1ויהי אחרי כלותו לדבר את כל דבריו באזני העם ויבא אל כפר נחום׃stylus···2ועבד לאחד משרי המאות חלה למות והוא יקר לו מאד׃stylus···3וישמע את שמע ישוע וישלח אליו מזקני היהודים וישאל מאתו לבוא ולהושיע את עבדו׃stylus···4ויבאו אל ישוע ויתחננו לו מאד ויאמרו ראוי הוא אשר תעשה בקשתו׃stylus···5כי אהב עמנו הוא והוא בנה לנו את בית הכנסת׃stylus···6וילך אתם ישוע ויהי כאשר קרב אל הבית וישלח אליו שר המאה על ידי רעיו לאמר לו בי אדני אל נא תטריח את עצמך כי אינני כדי שתבוא בצל קורתי׃stylus···7ובעבור זאת גם את עצמי לא חשבתי ראוי לבוא אליך אך דבר נא דבר וירפא נערי׃stylus···8כי גם אנכי איש נתון תחת השלטון יש תחת ידי אנשי צבא ואמרתי לזה לך והלך ולזה בוא ובא ולעבדי עשה זאת ועשה׃stylus···9וישמע ישוע את דבריו ויתמה עליו ויפן ויאמר אל ההמון ההלך אחריו אמר אני לכם גם בישראל לא מצאתי אמונה גדולה כזאת׃stylus···10וישובו השלוחים אל הבית וימצאו את העבד החלה והוא נרפא׃stylus···11ויהי ממחרת וילך אל עיר ושמה נעים ורבים מתלמידיו הלכים אתו והמון עם רב׃stylus···12הוא קרב אל שער העיר והנה מוציאים מת בן יחיד לאמו והיא אלמנה ועמה רבים מעם העיר׃stylus···13וכראות אתה האדון נכמרו רחמיו עליה ויאמר לה אל תבכי׃stylus···14ויגש ויגע בארון והנשאים עמדו ויאמר עלם אמר אני אליך קומה׃stylus···15ויתעודד המת ויחל לדבר ויתנהו לאמו׃stylus···16ותאחז כלם רעדה וישבחו את האלהים ויאמרו כי נביא גדול קם בקרבנו וכי פקד האלהים את עמו׃stylus···17ויצא הדבר הזה בכל יהודה ובכל הככר׃stylus···18ותלמידי יוחנן הגידו לו את כל אלה׃stylus···19ויקרא אליו יוחנן שנים מתלמידיו וישלחם אל ישוע לאמר לו האתה הוא הבא אם נחכה לאחר׃stylus···20ויבאו אליו האנשים ויאמרו יוחנן המטביל שלחנו אליך לאמר האתה הוא הבא אם נחכה לאחר׃stylus···21בעת ההיא רפא רבים מחליים ומנגעים ומרוחות רעות ולעורים רבים נתן ראות עינים׃stylus···22ויען ישוע ויאמר להם לכו והגידו ליוחנן את אשר ראיתם ואשר שמעתם כי עורים ראים ופסחים מתהלכים ומצרעים מטהרים וחרשים שומעים ומתים קמים ועניים מתבשרים׃stylus···23ואשרי אשר לא יכשל בי׃stylus···24ויהי כאשר הלכו להם שלוחי יוחנן ויחל לדבר אל המון העם על אדות יוחנן ויאמר מה זה יצאתם המדברה לראות הקנה אשר ינוע ברוח׃stylus···25ואם לא מה זה יצאתם לראות האיש לבוש בגדי עדנים הנה המלבשים בגדי תפארת והמענגים בחצרות המלכים המה׃stylus···26ועתה מה זה יצאתם לראות אם לראות איש נביא הן אני אמר לכם כי אף גדול הוא מנביא׃stylus···27זה הוא אשר כתוב עליו הנני שלח מלאכי לפניך ופנה דרכך לפניך׃stylus···28כי אמר אני לכם אין איש בילודי אשה גדול מיוחנן המטביל אך הקטן במלכות האלהים גדול הוא ממנו׃stylus···29וכל העם והמכסים כשמעם הצדיקו את האלהים ויטבלו בטבילת יוחנן׃stylus···30אך הפרושים ובעלי התורה נאצו את עצת האלהים על נפשם ולא נטבלו על ידו׃stylus···31ויאמר האדון עתה אל מי אדמה את אנשי הדור הזה ואל מי הם דמים׃stylus···32דמים הם לילדים הישבים בשוק וקראים זה אל זה ואמרים חללנו לכם בחלילים ולא רקדתם קוננו לכם קינה ולא בכיתם׃stylus···33כי בא יוחנן המטביל לחם לא אכל ויין לא שתה ואמרתם שד בו׃stylus···34ובא בן האדם והוא אכל ושתה ואמרתם הנה זולל וסבא ורע למוכסים ולחטאים׃stylus···35ותצדק החכמה על ידי כל בניה׃stylus···36ויבקש ממנו אחד מן הפרושים לאכל אתו לחם ויבא אל בית הפרוש ויסב׃stylus···37והנה אשה אחת בעיר והיא חטאת שמעה כי הוא מסב בית הפרוש ותבא פך שמן המור׃stylus···38ותעמד לרגליו מאחריו ותבך ותחל להרטיב את רגליו בדמעות ותנגב אתן בשערות ראשה ותשק את רגליו ותמשח אתן בשמן׃stylus···39וירא הפרוש הקרא אתו ויאמר בלבו אלו היה זה נביא כי עתה ידע ידע מי היא זאת ואי זו היא הנגעת בו כי אשה חטאת היא׃stylus···40ויען ישוע ויאמר אליו שמעון דבר לי אליך ויאמר רבי דבר׃stylus···41שני חיבים היו לנשה אחד האחד חיב לו דינרים חמש מאות והשני דינרים חמשים׃stylus···42ויהי באשר לא השיגה ידם לשלם וישמט את שניהם ועתה אמר נא מי משניהם ירבה לאהבה אתו׃stylus···43ויען שמעון ויאמר אחשב כי האיש ההוא אשר הרבה להשמיט לו ויאמר אליו כן שפטת׃stylus···44ויפן אל האשה ויאמר אל שמעון הראית את האשה הזאת הנה באתי אל ביתך ומים על רגלי לא נתת והיא הרטיבה את רגלי בדמעות ותנגב בשערותיה׃stylus···45נשיקה לא נשקתני והיא מאז באתי לא חדלה מנשק את רגלי׃stylus···46בשמן לא משחת את ראשי והיא בשמן המור משחה את רגלי׃stylus···47לכן אני אמר אליך נסלחו לה חטאתיה הרבות כי הרבה אהבה ואשר נסלח לו מעט הוא אהב מעט׃stylus···48ויאמר אליה נסלחו לך חטאתיך׃stylus···49ויחלו המסבים עמו לאמר בלבם מי הוא זה אשר גם יסלח חטאים׃stylus···50ויאמר אל האשה אמונתך הושיעה לך לכי לשלום׃stylus···