1The title of the seuene and eiytetithe salm. The song of salm, to the sones of Chore, to victorie on Mahalat, for to answere, the lernyng of Heman Ezraite.

stylus

2Lord God of myn helthe; Y criede in dai and nyyt bifore thee.

stylus

3Mi preier entre bifore thi siyt; bowe doun thin eere to my preier.

stylus

4For my soule is fillid with yuels; and my lijf neiyede to helle.

stylus

5I am gessid with hem that goon doun in to the lake; Y am maad as a man with outen help,

stylus

6and fre among deed men. As men woundid slepinge in sepulcris, of whiche men noon is myndeful aftir; and thei ben put awei fro thin hond.

stylus

7Thei han put me in the lower lake; in derke places, and in the schadewe of deth.

stylus

8Thi strong veniaunce is confermed on me; and thou hast brouyt in alle thi wawis on me.

stylus

9Thou hast maad fer fro me my knowun; thei han set me abhomynacioun to hem silf. I am takun, and Y yede not out;

stylus

10myn iyen weren sijk for pouert. Lord, Y criede to thee; al dai Y spredde abrood myn hondis to thee.

stylus

11Whethir thou schalt do merueils to deed men; ether leechis schulen reise, and thei schulen knouleche to thee?

stylus

12Whether ony man in sepulcre schal telle thi merci; and thi treuthe in perdicioun?

stylus

13Whether thi merueilis schulen be knowun in derknessis; and thi riytfulnesse in the lond of foryetyng?

stylus

14And, Lord, Y criede to thee; and erli my preier schal bifor come to thee.

stylus

15Lord, whi puttist thou awei my preier; turnest awei thi face fro me?

stylus

16I am pore, and in traueils fro my yongthe; sotheli Y am enhaunsid, and Y am maad low, and disturblid.

stylus

17Thi wraththis passiden on me; and thi dredis disturbliden me.

stylus

18Thei cumpassiden me as watir al dai; thei cumpassiden me togidere.

stylus

19Thou madist fer fro me a frend and neiybore; and my knowun fro wretchidnesse.

stylus