem in diebus illis ut infirmata moreretur quam cum lavissent posuerunt eam in cenaculo

³⁸cum autem prope esset Lydda ab Ioppe discipuli audientes quia Petrus esset in ea miserunt duos viros ad eum rogantes ne pigriteris venire usque ad nos

³⁹exsurgens autem Petrus venit cum illis et cum advenisset duxerunt illum in cenaculum et circumsteterunt illum omnes viduae flentes et ostendentes tunicas et vestes quas faciebat illis Dorcas

⁴⁰eiectis autem omnibus foras Petrus ponens genua oravit et conversus ad corpus dixit Tabita surge at illa aperuit oculos suos et viso Petro resedit

⁴¹dans autem illi manum erexit eam et cum vocasset sanctos et viduas adsignavit eam vivam

⁴²notum autem factum est per universam Ioppen et crediderunt multi in Domino

⁴³factum est autem ut dies multos moraretur in Ioppe apud quendam Simonem coriarium

Actus Apostolorum 9

¹Saulus autem adhuc spirans minarum et cædis in discipulos Domini, accessit ad principem sacerdotum,

²et petiit ab eo epistolas in Damascum ad synagogas : ut si quos invenisset hujus viæ viros ac mulieres, vinctos perduceret in Jerusalem.

³Et cum iter faceret, contigit ut appropinquaret Damasco : et subito circumfulsit eum lux de cælo.

⁴Et cadens in terram audivit vocem dicentem sibi : Saule, Saule, quid me persequeris ?

⁵Qui dixit : Quis es, domine ? Et ille : Ego sum Jesus, quem tu persequeris : durum est tibi contra stimulum calcitrare.

⁶Et tremens ac stupens dixit : Domine, quid me vis facere ?

⁷Et Dominus ad eum : Surge, et ingredere civitatem, et ibi dicetur tibi quid te oporteat facere. Viri autem illi qui comitabantur cum eo, stabant stupefacti, audientes quidem vocem, neminem autem videntes.

⁸Surrexit autem Saulus de terra, apertisque oculis nihil videbat. Ad manus autem illum trahentes, introduxerunt Damascum.

⁹Et erat ibi tribus diebus non videns, et non manducavit, neque bibit.

¹⁰Erat autem quidam discipulus Damasci, nomine Ananias : et dixit ad illum in visu Dominus : Anania. At ille ait : Ecce ego, Domine.

¹¹Et Dominus ad eum : Surge, et vade in vicum qui vocatur Rectus : et quære in domo Judæ Saulum nomine Tarsensem : ecce enim orat.

¹²(Et vidit virum Ananiam nomine, introëuntem, et imponentem sibi manus ut visum recipiat.)

¹³Respondit autem Ananias : Domine, audivi a multis de viro hoc, quanta mala fecerit sanctis tuis in Jerusalem :

¹⁴et hic habet potestatem a principibus sacerdotum alligandi omnes qui invocant nomen tuum.

¹⁵Dixit autem ad eum Dominus : Vade, quoniam vas electionis est mihi iste, ut portet nomen meum coram gentibus, et regibus, et filiis Israël.

¹⁶Ego enim ostendam illi quanta oporteat eum pro nomine meo pati.

¹⁷Et abiit Ananias, et introivit in domum : et imponens ei manus, dixit : Saule frater, Dominus misit me Jesus, qui apparuit tibi in via qua veniebas, ut videas, et implearis Spiritu Sancto.

¹⁸Et confestim ceciderunt ab oculis ejus tamquam squamæ, et visum recepit : et surgens baptizatus est.

¹⁹Et cum accepisset cibum, confortatus est. Fuit autem cum discipulis qui erant Damasci per dies aliquot.

²⁰Et continuo in synagogis prædicabat Jesum, quoniam hic est Filius Dei.

²¹Stupebant autem omnes qui audiebant, et dicebant : Nonne hic est qui expugnabat in Jerusalem eos qui invocabant nomen istud : et huc ad hoc venit, ut vinctos illos duceret ad principes sacerdotum ?

²²Saulus autem multo magis convalescebat, et confundebat Judæos qui habitabant Damasci, affirmans quoniam hic est Christus.

²³Cum autem implerentur dies multi, consilium fecerunt in unum Judæi ut eum interficerent.

²⁴Notæ autem factæ sunt Saulo insidiæ eorum. Custodiebant autem et portas die ac nocte, ut eum interficerent.

²⁵Accipientes autem eum discipuli nocte, per murum dimiserunt eum, submittentes in sporta.

²⁶Cum autem venisset in Jerusalem, tentabat se jungere discipulis, et omnes timebant eum, non credentes quod esset discipulus.

²⁷Barnabas autem apprehensum illum duxit ad Apostolos : et narravit illis quomodo in via vidisset Dominum, et quia locutus est ei, et quomodo in Damasco fiducialiter egerit in nomine Jesu.

²⁸Et erat cum illis intrans et exiens in Jerusalem, et fiducialiter agens in nomine Domini.

²⁹Loquebatur quoque gentibus, et disputabat cum Græcis : illi autem quærebant occidere eum.

³⁰Quod cum cognovissent fratres, deduxerunt eum Cæsaream, et dimiserunt Tarsum.

³¹Ecclesia quidem per totam Judæam, et Galilæam, et Samariam habebat pacem, et ædificabatur ambulans in timore Domini, et consolatione Sancti Spiritus replebatur.

³²Factum est autem, ut Petrus dum pertransiret universos, deveniret ad sanctos qui habitabant Lyddæ.

³³Invenit autem ibi hominem quemdam, nomine Æneam, ab annis octo jacentem in grabato, qui erat paralyticus.

³⁴Et ait illi Petrus : Ænea, sanat te Dominus Jesus Christus : surge, et sterne tibi. Et continuo surrexit.

³⁵Et viderunt eum omnes qui habitabant Lyddæ et Saronæ : qui conversi sunt ad Dominum.

³⁶In Joppe autem fuit quædam discipula, nomine Tabitha, quæ interpretata dicitur Dorcas. Hæc erat plena operibus bonis et eleemosynis quas faciebat.

³⁷Factum est autem in diebus illis ut infirmata moreretur. Quam cum lavissent, posuerunt eam in cœnaculo.

³⁸Cum autem prope esset Lydda ad Joppen, discipuli, audientes quia Petrus esset in ea, miserunt duos viros ad eum, rogantes : Ne pigriteris venire ad nos.

³⁹Exsurgens autem Petrus, venit cum illis. Et cum advenisset, duxerunt illum in cœnaculum : et circumsteterunt illum omnes viduæ flentes, et ostendentes ei tunicas et vestes quas faciebat illis Dorcas.

⁴⁰Ejectis autem omnibus foras, Petrus ponens genua oravit : et conversus ad corpus, dixit : Tabitha, surge. At illa aperuit oculos suos : et viso Petro, resedit.

⁴¹Dans autem illi manum, erexit eam. Et cum vocasset sanctos et viduas, assignavit eam vivam.

⁴²Notum autem factum est per universam Joppen : et crediderunt multi in Domino.

⁴³Factum est autem ut dies multos moraretur in Joppe, apud Simonem quemdam coriarium.