1The title of the thre and seuentithe salm. The lernyng of Asaph. God, whi hast thou put awei in to the ende; thi strong veniaunce is wrooth on the scheep of thi leesewe?

stylus

2Be thou myndeful of thi gadering togidere; which thou haddist in possessioun fro the bigynnyng. Thou ayenbouytist the yerde of thin eritage; the hille of Syon in which thou dwellidist ther ynne.

stylus

3Reise thin hondis in to the prides of hem; hou grete thingis the enemy dide wickidli in the hooli.

stylus

4And thei that hatiden thee; hadden glorie in the myddis of thi solempnete.

stylus

5Thei settiden her signes, `ethir baneris, signes on the hiyeste, as in the outgoing; and thei knewen not.

stylus

6As in a wode of trees thei heweden doun with axis the yatis therof in to it silf; thei castiden doun it with an ax, and a brood fallinge ax.

stylus

7Thei brenten with fier thi seyntuarie; thei defouliden the tabernacle of thi name in erthe.

stylus

8The kynrede of hem seiden togidere in her herte; Make we alle the feest daies of God to ceesse fro the erthe.

stylus

9We han not seyn oure signes, now `no profete is; and he schal no more knowe vs.

stylus

10God, hou long schal the enemye seie dispit? the aduersarie territh to ire thi name in to the ende.

stylus

11Whi turnest thou awei thin hoond, and `to drawe out thi riythond fro the myddis of thi bosum, til in to the ende?

stylus

12Forsothe God oure kyng bifore worldis; wrouyte heelthe in the mydis of erthe.

stylus

13Thou madist sad the see bi thi vertu; thou hast troblid the heedis of dragouns in watris.

stylus

14Thou hast broke the heedis of `the dragoun; thou hast youe hym to mete to the puplis of Ethiopiens.

stylus

15Thou hast broke wellis, and strondis; thou madist drie the flodis of Ethan.

stylus

16The dai is thin, and the niyt is thin; thou madist the moreutid and the sunne.

stylus

17Thou madist alle the endis of erthe; somer and veer tyme, thou fourmedist tho.

stylus

18Be thou myndeful of this thing, the enemye hath seid schenschip to the Lord; and the vnwijs puple hath excitid to ire thi name.

stylus

19Bitake thou not to beestis men knoulechenge to thee; and foryete thou not in to the ende the soulis of thi pore men.

stylus

20Biholde in to thi testament; for thei that ben maad derk of erthe, ben fillid with the housis of wickidnessis.

stylus

21A meke man be not turned awei maad aschamed; a pore man and nedi schulen herie thi name.

stylus

22God, rise vp, deme thou thi cause; be thou myndeful of thin vpbreidyngis, of tho that ben al dai of the vnwise man.

stylus

23Foryete thou not the voices of thin enemyes; the pride of hem that haten thee, stieth euere.

stylus